សមត្ថភាពពេញខ្លួន! មិនពូកែតែសិល្បៈ តែតារាកូរ៉េ ៥ រូបនេះ ក៏ធ្លាប់ជាអ្នកកីឡាដ៏ឆ្នើមដែរ

តារាកូរ៉េទាំង ៥ដួងខាងក្រោមនេះ មិនត្រឹមតែមានសមត្ថភាពក្នុងរង្វង់សិល្បៈគួរឱ្យសសើរប៉ុណ្ណោះទេ តែពួកគេក៏មានសមត្ថភាពក្នុងការលេងកីឡាផ្សេងៗគ្នា ដែលនឹកស្មានមិនដល់ផងដែរ។ 

១.Jackson Wang 

បុរសកំពូលជំនាញសមាជិកនៃ GOT 7 ដែលអ្នកគាំទ្រតែងស្គាល់ក្នុងនាមជា អ្នកចម្រៀង rapper អ្នកតែងចម្រៀង និងអ្នកច្នៃម៉ូដសម្លៀកបំពាក់ តែប្រហែលមិនសូវមានអ្នកដឹងថា Jackson Wang ធ្លាប់ប្រឡូកក្នុងវិស័យកីឡានោះទេ។

មិនត្រឹមតែធំធាត់ក្នុងគ្រួសារដែលមានឳពុកម្ដាយជា អត្តពលិកនោះទេ Jackson Wang ក៏ជាអ្នកកីឡាគុនដាវ Sabre Fencer លំដាប់អូឡាំពិកផងដែរ។ ក្នុងនាមជាអ្នកកីឡាជម្រើសជាតិរបស់ហុងកុង លោកធ្លាប់បានទទួលជ័យជម្នះនិងនាំយកពានរង្វាន់មកឱ្យក្រុមជាច្រើនដង រួមទាំងចំណាត់ថ្នាក់លេខ ១ នៅ Asian Junior and Cadet Fencing Championship ឆ្នាំ ២០១១ផងដែរ។ លោកក៏ធ្លាប់បានចូលរួមប្រកួតកីឡាអូឡាំពិកយុវជន និងទទួលបានអាហារូបករណ៍នៅសាកលវិទ្យាល័យ Stanford សម្រាប់កីឡា Fencing ប៉ុន្តែ Jackson Wang បែរជាបដិសេធនឹងឱកាសមួយនេះ ដើម្បីបន្តអាជីព K-popរបស់លោក។ ជាការសម្រេចចិត្តដ៏ត្រឹមត្រូវមួយ ព្រោះពេលនេះ Jackson Wong បានក្លាយជាសិល្បករលំដាប់ពិភពលោកមួយរូប ដូចដែលយើងស្គាល់សព្វថ្ងៃនេះ។

២. Lee Si-young 

សម្រាប់អ្នកដែលធ្លាប់ទស្សនាភាពយន្តភាគរឿង Boys Over Flower របស់កូរ៉េខាងត្បូងប្រហែលជាធ្លាប់ស្គាល់ តារាសម្ដែង Lee Si-young រួចមកហើយ។ ក្រៅពីការងារសម្ដែង តារាស្រីរូបនេះក៏ជាអ្នកប្រដាល់ម្នាក់ដែរ ដោយ Lee Si-young បានចាប់អាម្មណ៍កីឡាប្រភេទនេះនៅពេលដែលនាងហាត់ប្រដាល់ ត្រៀមសម្រាប់ការដើរតួជា អ្នកប្រដាល់ស្រី នៅក្នុងរឿងភាគមួយ។ 

ពីការហាត់សមសម្រាប់សម្ដែង Lee Si-young បែរជាសម្រេចចិត្តថានឹងតាំងចិត្តហាត់ជាអាជីព និងបានចូលរួមក្នុងការប្រកួតជាច្រើន។ មិនគួរឱ្យជឿ តារាស្រីរូបនេះធ្លាប់បានទទួលជ័យជម្នះជើងឯកថ្នាក់ជាតិក្នុងការប្រកួតកីឡាប្រដាល់នារីលើកទី៧ កាលពីឆ្នាំ២០១០ ជាមួយជ័យជម្នះជាច្រើនទៀត ក្នុងកម្រិត ៤៨គីឡូ និង ៥០គីឡូ ក្នុងកម្មវិធីប្រដាល់អត្តពលកម្មជម្រើសជាតិ KBI លើកទី១០។ ជាមួយនឹងតួនាទីនេះ Lee Si-young ក្លាយជាតារាល្បីដំបូងបង្អស់របស់កូរ៉េខាងត្បូងដែលបានក្លាយអត្តពលិកជម្រើសជាតិ ក្រោយពីប្រឡូកក្នុងវិស័យសិល្បៈ។ ជារឿងដែលគួរឱ្យសោកស្ដាយ តែអាចយល់បាន តារាសម្ដែងរូបនេះបានសម្រេចចិត្តប្រកាសចូលនិវត្តពីកីឡានៅក្នុងខែកញ្ញា ឆ្នាំ២០១៥  ដោយសារតែការរបួសដែលកើតឡើងចំពោះនាង។ 

៣. Choi Min-ho

ដោយមានឈាមជ័រជាកូនប្រុសរបស់គ្រូបង្វឹកបាល់ទាត់ល្បីឈ្មោះ Choi Yun-Kyum សមាជិកក្រុម K-pop Shinee រូបនេះក៏ទទួលបានដុងនេះពីឳពុកខ្លួនដែរ ដោយលោកធ្លាប់បានទទួលការសរសើរពីអតីតកីឡាករបាល់ទាត់ជម្រើសជាតិ លោក Lee Yong-pro ក្រោយពីបង្ហាញសមត្ថភាពបាល់ទាល់របស់ខ្លួនក្នុងកម្មវិធី Our Town’s Physical Variety។ ភស្តុតាងដ៏សំខាន់ ដែលបញ្ជាក់ថា Choi Min-ho មានសមត្ថភាពមិនចាញ់ឳពុកខ្លួននោះគឺ លោកធ្លាប់បានដឹកនាំក្រុមរហូតទទួលបានជោគជ័យនៅក្នុងកម្មវិធី Idol Futsal World Cup Competition។ 

ក្នុងនាមជាអ្នកគាំទ្រកីឡាម្នាក់ Choi Min-ho ធ្លាប់មានគោលបំណងចង់ក្លាយជាកីឡាករបាត់ទាល់អាជីព តែត្រូវបានឳពុករបស់ខ្លួនហាមឃាត់។ មិនថ្វីទេ ព្រោះបន្ទាប់ពីនេះលោកក៏បានក្លាយជាតារា K-pop ដ៏ល្បីម្នាក់ប្រចាំក្រុម Shinee និងបានបញ្ចប់ការសិក្សាលើជំនាញ សិល្បៈ និងវប្បធម៌នៃភាពយន្ត ពីសាកលវិទ្យាល័យ KonKuk។ 

៤. So Ji-sub

So Ji-sub ដែលជាតារាសម្ដែងក្នុងរឿង Doctor Lawyer ក៏ធ្លាប់ជាកីឡាករហែលទឹកអាជីពផងដែរ។ តាំងពីកុមារភាពមក លោកបានចូលប្រឡូកក្នុងអាជីពជាកីឡាករហែលទឹក និងបាល់បោះក្នុងទឹក (polo water) ព្រមទាំងធ្លាប់ហ្វឹកហាត់ជាមួយក្រុមហែលទឹកជម្រើសជាតិកូរ៉េទៀតផង។ ក្នុងអំឡុងពេល ១១ឆ្នាំដែលលោកបានហ្វឹកហាត់ លោកក៏ធ្លាប់បានឈ្នះមេដាយសំរឹទ្ធពីការប្រកួតកីឡាជាតិកូរ៉េផងដែរ។

ការ​ចូល​ប្រឡូក​ក្នុង​វិស័យ​កម្សាន្តរបស់លោកបានកើតឡើង​ដោយ​ចៃដន្យ ដោយកាលនោះលោកបាន​ចាប់​ផ្ដើម​ធ្វើ​ជា​តារា​ម៉ូដែលដើម្បីរកប្រាក់ចំណូលទៅបំពេញបំណងរបស់ខ្លួនក្នុងការក្លាយជាកីឡាករហែលទឹក។ លោកមិនដែលគិតស្រមៃសោះឡើយ ថានឹងក្លាយជាតារាល្បី។ តែចុងក្រោយ លោកក៏សម្រេចចិត្តបោះបង់អាជីពអ្នកហែលទឹកចោលដើម្បីបន្តអាជីពជាអ្នកសម្ដែងវិញ ក្រោយពីទទួលបានឱកាសសម្ដែងជាតួអង្គឯកនៅក្នុងរឿង Thousand Years of Love កាលពីឆ្នាំ២០០៣។ 

៥. Yoon Hyun-min 

មុននឹងក្លាយជាតួអង្គសម្ដែងក្នុងរឿងល្បីៗ ដូចជារឿង “My Daughter” Yoon Hyun-min ធ្លាប់ជាអ្នកកីឡាបេស្ស៍ប៊លអាជីពពីមុនមក។ អាជីពជាអត្តពលិករបស់លោកបានចាប់ផ្តើមតាំងពីវិទ្យាល័យម៉្លេះ និងបន្តរហូតបានក្លាយជាសមាជិកក្រុមល្បីៗ២ ប្រចាំប្រទេសកូរ៉េខាងត្បូង។

បន្ទាប់​ពី​លេង​កីឡាបេស្ស៍ប៊ល​អស់​ជា​ច្រើន​ឆ្នាំ​មក លោកក៏ស្រាប់តែធ្លាក់អន្លង់ស្នេហ៍ក្នុងជីវិតជាតារា ក្រោយពីលោកបានមើលរឿង Finding Kim Jong-wook។ ក្នុងឆ្នាំ ២០០៧ លោកបានសម្រេចចិត្តបញ្ចប់អាជីពកីឡាកររបស់ខ្លួន ដើម្បីចាប់ផ្ដើមអាជីពជាអ្នកសម្ដែងតាមរយៈល្ខោនតន្ដ្រីមួយដែលមានចំណងជើងថា Spring Awakening។ ចាប់តាំងពីពេលនោះមក Yoon Hyun-min ក៏ចាប់ផ្ដើមរុងរឿងក្នុងអាជីពថ្មី ដោយបានសម្ដែងក្នុងរឿងភាគល្បីៗជាច្រើន ដូចជា Witch at Court និង My Holo Love ជាដើម ៕