ម្នាក់ៗរំភើបចង់ហោះ! ទៅញ៉ាំម្ហូបឆ្ងាញ់ៗ Free ហើយ ស្រាប់តែឈ្នះរង្វាន់ ខ្លះបានខ្សែកពេជ្រ ទៅលេងជប៉ុន iPhone 14 Pro Max

សំឡេងហ៊ោកញ្ជៀវបានលាន់កងរំពងពេញអគារនៅ ដឹ ព្រេមៀ សេនធ័រ សែនសុខ ក្រោយពិធីករ-ពិធីការិនី ដែលមានកញ្ញា ហេង កែវនីតា និងលោកជា វណ្ណារិទ្ធិ បានប្រកាសអ្នកឈ្នះរង្វាន់ពិសេសៗ ជាច្រើនរង្វាន់ក្នុងពិធីជប់លៀងដ៏ធំមួយដែលរៀបចំឡើងក្រុមហ៊ុន Toyota Cambodia ។

ក្រោមបរិយាកាសដ៏រីករាយកាលពីរាត្រីថ្ងៃទី ១៦ ខែមីនា ឆ្នាំ ២០២៣ ក្រុមហ៊ុន Toyota Cambodia បានរៀបចំកម្មវិធីជួបជុំអតិថិជនរបស់ខ្លួនយ៉ាងពិសេស ពិសារភោជនាអាហារឆ្ងាញ់ៗ អមជាមួយការប្រគំតន្ត្រី ដែលមានការចូលរួមពីសំណាក់តារាចម្រៀងវ័យក្មេងកំពុងល្បីឈ្មោះ ថុល សុភិទិ និងកំពូលតារាចម្រៀងស្រីប្រចាំប្រទេសកម្ពុជា អ្នកនាង មាស សុខសោភា ព្រមទាំងមានការសម្ដែងពិសេសៗជាច្រើនទៀត។ មិនតែប៉ុណ្ណោះនៅក្នុងពិធីជប់លៀងដ៏អធឹកអធម រាត្រីពេជ្រ Toyota Cambodia (Shining Night) បានធ្វើការចាប់ឆ្នោតជូនដល់អតិថិជនខ្លួន ដើម្បីជាការថ្លែងអំណរគុណ ចំពោះការគាំទ្រកន្លងមក។ ក្នុងនោះរួមមាន អ្នកឈ្នះរង្វាន់ iPhone14 pro max ចំនួន ២០រង្វាន់, ដំណើរកម្សាន្តទៅកាន់ប្រទេសជប៉ុន សម្រាប់មនុស្ស២នាក់ ចំនួន ១៥រង្វាន់, ឈុតខ្សែកពេជ្រតម្លៃ ៥០០០ដុល្លារ ចំនួន ២រង្វាន់ និងកាន់តែអស្ចារ្យនោះ គឺរង្វាន់ឈុតខ្សែកពេជ្រ តម្លៃ ១ម៉ឺនដុល្លារ។

អ្នកមានសំណាងបានឈ្នះខ្សែកពេជ្រ តម្លៃ ៥០០០ដុល្លារ ដោយផ្ដល់កិត្តិយសចាប់ឆ្នោតពីសំណាក់លោក រីយ៉ូជិ ហ្វ៊ូជីតា អគ្គនាយកក្រុមហ៊ុន តូយ៉ូតា (ខេមបូឌា) រួមមាន៖ ទី១ បានទៅលើឈ្មោះ កុយ ណារី មកពីខេត្តកំពង់ចាម ទី២ បានទៅលើឈ្មោះ សឿ ចរិយា មកពីខេត្តត្បូងឃ្មុំ។ ចំណែកឯរង្វាន់ដ៏ពិសេសជាងគេគឺខ្សែកពេជ្រតម្លៃ ១ម៉ឺនដុល្លារ ដែលផ្ដល់កិត្តិយសចាប់ឆ្នោតពីសំណាក់លោកឧកញ៉ា គង់ នួន ប្រធានក្រុមហ៊ុន តូយ៉ូតា (ខេមបូឌា) បានទៅលើអ្នកខេត្តកំពង់ស្ពឺ គឺអ្នកស្រី អ៊ីម ស្រីនិច។

អ្នកដែលបានឈ្នះរង្វាន់គ្រប់រូបបានបង្ហាញនូវក្ដីរំភើបក្រៃលែង រីឯអតិថិជន ដែលមិនទាន់មានសំណាងក៏បានបង្ហាញនូវទឹកមុខញញឹមរីករាយ ព្រោះបានចូលរួមកម្មវិធីជួបជុំដ៏ធំប្រចាំឆ្នាំ ពិសារអាហារឆា្ងញ់ៗ ទស្សនាការប្រគំតន្ត្រីពីសំណាក់តារាល្បីៗ ក្រោមបរិយាកាសដ៏រីករាយ។

ថ្លែងនៅក្នុងឱកាសនោះផងដែរ លោកឧកញ៉ា គង់ នួន ជាប្រធានក្រុមហ៊ុន តូយ៉ូតា (ខេមបូឌា) បានថ្លែងអំណរគុណចំពោះអតិថិជនទាំងអស់ដែលតែងតែគាំទ្រ ជឿទុកចិត្តទៅលើគុណភាព ក៏ដូចជាសេវាកម្មរបស់ក្រុមហ៊ុន តូយ៉ូតា (ខេមបូឌា) ដែលមានដូចជា សេវាកម្មផ្លាស់ប្ដូររថយន្តថ្មី សេវាកម្មផ្លាស់ប្ដូរគ្រឿងបន្លាស់រថយន្ត សេវាកម្មបង់រំលស់ពី Toyota Finance សេវាកម្មដោះដូររថយន្តចាស់យករថយន្តថ្មី និងចុងក្រោយគឺសេវាកម្មជួលរថយន្ត។ បន្ថែមលើពីនេះលោកឧកញ៉ាក៏បានថ្លែងអំណរគុណចំពោះបុគ្គលិកគ្រប់ជាន់ថ្នាក់របស់ក្រុមហ៊ុន ដែលបានខិតខំបំពេញការងារ ដែលបានផ្ដល់សេវាកម្មដ៏ល្អបំផុត ដើម្បីបំពេញនូវរាល់តម្រូវការរបស់អតិថិជននាពេលកន្លងមកនេះ៕