ឈុតប្រណិតរបស់មហាក្សត្រីអង្គចុងក្រោយរបស់បារាំងនឹងត្រូវដាក់បង្ហាញនៅសារមន្ទីរទីក្រុងឡុងដ៍

សារមន្ទីរ V&A South Kensington ឯទីក្រុងឡុងដ៍ គ្រោងនឹងរៀបចំកម្មវិធីតាំងពិព័រណ៍ Marie Antoinette Style ដោយដាក់បង្ហាញសម្លៀកបំពាក់ចំនួន ២៥០ឈុត និងគ្រឿងសិល្បៈតុបតែងដទៃទៀត របស់មហាក្សត្រីអង្គចុងក្រោយរបស់ប្រទេសបារាំង ដែលបន្សល់ទុកតាំងតែពីចុងសតវត្សរ៍ទី ១៨។

Sarah Grant អ្នកថែរក្សាការតាំងពិព័រណ៌បានប្រាប់សារព័ត៌មាន BBC ថា ការតែងខ្លួនរបស់ម្ចាស់ក្សត្រីរបស់ស្ដេច Louis ទី១៦ អង្គនេះ គឺពិតជាសំខាន់ ព្រោះនៅពេលដែលម្ចាស់ក្សត្រីនៅមានព្រះជន្មនៅឡើយ ការតែងខ្លួននេះបានជះឥទ្ធិពលមិនធម្មតាដល់រសនិយម និងហ្វេសសិននៅក្នុងទ្វីបអឺរ៉ុបទាំងមូល។

ក្រៅតែពីសម្លៀកបំពាក់ និងគ្រឿងតុបតែងខ្លួន ពិព័រណ៍ដែលត្រៀមបើកនៅក្នុងខែកញ្ញាខាងមុខ ក៏នឹងដាក់តាំងបង្ហាញនូវរបស់របរប្រើប្រាស់ពេញដោយសិល្បៈរបស់ Marie Antoinette ដែរ រួមមានឈុតទទួលអាហារពេលល្ងាច និងឈុតទឹកអប់ ដែលនឹងចូលមកបង្ហើរក្លិនសំណព្វចិត្តរបស់ម្ចាស់ក្សត្រីដើមកំណើតអូទ្រីសអង្គនេះ។

កាន់តែពិសេស Marie Antoinette Style ក៏នឹងបង្ហាញទ្រព្យសម្បត្តិរបស់ម្ចាស់ក្សត្រីដែលមិនធ្លាប់ចេញផុតពីទឹកដីប្រទេសបារាំងពីមុនមក ថែមដោយគ្រឿងបុរាណខ្លះទៀត ដែលសារមន្ទីរ V&A បានខ្ចីពីព្រះរាជវាំង Versailles ដោយផ្ទាល់តែម្ដង។

តាំងនាមជាមហាក្សត្រីកំពូលម៉ូដ អ្នករៀបចំពិព័រណ៍ខាងលើបានឱ្យដឹងទៀតថា ដ្បិតឆ្លងពេលវេលាអស់ពេលជាង ២៥០ឆ្នាំទៅហើយក្ដី សិល្បៈរបស់ Marie Antoinette នៅតែមានជីវិតមកដល់ពេលសព្វថ្ងៃនេះ មិនថាឥទ្ធិពលក្នុងវិស័យរចនាម៉ូដ ភាពយន្ត និងគ្រឿងតុបតែងនោះទេ៕