មង្គលការ Shin Min Ah និង Kim Woo Bin ចំណាយមិនក្រោមកន្លះលានដុល្លារ

សារព័ត៌មាន Ten Asia បានប៉ាន់ប្រមាណថា ពិធីមង្គលការរបស់ដៃគូតារាសម្ដែង Shin Min Ah និង Kim Woo Bin អាចនឹងចំណាយខ្ទង់ ៧០០លានវ៉ុន ឬប្រមាណ ៤៧៨ ០០០ ដុល្លារអាមេរិក ខណៈគូស្វាមីនេះក៏បានបរិច្ចាគប្រាក់ចំនួន ៣០០លានវ៉ុនទៀត នាំឱ្យប្រាក់ចំណាយសរុបអាចហក់ឡើងដល់ ១ពាន់លានវ៉ុន ឬប្រមាណ ៦៧ម៉ឺន ៦ពាន់ដុល្លារអាមេរិក។

កាលពីថ្ងៃទី២០ ខែធ្នូ កន្លងទៅ​ Kim Woo Bin និង Shin Min Ah បានដឹកដៃគ្នាចូលរោងអាពាហ៍ពិពាហ៍ដែលប្រារព្ធធ្វើឡើងនៅឯសណ្ឋាគារ Shilla ទីក្រុងសេអ៊ូល​ ខណៈកូនក្រមុំកូនកំលោះបានសម្រេចជូនឈុតគ្រឿងសម្អាង Lancôme និងទឹកអប់ Acqua di Parma ដែលមានតម្លៃរាប់រយលានវ៉ុនជូនភ្ញៀវកត្តិយសជាអនុស្សាវរីយ៍។

នៅក្នុងថ្ងៃពិសេសនេះ កូនក្រមុំស្រីវ័យ ៤១ឆ្នាំបានជ្រើសរើសរ៉ូបពីយីហោ Elie Saab ដែលបានច្នៃឡើងសម្រាប់ 2026 Spring Bridal Collection តម្លែប្រមាណ ៣១ ០០០ដុល្លារអាមេរិក ឬ ៤៦លានវ៉ុន ជារ៉ូបអាពាហ៍ពិពាហ៍។

សម្រាប់គ្រឿងអលង្ការវិញសុទ្ធសឹងតែជាម៉ាក Louis Vuitton ដោយ Shin Min Ah បានពាក់ខ្សែក Louis Vuitton Fine Jewelry Galaxie Necklace ដែលមានតម្លៃ ២១៤ ០០០ ដុល្លារអាមេរិក ឬ ៣១៦លានវ៉ុន អមជាមួយក្រវិលដែលមានតម្លៃប្រមាណ​ ៥០ ៧០០ដុល្លារអាមេរិក ឬ ៧៥លានវ៉ុន។ ឯចិញ្ចៀនរបស់ Kim Woo Bin វិញ កូនកម្លោះវ័យ ៣៦ឆ្នាំ បានពាក់ចិញ្ចៀន Louis Vuitton តម្លៃប្រហែល ១១ ៥០០ដុល្លារអាមេរិក ឬ ១៧លានវ៉ុន។

ដោយឡែក សម្រាប់តម្លៃទីតាំង រួមបញ្ជូលការតុបតែង និងម្ហូបអាហារ កាលពីឆ្នាំ ២០២៤ កន្លងទៅ YouTuber Kim Seup-Seup ធ្លាប់បានឱ្យដឹងថា ពិធីមង្គលការរបស់នាងដែលបានធ្វើនៅទីតាំងតែមួយនេះ មានតម្លៃសរុប ១៩៦ លានវ៉ុន ឬ ១៣២ ៥០០ ដុល្លារអាមេរិក។

ផ្អែកលើព័ត៌មាននេះ ការចំណាយប៉ាន់ស្មាននៃពិធីមង្គលការរបស់ Kim Woo Bin និង Shin Min Ah រួមទាំងថ្លៃទីកន្លែង អំណោយអាពាហ៍ពិពាហ៍ រ៉ូប និងគ្រឿងអលង្ការ គឺយ៉ាងហោចណាស់ ៧០០ លានវ៉ុន ឬល្បាក់ ៤៧៨ ០០០​ ដុល្លារអាមេរិក។

នៅក្នុងថ្ងៃមង្គលនេះ គូស្នេហ៍តារាសម្ដែងខាងលើក៏បានបរិច្ចាគទឹកប្រាក់ ៣០០ លានវ៉ុន ប្រហែល ២០៣ ០០០ ដុល្លារអាមេរិកទៅកាន់មូលនិធិ Hanlim Burn មជ្ឈមណ្ឌលវេជ្ជសាស្ត្រ Seoul Asan និងអង្គការសង្គ្រោះអន្តរជាតិ Good Friends ផងដែរ ដែលនាំឱ្យការចំណាយសរុបហក់ដល់ ១ពាន់លានវ៉ុន ឬប្រមាណ ៦៧ម៉ឺន ៦ពាន់ដុល្លារអាមេរិក៕