តារាខេប៉ុបល្បីៗច្រើនក្រុមត្រៀមត្រលប់មកឆាកតន្ត្រីវិញក្នុងខែកក្កដានេះ

តារាល្បីៗជាច្រើនដូចជា EXO D.O, Jackson Wang, Super Junior, TWICE និង KARD គ្រោងនឹងធ្វើការវិលត្រលប់មកឆាកតន្ត្រីវិញនៅខែកក្កដានេះ ព្រមជាមួយសិល្បករល្បីៗជាច្រើនទៀត។ ចង់ដឹងថាមានអ្នកណាខ្លះ តោះទៅតាមដានជាមួយ AMS ខាងក្រោមនេះតែម្ដង៖

BABYMONSTER

បន្ទាប់ពីភាពជោគជ័យនៃដំណើរប្រគំតន្ត្រីទេសចរណ៍របស់ពួកគេ សមាជិកទាំងប្រាំពីររបស់ BABYMONSTER កាន់តែធ្វើឱ្យហ្វេនៗពុះកញ្ជ្រោលថែមទៀតជាមួយនឹងការចេញអាល់ប៊ុមថ្មី “HOT SAUCE” ។ មានបទសរុបចំនួន ៤ បទ អាល់ប៊ុមខ្នាតតូចទីពីររបស់ពួកគេត្រូវបានកំណត់ចេញនៅថ្ងៃទី ១ ខែកក្កដានេះ។

AHOF

បន្ទាប់ពីចូលរួមប្រកួតកម្មវិធី Universe League បេក្ខភាពចុងក្រោយទាំងប្រាំបួននឹងបង្ហាញខ្លួនជាក្រុម AHOF នៅថ្ងៃទី ១ ខែកក្កដា ក្រោមផលិតកម្ម F&F Entertainment ។ AHOF គឺជាពាក្យកាត់សម្រាប់ “All-time Hall Of Famer”។

MYNAME

សមាជិកសង្ហាទាំងបីរបស់ MYNAME នឹងធ្វើឱ្យពិភពលោកកាន់តែមានពន្លឺជាមួយនឹងការចេញអាល់ប៊ុម VIVID របស់ពួកគេនៅថ្ងៃទី ២ ខែកក្កដា។

KARD

ក្រុមចម្រៀងមានសមាជិកស្រីប្រុសមួយនេះនឹងចេញអាល់ប៊ុមតូចទី ៨ របស់ពួកគេ DRIFT នៅថ្ងៃទី ២ ខែកក្កដា។ ក្នុងនាមជាក្រុម Co-Ed ដ៏ជោគជ័យបំផុតរបស់ K-Pop អ្នកគាំទ្រអន្តរជាតិជាច្រើនកំពុងរង់ចាំយ៉ាងអន្ទះសាសម្រាប់ការចេញផ្សាយបទថ្មី ខណៈអាល់ប៊ុមនេះមានបទចម្រៀងចំនួនប្រាំពីរ។

TWS

ក្រុម TWS របស់ក្រុមហ៊ុន Pledis ក៏កំពុងចាប់ផ្តើមវាយលុកទីផ្សារប្រទេសជប៉ុនជាមួយនឹងការចេញបទចម្រៀងដំបូងពីអាល់ប៊ុមភាសាជប៉ុនថ្មីរបស់ពួកគេនៅថ្ងៃទី២ ខែកក្កដា។

EXO D.O

D.O. នឹងចេញអាល់ប៊ុមទោលខ្នាតពេញដំបូងរបស់ខ្លួនមានចំណងជើងថា BLISS នៅថ្ងៃទី ៧ ខែកក្កដា។ តារា​ចម្រៀង​ដ៏​មាន​ទេព​កោសល្យ​រូប​នេះ​បានរៀបចំនិងបញ្ចេញ​ឈុត​ខ្លីៗ ក៏ដូចជា teaser ​ផ្សេងៗជាច្រើន ហើយ​អ្នក​គាំទ្រ​ជឿ​ថា​រូបលោក​នឹង​ក្លាយ​ជា​សិល្បករទោល​ដ៏​ពេញ​និយម​បំផុត​មួយរូប​។

Super Junior

Elfs ដែលជាក្រុមអ្នកគាំទ្ររបស់ Super Junior នឹងសប្បាយចិត្តនៅពេលដែលក្រុមសំណព្វខ្លួនបន្តមានភាពរឹងមាំជាច្រើនឆ្នាំមកនេះ។ ចាប់ផ្តើមនៅក្នុងខែសីហា ពួកគេបានប្រកាសដំណើរទេសចរណ៍ ‘Super Show 10’ ដើម្បីអបអរខួប ២០ ឆ្នាំរបស់ខ្លួន ហើយនឹងចេញអាល់ប៊ុម Super Junior 25 ដែលជាអាល់ប៊ុមខ្នាតពេញទី ១២ របស់ពួកគេជាកាដូដល់អ្នកគាំទ្រនៅថ្ងៃទី ៨ ខែកក្កដា។

TWICE

បន្ទាប់ពីការចេញបទចម្រៀងដោយជោគជ័យនៅក្នុងប្រទេសជប៉ុន TWICE នឹងត្រលប់មកប្រទេសកូរ៉េវិញជាមួយនឹងអាល់ប៊ុមខ្នាតពេញទី ៤ មានចំណងជើងថា THIS IS FOR ។ ខណៈអាល់ប៊ុមគ្រោងនឹងចេញផ្សាយនៅថ្ងៃទី ១១ ខែកក្កដា សមាជិកក្រុមក៏នឹងចាប់ផ្តើមដំណើរប្រគំតន្ត្រីទេសចរណ៍ពិភពលោករបស់ពួកគេនៅទីក្រុងសេអ៊ូលនៅខែក្រោយផងដែរ។

SF9

ក្រុមចម្រៀងបុរស SF9 នឹងចេញអាល់ប៊ុម LOVE RACE សម្រាប់ទីផ្សារប្រទេសជប៉ុននៅថ្ងៃទី ១៦ ខែកក្កដា។ ក្រុមចម្រៀងនេះបានត្រលប់មកវិញជាមួយនឹងសមាជិកប្រាំមួយនាក់បន្ទាប់ពីបានផ្អាកសកម្មភាពអស់រយៈពេល ៣ ឆ្នាំ ហើយទើបតែបានប្រារព្ធការប្រគំតន្ត្រី Comeback របស់ពួកគេកាលពីខែមិថុនា នៅទីក្រុងសេអ៊ូល។

xikers

ជប៉ុន​ជា​ប្រទេស​សំណាង​មួយ ខណៈ​ក្រុម​ចម្រៀង​ប្រុសមួយ​ទៀត​នឹង​ចាប់​ផ្ដើមយុទ្ធនាការ​ផ្សព្វផ្សាយ​នៅ​ទីនោះ។ ក្រុម​ចម្រៀង​ប្រុស xikers បាន​ប្រកាស​ចេញ​បទ​ចម្រៀង​ជា​ភាសា​ជប៉ុន​ទី ២ របស់ខ្លួនមានចំណងជើងថា “Up All Night” សម្រាប់​អាល់ប៊ុម​របស់​ពួក​គេ​ដែលនឹង​ចេញ​នៅ​ថ្ងៃ​ទី ១៦ ខែ​កក្កដា។

Jackson Wang

Jackson បានក្លាយជាតារាចម្រៀងដ៏ទាក់ទាញមួយរូប ហើយអាល់ប៊ុមចុងក្រោយរបស់លោក MAGIC MAN គឺពិតជាបញ្ជាក់​ពីប្រជាប្រិយភាពរបស់លោកបានយ៉ាងល្អ។ Jackson នឹងត្រលប់មកវិញជាមួយនឹងអាល់ប៊ុម MAGIC MAN 2 ដោយនឹងចេញអាល់ប៊ុមពេញនៅថ្ងៃទី ១៨ ខែកក្កដា។ សមាជិក GOT7 រូបនេះ និងសមាជិក EXO D.O. ត្រូវបានរំពឹង​ថា​នឹង​ក្លាយ​ជាសិល្បករ​ទោល​ដ៏ Hot បំផុត​ប្រចាំ​ខែ​កក្កដា។

IVE

ក្រុមចម្រៀងស្រីស្អាត IVE នឹងត្រលប់មកឆាកតន្ត្រីវិញជាផ្លូវការនៅថ្ងៃទី ៣០ ខែកក្កដាជាមួយនឹងអាល់ប៊ុម EP ជប៉ុនទី ៣ របស់ពួកគេ។ មានចំណងជើងថា Be Alright អាល់ប៊ុមនេះត្រូវបានគេរំពឹងថានឹងមានបទចម្រៀងអស្ចារ្យចំនួន ៥ បទ។ ទន្ទឹមនោះសមាជិក IVE ទាំងមូលក៏នឹងបង្ហាញខ្លួននៅក្នុងព្រឹត្តិការណ៍មហោស្រពតន្ត្រីរ៉ុកជប៉ុន ROCK IN JAPAN នៅខែកញ្ញានេះផងដែរ ៕