ពីរឿងរ៉ាវស្នេហាក្មេងស្រី ១៧ ឆ្នាំ ​ឈានដល់ការប្រគំតន្ត្រីជុំវិញពិភពលោករបស់ Olivia Rodrigo 

តារាចម្រៀងសញ្ជាតិអាមេរិក​កាំងដ៏​ស្រស់​ស្អាត Olivia Rodrigo ទទួលបានជោគជ័យក្នុងវិស័យចម្រៀង ជាមួយនឹងអត្ថន័យដ៏ស៊ីជម្រៅរបស់អាល់ប៊ុមទាំង ២។

ត្រឡប់ទៅកាលពីខែមករា ឆ្នាំ២០២១ នេះប្រហែលជាថ្ងៃដំបូងដែលអ្នកនិយមស្ដាប់ចម្រៀងអង់គ្លេសជាច្រើនរូប​​​ ចាប់ផ្ដើមស្គាល់តារាចម្រៀងស្រីថ្មី​​ Olivia Rodrigo ជាលើកដំបូងតាមរយៈបទ ​​ Drivers License។​​ បទចម្រៀងដែលទទួលបានការចូលទស្សនារហូតដល់ទៅ​​ ៥៤៦ លានដងមួយនេះ​ បាននាំយកប្រជាប្រិយភាពមហាសាលមកឱ្យសិល្បករថ្មីថ្មោង​​ក្នុងពេលត្រឹម ១ យប់​ ដោយគ្រានោះបទ​ Drivers License​ បានជាប់ចំណាត់ថ្នាក់នៅលើវេទិកាជាច្រើនយ៉ាងឆាប់រហ័ស។​

រំលងមកមិនប៉ុន្មាន​ខែ ពោលគឺនៅក្នុងខែឧសភា អតីតតារាសម្ដែងរបស់​​ Disney រូបនេះបានបញ្ចេញអាល់ប៊ុម SOUR ដែលជា​អាល់ប៊ុមចម្រៀងដំបូងបង្អស់របស់នាង​​ នៅក្នុងវ័យត្រឹម ១៨ ឆ្នាំតែប៉ុណ្ណោះ។​​ តាមរយៈបទចម្រៀងរៀបរាប់ពីបទពិសោធន៍ស្នេហា​តែងឡើងនៅក្នុងបន្ទប់គេង​ Olivia Rodrigo បានដណ្ដើមយកពានរង្វាន់រហូតដល់ទៅ ៣ ពី​ Grammy Award​ រួមមាន Best Pop Solo Performance, Best New Artist​ និង Best Pop Vocal Album។​ 

តាមរយៈនេះ ពិភពលោកបានបែរចំណាប់អារម្មណ៍មកកាន់តារាចម្រៀងទើបតែរះរូបនេះ​ ដោយហេតុថាស្នាដៃដំបូងរបស់នាងហាក់ទទួលបានជោគជ័យលើសពីការរំពឹងទុក​ រហូតដល់ Olivia ​អាចធ្វើកម្មវិធីប្រគំតន្ត្រីជុំវិញពិភពលោក “SOUR World Tour” និងលក់សំបុត្រអស់ក្នុងរយៈពេលដ៏ខ្លី។ ភាពជោគជ័យនេះនៅតែបន្តសម្រាប់អាល់ប៊ុមទី២​ “GUTS” ដោយការប្រគំតន្ត្រី​ “GUTS World Tour”​ នៅតែមានអ្នកគាំទ្រតាម​​ទិញសំបុត្រ បើទោះបីជាបានបន្ថែមចំនួនការសម្ដែងហើយក៏ដោយ។ 

SOUR

ចាប់ផ្ដើមនិពន្ធនៅអាយុ ១៧ ឆ្នាំ​ SOUR ជាអាល់ប៊ុមចម្រៀងដែលបានបម្លែងភាពឈឺចាប់នៃជីវិតស្នេហាលើកដំបូងរបស់ Olivia Rodrigo។ អ្វីដែលធ្វើឱ្យនាងមានមោទកភាពបំផុតសម្រាប់ឈុត​ក្នុង​បទ​ចម្រៀងនោះ គឺសមត្ថភាពដែលនាងអាចសម្ដែង​ចេញពីអារម្មណ៍ដែលមិនងាយនឹងបង្ហាញចេញមក ហើយសង្គមតែងគិតថាវារឿងអាក្រក់ ដូចជាការបង្ហាញ​អារម្មណ៍ខឹងសម្បា ច្រណែន និងអន់ចិត្តជាដើម។ ក៏ប៉ុន្តែសម្រាប់តារាចម្រៀងរូបនេះវិញ នាងមានទស្សនៈថា វាគ្រាន់តែជាអារម្មណ៍ធម្មតាមួយដែលអាចកើតឡើងចំពោះមនុស្សគ្រប់គ្នា។ 

SOUR ជាតំណាងនៃអារម្មណ៍ជូរចត់ដែលកើតឡើងនៅក្នុងទំនាក់ទំនង​ អារម្មណ៍ដែលក្មេងស្រីម្នាក់មិនអាចប្រាប់នរណាបាន និងជីវិតដែលចាប់ផ្ដើមប្រែប្រួលនៅពេលដឹងក្ដី។ ជារួម អាល់ប៊ុមចម្រៀងមួយនេះ​ គឺជារឿងរ៉ាវផ្ទាល់ខ្លួនដែលបានកើតឡើងចំពោះក្មេងស្រីអាយុ ១៧ ឆ្នាំម្នាក់ ដោយមានទាំងការឈឺចាប់ និងការរកឃើញអ្វីថ្មីៗ នោះ​គឺ Olivia Rodrigo។ 

GUTS 

អាល់ប៊ុមដែលបានចេញផ្សាយកាលពីខែកញ្ញា ឆ្នាំ ២០២៣ មួយនេះ​ ជាអាល់ប៊ុមទី ២ របស់​ Olivia។​ តួអង្គនៅក្នុងភាពយន្តតន្រ្តី​ «High School Musical: The Musical: The Series»​​ រូបនេះ បានរៀបរាប់ថា GUTS ជាពាក្យដែលនាងបានគិតដល់ជាយូរណាស់មកហើយ ពោលគឺតាំងតែពីពេលដែលនាងធ្វើអាល់ប៊ុមទី ១មកម៉្លេះ។ 

តាមរយៈបទសម្ភាសន៍ជាមួយនឹង Apple Music នាងគិតថា Guts ជាពាក្យដែលគួរឱ្យចាប់អារម្មណ៍មួយ ​ដោយសារតែលក្ខណៈពិសេសនៃពាក្យនេះ។​ ពាក្យថា Guts មួយម៉ាត់តែងប្រែប្រួលអត្ថន័យរបស់ខ្លួនទៅតាមបរិបទ​ពេល​ប្រើប្រាស់ពាក្យនេះ។ ជាក់ស្ដែង Olivia ពន្យល់ថា៖ “ខ្ញុំគ្រាន់តែគិតថា វាជាពាក្យដែលគួរឱ្យចាប់អារម្មណ៍។ មនុស្សប្រើវានៅក្នុងបរិបទប្លែកៗជាច្រើនដូចជា Spill your guts​ (ប្រាប់ពីរឿងរឿងរ៉ាវរបស់អ្នកឱ្យអស់មក) ឬ Hate your guts​ (ស្អប់អ្នកជាទីបំផុត)។ ពេលខ្លះវាមានន័យថាភាពក្លាហាន ប៉ុន្តែពេលខ្លះវាក៏មានន័យ​​អ្វី​ផ្សេង ឬ​ដូចជាឃ្លា listen to your gut (ជឿទៅលើការយល់ឃើញដំបូងរបស់អ្នក)ជាដើម។ ទាំងនេះ ​ជា​អ្វីដែលខ្ញុំនឹកឃើញដោយ​ចៃដន្យនៅពេល​នោះ”។

មិនត្រឹមតែពីរោះ តែបទចម្រៀងទាំង ២ អាល់ប៊ុម របស់តារាស្រីវ័យ ២១ ឆ្នាំរូបនេះ​ ពេញប្រៀបទៅដោយអត្ថន័យស៊ីជម្រៅដែលអ្នកគាំទ្រអាចនឹងមិនដឹងពីប្រវត្តិរបស់វា តែប្រាកដជាទទួលបានអារម្មណ៍ដែលសិល្បកររូបនេះចង់បង្ហាញជាក់ជាមិនខាន។ បន្ថែមពីនេះទៀត សមត្ថភាពដែល​ Olivia Rodrigo​ មាន​ បាននាំយកតារាស្រីរូបនេះឱ្យក្លាយជាតារាជួរមុខរបស់ពិភពលោកដោយមិនអាចប្រកែកបាន បើទោះបីជានាងទើបតែចាប់ផ្ដើមអាជីពនេះត្រឹមពេលមិនប៉ុន្មានឆ្នាំក៏ពិតមែន៕