ភាពយន្តរ​ន្ធត់បែបល្បែងពិឃាដ ៥ រឿងស័ក្តិសមបំផុតសម្រាប់អ្នកចូលចិត្តរឿង Squid Game

កាលពីចុងឆ្នាំ ២០២១ អ្នកនិយមទស្សនាភាពបែបរន្ធត់ និងយុទ្ធសាស្រ្តមិនតិចទេ ដែលបានលើកយករឿងទាក់ទងនឹងល្បែងកម្សាន្តចម្លែករបស់កូរ៉េខាងត្បូង Squid Game មកនិយាយ មិនថាពីហ្គេមប្លែកៗដែលស្ទើរតែគ្មានអ្នកគិតដល់ ក៏ដូចជាចិត្តសាស្រ្តរបស់តួអង្គនីមួយៗនៅក្នុងសាច់រឿង។ នៅចុងឆ្នាំនេះទៀតសោត Squid Game ក៏ទើបតែបានចេញរដូវកាលបន្ទាប់របស់ខ្លួនកាលពីថ្ងៃទី ២៦ ខែធ្នូថ្មីៗនេះ ដែលមានសាច់រឿងទាក់ទាញមិនចាញ់គ្នាប៉ុន្មាននោះទេ។

ដោយឡែក សម្រាប់ទស្សនិកជនរូបណាដែលទស្សនារឿងភាគរបស់កូរ៉េខាងត្បូងមួយនេះទាំងពីររដូវកាលចប់ហើយ តែនៅមិនទាន់អស់ចិត្តចង់នៅឡើយ ថ្ងៃនេះ AMS សូមណែនាំរឿងរន្ធត់ទាក់ទងនឹងល្បែងកម្សាន្តអាថ៌កំបាំងចំនួន​ ៥ចំណងជើង ដែលអ្នកគាំទ្ររបស់ Squid Game មិនគួររំលង។

១. Battle Royale

Battle Royale ជាភាពយន្តកុនរន្ធត់មួយដែលបានចាក់ផ្សាយតាំងតែពីឆ្នាំ ២០០០ ដោយយកលំនាំទៅតាមប្រលោមលោកភ័យរន្ធត់របស់លោក Koushun Takami។ មូលហេតុដែលអ្នកអាចនឹងចូលចិត្តរឿងនេះ ព្រោះនៅក្នុងកិច្ចសម្ភាសន៍ជាមួយនឹង Variety លោក Hwang Dong-hyuk ដែលជាអ្នកនិពន្ធ​ និងដឹកនាំរឿង Squid Game បានប្រាប់ថា Battle Royale ជារឿងមួយដែលចូលរួមបំផុសគំនិតរបស់គាត់ក្នុងការសរសេររឿងដ៏ជោគជ័យរបស់ខ្លួន។

ភាគយន្តរន្ធត់ពីប្រទេសជប៉ុនមួយនេះ និយាយពីសិស្សថ្នាក់ទី៩ ចំនួន ៤២នាក់ដែលត្រូវបានជ្រើសរើសដោយរដ្ឋាភិបាលផ្តាច់ការ ដើម្បីចូលរួមលេងនៅល្បែងមួយដែលមានឈ្មោះថា Battle Royale។ ក្រោយជ្រើសរើសបានគ្រប់គ្នាហើយ រដ្ឋាភិបាលផ្តាច់ការនោះបានបញ្ជូនពួកគេទៅកោះដាច់ស្រយាលមួយ និងបង្ខំឱ្យសិស្សទាំងនេះប្រយុទ្ធគ្នាដល់ស្លាប់រៀងខ្លួន រហូតនៅសល់តែបេក្ខភាពម្នាក់គត់ដែលជាអ្នកឈ្នះ។

២. Alice in Borderland

បើសិនជាអ្នកចូលចិត្តភាពឃោឃៅ និងល្បែងចម្លែកៗនៅក្នុងរឿង Squid Game អ្នកក៏ប្រហែលជាចូលចិត្តរឿង Alice in Borderland ដូចគ្នាដែរ។ ភាពយន្តភាគដ៏ល្បីល្បាញមួយនេះបានចេញផ្សាយរដូវកាលដំបូងរបស់ខ្លួនតាំងតែពីឆ្នាំ ២០២០ មកម៉្លេះ ហើយបច្ចុប្បន្នរឿងរន្ធត់មួយនេះមានរហូតដល់ទៅ ៣ រដូវកាលទៅហើយ ដែលគ្រោងនឹងបញ្ចាំងនៅក្នុងឆ្នាំ ២០២៥ ខាងមុខនេះ។

ផ្អែកទៅតាមសៀវភៅរឿងរូបភាពរបស់លោក Haro Aso រឿង Alice in Borderland និយាយអំពីមនុស្សមួយក្រុមដែលជាប់គាំងនៅក្នុងពិភពចម្លែក និងគ្រោះថ្នាក់មួយ។ ដើម្បីរស់ ពួកគេមានវិធីសាស្រ្តតែមួយគត់ នោះគឺការចូលរួមប្រកួតនៅក្នុងល្បែង ដែលពេញទៅដោយអន្ទាក់ចាំចាប់យកជីវិតរបស់ពួកគេគ្រប់ពេលវេលា។

៣. Escape Room

ស្ថិតនៅក្នុងប្រភេទភាពយន្តរន្ធត់ និងចិត្តសាស្រ្ត Escape Room ជារឿងរ៉ារបស់មនុស្ស ៦នាក់ដែលមានបទពិសោធន៍ និងចំណេះជំនាញផ្សេងៗគ្នា មកចូលរួមប្រកួតក្នុងហ្គេម Escape Room ដើម្បីប្រាក់រង្វាន់ចំនួន ១ម៉ឺនដុល្លារអាមេរិក។ ដោយជាប់គាំងនៅក្នុងបន្ទប់ចម្លែកៗដែលជាអន្ទាក់របស់ល្បែងមួយនេះ អ្នកទាំង ៦ត្រូវស្វែងរកដំណោះស្រាយដែលជាសោរនាំអ្នកលេងទាំងអស់ទៅកាន់បន្ទប់បន្តបន្ទាប់ទៀត។​

ត្បិតខុសគ្នាពីរឿង Squid Game ដែលអ្នកចូលរួមលេងទាំងអស់ត្រូវដោះស្រាយចំណោទរៀងៗខ្លួន តែសម្រាប់ភាពយន្តអាមេរិកដែលផលិតឡើងកាលពីឆ្នាំ ២០១៩ នេះវិញ អ្នកទាំង ៦អ្នកនេះត្រូវរួមដៃគ្នាស្វែងរកគន្លឹះសម្ងាត់ដើម្បីអាចមានជីវិតរស់បាន។

៤. As the Gods Will

As the Gods Will គឺជាភាពយន្តភ័យរន្ធត់បែបអបិយជំនឿរបស់ជប៉ុននិយាយអំពីសិស្សវិទ្យាល័យមួយក្រុមដែលត្រូវបានគេបង្ខំឱ្យប្រកួតប្រជែងក្នុងហ្គេមដ៏សាហាវមួយដើម្បីមានជីវិតរស់។ សាច់រឿងផ្ដោតសំខាន់ទៅលើតួឯក Shun Takahata ដែលបានចូលរួមក្នុងល្បែងនេះជាមួយនឹងមិត្តភ័ក្តិដទៃទៀត។ ខុសពីអ្នកដទៃ Shun Takahata មិនត្រឹមតែមានគោលដៅចង់ឈ្នះព្រោះតែជីវិតរបស់ខ្លួននោះទេ តែគេចង់បកអាក្រាតថាអ្នកណាជាអ្នកដែលនៅពីក្រោយរឿងនេះ។

កន្លងមក អ្នកដែលធ្លាប់ទស្សនាភាពយន្តទាំងពីរនេះ ធ្លាប់បានលើកឡើងពីភាពស្រដៀងគ្នារវាងភាពយន្តទាំង ២រឿង ជាពិសេសនៅត្រង់ល្បែង Red Light Green Light ដែលយើងចំណាំហៅថាល្បែង “កូរៗវ៉ា” តែម្ដង។ ដោយឡែក លោក Hwang Dong-hyuk បានចេញបញ្ជាក់យ៉ាងច្បាស់ថា លោកបានចាប់ផ្ដើមនិពន្ធរឿងរបស់ខ្លួនតាំងតែពីឆ្នាំ ២០០៨មកម៉្លេះ ហើយរឿង As the Gods Will ទើបតែចេញកាលពីឆ្នាំ ២០១៤នេះទេ៕

៥.The Hunger Games

The Hunger Gamesជាភាពយន្តដែលផលិតឡើងតាមលំនាំរបស់ប្រលោមលោកដែលសរសេរដោយ Suzanne Collins។ សាច់រឿងកើតឡើងនៅក្នុងលោកអនាគតដែល ក្មេងស្រីជំទង់ Katniss Everdeen បានក្លាយជាតំណាងនៃស្រុករបស់ខ្លួន ដើម្បីចូលរួមប្រកួតយកស្លាប់យករស់ជាមួយនឹងក្មេងជំទង់ ២៣ នាក់ផ្សេងទៀត។

ត្បិតមិនមែនល្បែងក្នងប្រភេទតែមួយដូចគ្នានឹង Squid Game តែភាពយន្តដែលផលិតតាំងតែពីឆ្នាំ ២០១២មួយនេះ មានឈុតឆាកប្រយុទ្ធគ្នាច្រើន និងមានភាពស្មុគស្មាញដែលធ្វើ​​ឱ្យអ្នកទស្សនាជក់ចិត្តរួមគ្នាវិភាគទៅតាមដំណើររឿង។