មកស្គាល់សមាជិកក្រុម Hearts2Hearts ក្រុមខេប៉ុបនារីថ្មី ត្រៀមបញ្ចេញស្នាដៃ នៅថ្ងៃទី២៤ ខាងមុខនេះ

Hearts2Hearts ឬ H2H ជាក្រុមចម្រៀងខេប៉ុបនារីថ្មី ពីផលិតកម្ម SM Entertainment ដែលកំពុងតែត្រៀមបញ្ចេញស្នាដៃទី១ ជាផ្លូវការ ក្រោមចំណងជើងថា «The Chase» នៅថ្ងៃទី២៤ ខែកុម្ភៈខាងមុននេះ។ ដោយក្រុម​ចម្រៀង​មានសមាជិក ៨នាក់មួយនេះ ជាក្រុមចម្រៀងនារីទី១ ហើយ ដែល SM បានបញ្ចេញក្នុងរយៈពេល ៤ឆ្នាំចុងក្រោយ ចាប់តាំងពីក្រុមចម្រៀង aespa debut។

អំឡុងពេលរង់ចាំស្ដាប់សំនៀងរបស់សមាជិកក្រុមម្នាក់ៗ ថ្ងៃនេះ AMS សុំមកណែនាំពីជីវប្រវត្តិត្រួសរបស់សមាជិកទាំង ៨រូបជូនប្រិយមិត្តជាមុនសិន៖

CARMEN

ផ្ដើមដោយសមាជិកដែលមានអាយុច្រើនជាងគេប្រចាំក្រុម Nyoman Ayu Carmenita ដែលទស្សនិកជនទូទៅស្គាល់ថា Carmen បានកើតនៅថ្ងៃទី២៨ ខែមីនា ឆ្នាំ២០០៦ ឯកោះបាលី ប្រទេសឥណ្ឌូនេស៊ី។

វត្តមានរបស់ Carmen នៅក្នុងវិស័យកម្សាន្តរបស់កូរ៉េខាងត្បូង គឺជាវត្តមានបែបប្រវត្តិសាស្ត្រ ព្រោះតារាស្រីវ័យ ១៩ឆ្នាំរូបនេះ គឺជាជនជាតិឥណ្ឌូនេស៊ីទី ១ ដែលបានក្លាយជាតារាខេប៉ុបក្រោមផលិតកម្ម SM។ នៅពេលដែលបង្ហាញសមត្ថភាពជាលើកដំបូង នាងបានជ្រើសរើសច្រៀងបទ Best Part មុននឹងគណៈកម្មការសម្រេចជ្រើសរើសធ្វើជាតារាហ្វឹកហាត់នៅក្នុងឆ្នាំ ២០២២។ ក្រៅពីច្រៀង និងរាំ Carmen ក៏មានសមត្ថភាពក្នុងការលេងព្យាណូផងដែរ។

JIWOO

បន្តដោយមេក្រុម H2H, Choi Jiwoo មានដើមកំណើតក្នុងទីក្រុងសេអ៊ូល ប្រទេសកូរ៉េខាងត្បូង កាលពីថ្ងៃទី ៧ ខែកញ្ញា ឆ្នាំ ២០០៦។ មានឈ្មោះហៅក្រៅថា Mychuu តារាស្រីរូបនេះក៏ជាអតីតអ្នករបាំបាឡេមួយរូបដែរ។

Choi Jiwoo ទទួលបានឱកាសបានចូលប្រឡូកជាតារាខេប៉ុបតាំងតែពីរៀនថ្នាក់ទី ៦ ដោយពេលនោះផលិតកម្ម SM បានប្រទះឃើញនាងនៅឯហាងលក់ទំនិញមួយកន្លែងដោយចៃដន្យ។ នៅពេលដែលបង្ហាញសមត្ថភាពរបស់ខ្លួន Choi Jiwoo បានច្រៀងបទ ភ្លេងជាតិរបស់កូរ៉េខាងត្បូង ទៅកាន់គណៈកម្មការ។  

YUHA

Yuha ឬមានឈ្មោះពេញថា Yu Ha-ram បានកើតនៅថ្ងៃទី១២ ខែមេសា ឆ្នាំ២០០៧ ក្នុងខេត្ត Gangwon-do ប្រទេសកូរ៉េខាងត្បូង។ តារាស្រីដែលមានឈ្មោះហៅក្រៅថា First Love Girl រូបនេះ ក៏ជាសមាជិកមួយរូបទៀតដែលចេះលេងព្យាណូផងដែរ។

ដំណើរដើមទងនៃការចូលហ្វឹកហាត់ជាតារាខេប៉ុបរបស់ Yuha បានចាប់ផ្ដើមនៅពេលដែលបុគ្គលិករបស់ SM ម្នាក់ បានប្រទះឃើញនាងនៅពីមុខសាលាតែម្ដង ហើយនៅពេល​បង្ហាញសមត្ថភាព នាងបានជ្រើសរើសច្រៀងបទ Love is an Open Door ពីរឿង Frozen។

STELLA

Kim Da-hyun ឬ STELLA ដើមកំណើតជាជនជាតិកូរ៉េកាត់កាណដា និងបានកើតនៅក្នុងប្រទេសកាណាដា កាលពីថ្ងៃទី១៨ ខែមិថុនា ឆ្នាំ២០០៧។ មានឈ្មោះហៅក្រៅថា Pink Princess តារាស្រីរូបនេះមានទេពកោសល្យក្នុងវិស័យសិល្បៈតាំង​តែ​ពីក្មេង ដោយនាងអាចលេងឧបករណ៍តន្រ្តីជាច្រើន រួមមានហ្គីតា ហ្គីតាបាស និងស្គរ ហើយថែមទាំងមានតួនាទីជាសមាជិកក្រុម Jazz របស់សាលាទៀតផង។

បន្ថែមពីវិស័យតន្ត្រី STELLA ក៏ចូលចិត្តលេងកីឡាផងដែរ ដោយនាងជាសមាជិកម្នាក់របស់ក្លិបជិះស្គីទឹកកក។ នៅពេលតេស្តសមត្ថភាពដើម្បីប្រកួតចូលជាតារាហ្វឹកហាត់ STELLA បានច្រៀងបទ Like A Dream។

JUUN

Juun ឬមានឈ្មោះពេញថា Kim Joo-eun  បានកើតនៅថ្ងៃទី៣ ខែធ្នូ ឆ្នាំ២០០៨ ក្នុងខេត្ត Gyeonggi-do ប្រទេសកូរ៉េខាងត្បូង។ តារាស្រីរូបនេះមានឈ្មោះហៅក្រៅថា Jamkuromi ឬ Sleepy Kurmi និងបានចូលហ្វឹកហាត់នៅក្រោម ​SM អស់ពេលប្រមាណ ៤ឆ្នាំ ក្រោយពីបានបញ្ចេញសមត្ថភាពតាមរយៈចម្រៀងបទ Holo របស់​តារា​ចម្រៀង LEE HI។

A-NA

Noh Yu-na ឬមានឈ្មោះក្នុងវិស័យសិល្បៈថា A-na ជាតារា​កើតនៅថ្ងៃទី២០ ខែធ្នូ ឆ្នាំ២០០៨ ដែលមកពីខេត្ត Gyeonggi-do។ ឈ្មោះថា A-na នេះ មានបង្កប់អត្ថន័យថា I am an A in everything ឬប្រែថា ខ្ញុំគឺជាមនុស្សកម្រិត A នៅគ្រប់ផ្នែកទាំងអស់។

ដូចគ្នានឹង Choi Jiwoo ដែរ Noh Yu-na បានច្រៀងបទ ចម្រៀងជាតិនៅពេលបង្ហាញសមត្ថភាពទៅកាន់គណៈកម្មការ។ បន្ថែមពីងារជាសមាជិក Hearts2Heats កាលពីពេលថ្មីៗនេះ A-na ក៏បានទទួលតំណែងជាពិធីការនីរបស់កម្មវិធី Show! Music Core ផងដែរ។

IAN

ធ្លាប់ប្រឡូកការងារក្នុងវិស័យដើរម៉ូដតាំងតែពីក្មេង Ian ឬ Jeong Lee-an បានចូលហ្វឹកហាត់នៅក្នុងផលិត SM បានប្រមាណ ៣ ទៅ៤ឆ្នាំ រួចហើយ ថែមទាំងបានលេចវត្តមាននៅក្នុង​វីដេអូ​គម្រប់​ខួប​ ៣០ ​ឆ្នាំ​របស់ SM Entertainment “The Future” ទៀតផង។ Ian បានកើតនៅក្នុងទីក្រុងសេអ៊ូល កាលពីថ្ងៃទី៩ ខែតុលា ឆ្នាំ២០០៩ ដោយនាងបានច្រៀងបទ Let It Go ពីរឿង Frozen នៅក្នុងវគ្គជម្រុះ។

YE-ON

បញ្ចប់ដោយសមាជិកដែលមានវ័យក្មេងជាងគេ Ye-On តារាស្រីដែលមានឈ្មោះពេញថា Kim Na-yeon រូបនេះ បានកើតនៅថ្ងៃទី១៩ ខែមេសា ឆ្នាំ២០១០ ក្នុងខេត្ត Gyeongsangnam-do ប្រទេសកូរ៉េខាងត្បូង។ តារាស្រីវ័យត្រឹម ១៤ឆ្នាំរូបនេះ បានចូលធ្វើជាតារាហ្វឹកហាត់តាំងតែពីរៀនថ្នាក់ទី៦ ដោយបានច្រៀងជាង Price Tag នៅក្នុងវគ្គចម្រុះ។ បន្ទាប់ពីចំណាយពេលហ្វឹកហាត់អស់ប្រមាណ ២ឆ្នាំ នៅទីបំផុត Ye-On បានក្លាយជាសមាជិកពៅគេ ប្រចាំក្រុមHearts2Hearts៕