ជាម្ចាស់ផ្ទះ GUMBALL 3000 កម្ពុជានឹងបំបែកកំណត់ត្រាពិភពលោក ចតរថយន្តទំនើបៗច្រើនបំផុតមុខប្រាសាទអង្គរ

ព្រឹត្តិការណ៍ប្រមូលផ្ដុំកំពូលរថយន្តទំនើបៗលំដាប់សេដ្ឋីដ៏ល្បីល្បាញលើពិភពលោក GUMBALL 3000 នឹងធ្វើដំណើរមកកាន់ទ្វីបអាស៊ីសម្រាប់ឆ្នាំ ២០២៤នេះ ហើយអ្វីដែលកាន់តែអស្ចារ្យនោះ គឺកម្ពុជា ទទួលបានសិទ្ធិក្នុងការរៀបចំព្រឹត្តិការណ៍ដ៏ធំមួយនេះឡើង។

GUMBALL 3000 ជាព្រឹត្តិការណ៍ជួបជុំកំពូលរថយន្តទំនើបៗ នឹងធ្វើឡើងនៅប្រទេសកម្ពុជា ក្រោមការរៀបចំរបស់ក្រុមហ៊ុនដ៏ល្បីបំផុតនៅកម្ពុជា គឺជីបម៉ុង គ្រុប រួមសហការជាមួយនឹងក្រសួងទេសចរណ៍នៃប្រទេសកម្ពុជា។ កាន់តែរំភើបនោះ ព្រឹត្តិការណ៍ GUMBALL 3000 ដែលនឹងធ្វើនៅកម្ពុជាឆ្នាំនេះ គឺចំពេលគម្រប់ខួប ២៥ឆ្នាំ នៃព្រឹត្តិការណ៍នេះតែម្ដង។

ថ្លែងនៅថ្ងៃពិធីប្រកាសបើកព្រឹត្តិការណ៍នេះ លោកឧកញ៉ា លាង ពៅ (​ភីធើរ) ជាសមាជិកក្រុមប្រឹក្សាភិបាល នៃក្រុមហ៊ុនជីបម៉ុង គ្រុប បានថ្លែងឱ្យដឹងថា ព្រឹត្តិការណ៍ GUMBALL 3000 ធ្វើឡើងនៅកម្ពុជាឆ្នាំនេះ នឹងធ្វើឡើងក្នុងគោលដៅធំៗ ចំនួន ៤គឺ យុទ្ធនាការផ្សព្វផ្សាយវិស័យទេសចរណ៍នៅកម្ពុជា យុទ្ធនាការសប្បុរសធម៍រៃអង្គាសថវិកាជួយដល់មន្ទីរពេទ្យកុមារនៅសៀមរាប ទី៣ ការបើកឱកាសរវាងអ្នកវិនិយោគទុនឯកជនបរទេស និងនៅក្នុងស្រុកបានជួបគ្នា និងកាន់តែពិសេសនោះ គឺការបង្កើតកំណត់ត្រាពិភពលោកហ្គីណេស ដោយចតរថយន្តទំនើបៗច្រើនបំផុត នៅតំបន់បេតិកភណ្ឌ គឺនៅមុខប្រាសាទអង្គរ។

បន្ថែមលើពីនេះទៀត ឯកឧត្ដម គុជ បញ្ញាសា រដ្ឋលេខាធិការនៃក្រសួងទេសចរណ៍ ក៏បានឱ្យដឹងទៀតថា ព្រឹត្តិការណ៍ GUMBALL 3000 មិនមែនគ្រាន់តែជាកម្មវិធីប្រមូលផ្ដុំរថយន្តទំនើបៗនោះទេ តែនេះជាឱកាសដើម្បីផ្សព្វផ្សាយពីសក្ដានុពលកម្ពុជាទៅកាន់ពិភពលោក នេះជាផលិតផលទេសចរណ៍ថ្មីមួយទៀត ដើម្បីផ្សព្វផ្សាយ ជំរុញវិស័យទេសចរណ៍។ នេះជាឱកាសដ៏កម្រមួយ ដែលកម្ពុជា អាចផ្សព្វផ្សាយពីសក្ដានុពលរបស់ខ្លួន តាមរយៈព្រឹត្តិការណ៍អន្តរជាតិមួយនេះ ដូចជាសិល្បករល្បីៗ ដែលជិះរថយន្តទំនើបៗ ទៅចត ទៅថតនៅមុខប្រាសាទអង្គរជាដើម។

គួរឱ្យដឹងថា GUMBALL 3000  ត្រូវបានបង្កើតឡើងក្នុងឆ្នាំ ១៩៩៩ ដោយសហគ្រិនជនជាតិអង់គ្លេស Maximillion Cooper។ Gumball 3000 គឺជាការប្រមូលផ្តុំរថយន្តដ៏ធំ ដែលបាននាំយករថយន្តទំនើបៗ និងមានអ្នកចូលរួមរាប់ពាន់គ្រឿងក្នុងដំណើរដ៏វិសេសវិសាលជុំវិញពិភពលោក ដោយចុះទៅដល់គ្រប់ទ្វីបដើម្បីបង្កើតបទពិសោធន៍ ដ៏អស្ចារ្យបំផុតមួយ៕