Miss Grand Ukraine ឆ្លើយតបបែបនេះ ក្រោយលោក ណាវ៉ាត់ និយាយថានាងរកលេសចង់ដើរលេង

ក្រោយ Miss Grand Ukraine ប្រកាសដកខ្លួនជាបេក្ខនារីប្រកួត និងរៀបរាប់ពីបញ្ហាកៀបសង្កត់នានាដែលខ្លួនបានជួបនៅកំឡុងពេលប្រកួត លោក Nawat Itsaragrisil បានចេញមុខនិយាយថា នេះគ្រាន់តែជាលេសរបស់នាងតែប៉ុណ្ណោះ។ ដោយឡែក បរវកញ្ញា​រូបនេះបានឆ្លើយតបវិញថា វាជារឿងដែលគួរឱ្យអស់សំណើច។​

កាលពីថ្ងៃទី១៩ ខែតុលានេះ កញ្ញា Kateryna Bilyk ដែលជា Miss Grand Ukraine បានប្រកាសនៅលើគណនី Instagram ផ្ទាល់ខ្លួនថា នាងបានសម្រេចចិត្តបោះបង់សិទ្ធិប្រកួតក្នុងកម្មវិធី Miss Grand International 2024 ដោយហេតុផលនៃការបំពានសិទ្ធិសេរីភាព និងការបង្ខិតបង្ខំនានារហូតប៉ះពាល់ដល់សុខភាពផ្លូវកាយ និងផ្លូវចិត្តរបស់ខ្លួន។

បវរកញ្ញារូបនេះបានរៀបរាប់ថា ក្នុងរយៈពេល ២សប្ដាហ៍នៃការប្រកួត នាងត្រូវធ្វើការពីម៉ោង៨ព្រឹកដល់ម៉ោង ១១យប់ ឬដល់ពាក់កណ្ដាលអធ្រាត្រ។ លើសពីនេះទៀតនោះ មានថ្ងៃមួយនោះ នាងត្រូវចូលរួមតាំងតែពីម៉ោង ៣ព្រឹករហូតដល់ម៉ោង ១១យប់ បើទោះបីជានាងបានកើតគ្រុនក្ដៅ ហើយមានកម្ដៅចន្លោះ ៣៧ និង៣៨ អង្សាសេ នៅ ១១ថ្ងៃចុងក្រោយក៏ដោយចុះ។

កញ្ញា Kateryna បន្តថា ក្រោយពីនាងទទួលបានថ្នាំដែលមិនមានឈ្មោះពីក្រុមការងាររបស់ MGI ស្ថានភាពរបស់នាងកាន់តែយ៉ាប់យ៉ឺនឡើងដោយសារតែប្រតិកម្មថ្នាំ​ ហើយសុខភាពកាន់តែធ្ងន់ធ្ងន់រហូតដល់សន្លប់ជាមួយនឹងកម្ដៅឡើងដល់ ៣៨,៥ អង្សាសេ និងមានសម្ពោធឈាម ១៥១/៩០ ដែលជាកម្រិតគ្រោះថ្នាក់មួយ។ ផ្ទុយមកវិញ ក្រៅពីមិនបានហៅវេជ្ជបណ្ឌិតមកព្យាបាលនាង ក្រុមការងារនៅតែបង្ខំនាងឱ្យធ្វើការដូចដើម។

បន្ថែមពីនេះ នាងក៏បានរៀបរាប់ពីការបិទសិទ្ធសេរីភាពពីសំណាក់កម្មវិធីប្រកួតផងដែរ ដោយនាងបាននិយាយថា ក្រុមការងារបានរឹបអូសលិខិតឆ្លងដែនរបស់ខ្លួនអស់រយៈពេល ៣ថ្ងៃ ព្រមទាំងមានអ្នកគ្រប់គ្រងរបស់កម្មវិធីតេមកគំរាមនាងទៀតផង។  

មុននឹងបញ្ចប់សំណេររបស់ខ្លួន បេក្ខនារីរូបនេះបានសរសេរថា នាងនឹងដាក់ពាក្យបណ្ដឹង និងធ្វើការតាមផ្លូវច្បាប់ បើសិនជាមានករណីផ្សព្វផ្សាយព័ត៌មានមិនពិត និងការបង្ខូចកេរ្តិ៍ឈ្មោះនានា។

បន្ទាប់ពីសំណេរនេះបានបង្ហោះ ស្ថាបនិកនៃវេទិកាប្រកួតបវរកញ្ញា Miss Grand International បានចេញមុខឆ្លើយតបវិញថា នេះគ្រាន់តែជាលេសដើម្បីចង់ដើរលេងរបស់ Kateryna Bilyk តែប៉ុណ្ណោះ។ ដោយលោក ណាវ៉ាត់បានរៀបរាប់ថា នាងមើលទៅឈឹនេះឈឺនោះ និងរករឿងជាប្រចាំ។ លោកបានបន្តថា នាងគ្រាន់តែខ្ចិល ហើយរកលេសទៅដើរលេងជាមួយនឹងសាច់ញាតិដែលមកលេងនាងនៅក្នុងប្រទេសថៃ ហើយបើនាងចង់ទៅប្រទេសវិញ​លោកនឹងនាំនាងទៅព្រលានយន្តហោះដោយផ្ទាល់ និងមិនបណ្ដោយឱ្យនាងយកលិខិតឆ្លងដែន ហើយចង់ទៅណាក៏ទៅតាមចិត្តនោះទេ។

បន្ថែមពីនេះទៀត លោកក៏បាននិយាយថា នាងត្រូវបង់ថ្លៃសំណងដែលចាកចេញពីកម្មវិធីពាក់កណ្ដាលទី។ នេះបើយោងតាមកិច្ចសន្យាដែលបានធ្វើឡើងមុននឹងពេលប្រកួតចាប់ផ្ដើម។ ទាក់ទងនឹងរឿងពាក្យបណ្ដឹង លោក ណាវ៉ាត់ ឆ្លើយថា លោកមិនខ្វល់ទេ Kateryna Bilyk ចង់ប្ដឹងអីប្ដឹងទៅ។

ដោយឡែក Kateryna Bilyk ក៏មិនទុករឿងនេះឱ្យនៅស្ងៀមដែរ ក្រោយពីទៅដល់ប្រទេសកំណើតរបស់ខ្លួនវិញ​ នាងបានឆ្លើយតបតាមរយៈ Story នៅលើគណនី Instagram ថា គ្មានហេតុផលអ្វីដែលនាងត្រូវធ្វើបែបនេះទេ បើគ្រាន់តែចង់ទៅដើរលេងជាមួយសាច់ញាតិនៅក្នុងប្រទេសថៃនោះ ព្រោះទម្រាំតែទៅដល់ប្រទេសថៃនាងត្រូវធ្វើដំណើរយ៉ាងវេទនា។ នាងបានរៀបរាប់ពីដំណើររបស់ខ្លួនថា  ក្រោយសង្គ្រាម នៅក្នុងអ៊ុយគ្រែនគ្មានអាកាសចរណ៍នោះទេ ហេតុនេះហើយនាងត្រូវធ្វើដំណើរ ២០ ទៅ៣០ម៉ោង ទៅកាន់ទីក្រុង Warsaw ប្រទេស Poland និងត្រូវជិះយន្តហោះ ​១៨ម៉ោងទៀត។  

នាងបានសរសេរបន្តថា ការលើកឡើងរបស់លោក ណាវ៉ាត់ ជារឿងដែលគួរឱ្យអស់សំណើច​ ព្រោះនាងត្រូវចាយលុយគ្រប់សព្វបែបយ៉ាងដើម្បីធ្វើដំណើរ ព្រមទាំងត្រូវអង្គុយរង់ចាំជើងយន្តហោះត្រឡប់មកផ្ទះវិញជិត ២០ម៉ោងទាំងដែលខ្លួនមានជំងឺទៀតផង។

ទាក់ទងនឹងការចោទប្រកាន់នាងថា ជាបវរកញ្ញាដែលខ្ជិល Miss Grand Ukraine រូបនេះបានធ្វើការបកស្រាយថា នាងបានខិតខំកសាងខ្លួនឯង ទាំងគ្មានអ្នកឧបត្ថម្ភដើម្បីវេទិកាមួយនេះ ហើយថែមទាំងបានចូលរូមប្រកួតក្នុងវគ្គផ្ដាច់ព្រ័ត្រសម្រាប់ឈុតហែលទឹកទាំងដែលមិនស្រួលខ្លួនទៀតផង។ នេះឬ ជាប្រភេទបរវកកញ្ញាដែលខ្ជិល និងគ្មានវិជ្ជាជីវៈ។

គួរបញ្ជាក់ផងដែរថា  Kateryna Bilyk មិនមែនជាបវរកញ្ញាទីមួយទេដែលបានដកខ្លួនចេញពីកម្មវិធីនេះ។ ជាក់ស្ដែង Miss Grand Cambodia, Miss Grand Hong Kong និង Miss Grand Costa Rica ក៏បានបោះបង់សិទ្ធិដូចគ្នាដែរ៕