ហេតុផលផ្សេងៗដែលបទចម្រៀងជាច្រើនរបស់តារានៅ YG ត្រូវបាន KBS ហាមឃាត់មិនឱ្យចាក់ផ្សាយ

អ្នកគាំទ្រជាច្រើនសុទ្ធតែបានដឹងរួចមកហើយថា KBS គឺជាស្ថានីយទូរទស្សន៍ជាតិរបស់កូរ៉េខាងត្បូងដែលមានច្បាប់តឹងរ៉ឹងខ្លាំងក្នុងការអនុញ្ញាតឱ្យចាក់ផ្សាយកម្មវិធីនានា ឬបទចម្រៀងខេប៉ុប។ ជាមួយគ្នានេះ KBS ក៏បានធ្វើឱ្យមហាជនមានការភ្ញាក់ឡើងខ្លាំងថែមមួយកម្រិតទៀតផងដែរ ក្រោយពួកគេបានហាមឃាត់មិនឱ្យចាក់ផ្សាយបទចម្រៀងរបស់តារាក្នុងផលិតកម្ម YG ដោយសារមូលហេតុចម្លែកៗទាំងនេះ៖

១. “CLIK CLAK” របស់ BABYMONSTER

បទចម្រៀងថ្មី “CLIK CLAK”  របស់ BABYMONSTER ត្រូវបានស្ថានីយទូរទស្សន៍ជាតិមួយនេះហាមឃាត់មិនឱ្យចាក់ផ្សាយ ដោយសារបានបំពានលើបទប្បញ្ញត្តិការផ្សាយមាត្រាទី ៤៦ នៃច្បាប់ រឹត​បន្តឹង​ឥទ្ធិពល​ការ​ផ្សាយ​ពាណិជ្ជកម្ម។ ការហាមឃាត់មួយនេះត្រូវបានសម្រេចឡើង ក្រោយពិនិត្យឃើញថាក្នុងបទចម្រៀងមួយនេះមានលើកឡើងពីផលិតផលម៉ាកប្រណិតជាច្រើនរួមមាន​​ Ferrari, Cartier និង​ផលិតផល​ផ្សេងៗ​ទៀត។

២. “PINK VENOM” របស់ BLACKPINK

បទចម្រៀងដ៏ល្បីល្បាញរបស់ BLACKPINK គឺ “PINK VENOM” ក៏ត្រូវបានប៉ុស្ដិ៍ទូរទស្សន៍ជាតិមួយនេះហាមឃាត់មិនឱ្យចាក់ផ្សាយដោយសារមូលហេតុមិនខុសពីបទចម្រៀងរបស់ BABYMONSTER នោះទេ។ ក្នុងនោះមានឃ្លាបទចម្រៀងរបស់ Jennie បានច្រៀងថា “waving the coco” ដែលបញ្ជាក់អំពីម៉ាក Channel ខណៈឃ្លារបស់ Lisa គឺ “I’m still in Celine” បញ្ជាក់អំពីម៉ាក Celine ផងដែរ។

៣. “Kill This Love” របស់ BLACKPINK

ក្នុងឆ្នាំ ២០១៩ BLACKPINK បានត្រលប់មកវិញជាមួយបទចម្រៀងដ៏គួរឱ្យចាប់អារម្មណ៍ “Kill This Love”។ បើទោះជា MV មានភាពទាក់ទាញ និងល្បីខ្លាំងយ៉ាងណា ក៏ស្ថានីយទូរទស្សន៍ KBS បានហាមប្រាមមិនឱ្យចាក់បទចម្រៀងមួយនេះដែរ។ យោងទៅតាមការប្រកាសរបស់ KBS វីដេអូបទចម្រៀងមួយនេះមានរូបភាពដែលបំពានច្បាប់ចរាចរណ៍ផ្លូវគោកដោយក្នុងឈុតមួយ Rosé បានបើកបរឡានក្នុងល្បឿនលឿនដោយមិនបានពាក់ខ្សែក្រវ៉ាត់សុវត្ថិភាព។ លើសពីនេះ ក៏មាន​ឈុតមួយទៀត Rosé កំពុងឈរកណ្ដាលផ្លូវពេលរថយន្ដកំពុងធ្វើដំណើរក៏ជាមូលហេតុមួយផ្សេងទៀតដែលត្រូវបានហាមឃាត់មិនឱ្យចាក់ផ្សាយដែរ។

៤. “Fxxk It” របស់ BIGBANG

បទ “Fxxk It” របស់ BIGBANG ក៏ត្រូវបានគេហាមមិនឱ្យចាក់ផ្សាយដោយសារតែមានបង្កប់នូវពាក្យពេចន៍មិនសមរម្យ។ យោងតាម KBS បានឱ្យដឹងថាបទចម្រៀងនេះមានឃ្លា “yangachi” មានន័យ “ចោរ” ដែលបណ្ដាលឱ្យបទចម្រៀងមួយនេះត្រូវគេលុបពីការចាក់ផ្សាយ ដោយសារតែអត្ថន័យនៃបទចម្រៀងអាចធ្វើឱ្យប៉ះពាល់ដល់ទស្សនិកជន។ ជាមួយនឹងការហាមប្រាមដោយ KBS ផលិតកម្ម YG បានប្រកាសឈរលើមូលដ្ឋានរបស់ពួកគេគឺមិនផ្លាស់ប្ដូរទៅជាពាក្យសមរម្យជាងនេះ ដើម្បីតែការចាក់ផ្សាយនោះទេ។

៥. “Galaxy” របស់ AKMU

AKMU ក៏បានប្រឈមមុខជាមួយនឹងស្ថានការណ៍ស្រដៀងគ្នា និងហេតុផលដ៏គួរឱ្យហួសចិត្តនៅពេលដែលពួកគេទទួលបានបម្រាមពី KBS។ ប៉ុស្ដិ៍មួយនេះបានចាត់ទុកថា “Galaxy” នៅក្នុងបទចម្រៀងរបស់ពួកគេថាជាការផ្សាយពាណិជ្ជកម្មដោយប្រយោលសម្រាប់ស៊េរី Galaxy របស់ស្មាតហ្វូន Samsung ដ៏ល្បីល្បាញ។

៦. “I’m Busy” ដោយ 2NE1

ហេតុផលនៃការហាមឃាត់មិនឱ្យចាក់ផ្សាយបទ “I’m Busy” ដោយ 2NE1 ក៏មិនខុសគ្នាពីបទចម្រៀងរបស់ BIGBANG ដែរដោយស្ថានីយបាននិយាយថានៅក្នុងបទចម្រៀងមានពាក្យ “babo” ជាភាសាកូរ៉េមានន័យថា “ល្ងង់” ដែលវាផ្ទុយពីបទប្បញ្ញត្តិរបស់ KBS។

៧. “Everyday” របស់ WINNER

បន្ទាប់ពីក្រុម WINNER បានចេញបទចម្រៀង “Everyday” អ្នកគាំទ្រជាច្រើនពិតរីករាយជាមួយនឹងបទចម្រៀងមួយបទនេះយ៉ាងខ្លាំង។ ប៉ុន្តែសម្រាប់ KBS វិញបានជឿជាក់ថាបទមួយនេះគឺមិនបានឆ្លងកាត់ការពិនិត្យត្រឹមត្រូវនោះទេ។ ជាពិសេសក្នុងបទចម្រៀងមួយនេះមានពាក្យ “lotto” ដែលសន្មត់ថាជាពាក្យបង្កប់ន័យលើកទឹកចិត្តឱ្យយុវជនចូលរួមនៅក្នុងល្បែងស៊ីសងខុសច្បាប់។

៨. “Gentleman” របស់ PSY

អំឡុងពេលស្ថិត​ជាតារារបស់ផលិតកម្ម PSY បានចេញនូវបទចម្រៀងដ៏គួរឱ្យចាប់អារម្មណ៍ជាច្រើន ក្នុងនោះក៏មានបទ “Gentleman” ផងដែរ។ មួយបទនេះក៏បានធ្វើឱ្យពិភពលោកភ្ញាក់ផ្អើលមិនធម្មតាដែរ ប៉ុន្តែបែរជាត្រូវបានហាមឃាត់មិនឱ្យចាក់ផ្សាយនៅក្នុងប្រទេសកំណើតរបស់ខ្លួនទៅវិញ។ មូលហេតុនោះគឺក្នុងបទចម្រៀង  PSY បានទាត់កោណចរាចរណ៍ ដែលនេះត្រូវបានចាត់ទុកជាការបំផ្លិចបំផ្លាញទ្រព្យសម្បត្តិសាធារណៈ និងចាត់ទុកជាទង្វើមិនសមរម្យផងដែរ។

ខណៈដែលការត្រួតពិនិត្យហើយចាប់យកកន្លែងខុសឆ្គងគឺជាការចាំបាច់ និងការជំរុញទឹកចិត្ត ប៉ុន្តែ KBS បានធ្វើឱ្យអ្នកគាំទ្រខេប៉ុបមួយចំនួនយល់ច្រលំទៅលើការហាមប្រាមបទ​ចម្រៀង​របស់​តារា​ចម្រៀង YG ដោយ​គិតថា​មិន​សម​ហេតុផល។ តែ​ក៏​មាន​តារា​ជាច្រើន​ទៀត ក្រៅពី​ផលិតកម្ម YG សុទ្ធតែ​ត្រូវ​បាន KBS ហាម​ឃាត់ ព្រោះ​ខុស​នឹងបទប្បញ្ញត្តិរបស់​ស្ថានីយទូរទស្សន៍៕