តារាពីប្រទេសផ្សេងៗនិយាយអ្វីខ្លះពីកម្ពុជាក្រោយបានចូលរួមកម្មវិធី BVLGARI?

ព្រឹត្តិការណ៍បង្ហាញម៉ូដរបស់ម៉ាកគ្រឿងអលង្ការប្រណិត BVGARI បានបញ្ចប់ទៅ​យ៉ាងជោគជ័យ បន្សល់ទុកនូវរូបភាពដ៏ស្រស់ស្អាតនិងអស្ចារ្យជាច្រើនពីប្រាសាទបុរាណខ្មែរ ជាពិសេសប្រាសាទបាយ័នលេចត្រដែតពាសពេញបណ្ដាញសារព័ត៌មាន និងគណនីបណ្ដាញសង្គមរបស់ភ្ញៀវកិត្តិយសល្បីៗដែលបានចូលរួមកម្មវិធីនេះ។

ជាក់ស្ដែង ក្រោយពីបានចូលរួមកម្មវិធីនៅខេត្តសៀមរាបកាលពីថ្ងៃទី២១ ខែកុម្ភៈ បណ្ដាសិល្បករអន្តរជាតិដែលជា Friend of House នៃម៉ាកគ្រឿងអលង្ការ BVLGARI ក៏បានបង្ហោះរូបភាពនិងវីដេអូជាបន្តបន្ទាប់ភ្ជាប់ជាមួយអារម្មណ៍ចំពោះប្រទេសកម្ពុជាដូចជា៖

១. Pia Wurtzbach

តារាសម្ដែងហ្វីលីពីននិងជាម្ចាស់មកុដ Miss Universe ឆ្នាំ២០១៥ Pia Wurtzbach បានបង្ហោះសារលើ Facebook និង Instagram របស់នាងថា៖ រយៈពេលប៉ុន្មាន​ថ្ងៃ​មុន​នៅ​សៀមរាប​គឺប្រៀប​ដូចជា​សុបិន។ បានជួបមនុស្សដែលធ្លាប់ស្គាល់ ទទួលទានអាហារក្រោមពន្លឺផ្កាយ គ្រប់យ៉ាងគឺដូចជានៅថ្មីៗ។ ភាពប្រណិតរបស់ Bvlgari និងសម្រស់របស់ខេត្តសៀមរាបពិត​ជាធ្វើឱ្យកម្មវិធីនេះក្លាយជាបទពិសោធន៍មិនអាចបំភ្លេចបាន”។

២. Ho Ngoc Ha

តារាចម្រៀងនិងម៉ូដែលវៀតណាម Ho Ngoc Ha បានរៀបរាប់ប្រាប់អ្នកតាមដានជាង ៣,៥ លាននាក់របស់ខ្លួនលើ Instagram ថា៖ ពិតជាកិត្តិយសណាស់សម្រាប់ខ្ញុំដែលបានក្លាយជាផ្នែកមួយនៃព្រឹត្តិការណ៍សកលរបស់ Bvlgari ហើយខ្ញុំពិតជាស្ញប់ស្ញែងនឹងការយកចិត្តទុកដាក់យ៉ាងម៉ត់ចត់ចំពោះគ្រប់យ៉ាងចាប់ពីខ្លឹមសារ និងបដិសណ្ឋារកិច្ចរហូតដល់ម្ហូបអាហារនិងស្រាដ៏ប្រណិត។ លើកនេះរឹតតែពិសេស ពោលនេះគឺលើកទីមួយរបស់ខ្ញុំ ដែលបានចូលរួមព្រឹត្តិការណ៍នៅប្រាសាទបាយ័ន ក្នុងខេត្តសៀមរាប ជាកន្លែងដ៏ពិសិដ្ឋ ពោរពេញដោយប្រវត្តិសាស្ត្រ និងភាពអស្ចារ្យ។ កម្មវិធីរាត្រីនោះពិតជាពោរពេញដោយភាពភ្ញាក់ផ្អើល រួមទាំងការសម្ដែង Show Drone ដ៏អស្ចារ្យគូរលើផ្ទៃមេឃកម្ពុជា និងភាពរីករាយនៃការភ្ជាប់ទំនាក់ទំនងជាមួយ KOLs និងសមាជិកគ្រួសារ Bvlgari ។

៣. Tóc Tiên

តារាចម្រៀងវៀតណាមមួយរូបទៀតគឺ Tóc Tiên ដែលមានអ្នកតាមដានលើ​ IG ជាង ៣លាននាក់ដែរបានសរសេរថា៖ សូមបង្ហាញការដឹងគុណដ៏ស្មោះស្ម័គ្រចំពោះបទពិសោធន៍ដ៏អស្ចារ្យនៅក្នុងព្រឹត្តិការណ៍ Bulgari ដែលប្រារព្ធឡើងនៅប្រាសាទបាយ័នដ៏អស្ចារ្យក្នុងខេត្តសៀមរាប។ ចាប់តាំងខ្ញុំមកដល់រហូតដល់ចាកចេញ ខ្ញុំពិតជាទទួលបានអារម្មណ៍ជាមួយភាពប្រណីតមិនអាចប្រៀបផ្ទឹមបាន។ ខ្ញុំមានកិត្តិយសជាខ្លាំងដែលឱកាសបានបង្ហាញ Collection Aeterna ដ៏អស្ចារ្យ ជាមួយបេតិកភណ្ឌវប្បធម៌ដ៏សម្បូរបែបនៃទឹកដីអង្គរដ៏ពិសិដ្ឋ។ សូមថ្លែងអំណរគុណយ៉ាងជ្រាលជ្រៅចំពោះអ្នកទាំងអស់គ្នាដែលចូលរួមក្នុងការធ្វើឱ្យព្រឹត្តិការណ៍នេះពិតជាគួរឱ្យកត់សម្គាល់ និងមិនអាចបំភ្លេចបាន។

៤. Ayden Sng

តារាសម្ដែងប្រុសសិង្ហបុរី Ayden Sng វិញបានសរសេររៀបរាប់ថា៖ “កម្ពុជា​អ្នក​អស្ចារ្យ​ណាស់!សៀមរាប អ្នកពិតជាអស្ចារ្យមែន! ប្រាសាទបាយ័ន អ្នកពិតជាពិសិដ្ឋ និងអស្ចារ្យណាស់។ អរគុណ @Bvlgari សម្រាប់កម្មវិធីដ៏អស្ចារ្យនេះ។ នេះជាបទពិសោធន៍ដ៏មានតម្លៃមួយក្នុងជីវិត ទស្សនាការបង្ហាញម៉ូដ #BvlgariAeterna ទទួលទានអាហារដោយមានទិដ្ឋភាពប្រាសាទបាយ័នខាងក្រោយ ពិតជារាត្រីដ៏អស្ចារ្យហួសពីការស្មានរបស់ខ្ញុំ។ អរគុណរដ្ឋាភិបាលកម្ពុជា និង @Bvlgari ដែលធ្វើឱ្យព្រឹត្តិការណ៍នេះកើតឡើង”។

៥. Xenia Tan

តារាសម្ដែងស្រីសិង្ហបុរី Xenia Tan បាននិយាយថា៖ “ឈរនៅប្រាសាទបាយ័ន ដែលបង្កប់ដោយប្រវត្តិសាស្ត្ររាប់សតវត្ស ខ្ញុំពិតមានអារម្មណ៍ថាខ្លួនតូចណាស់ ប៉ុន្តែមានអារម្មណ៍ផ្សារភ្ជាប់ជាមួយរឿងរ៉ាវអតីតកាល រហូតដល់ពេលនេះ។ ការពាក់គ្រឿងអលង្ការ Aeterna High Jewelry នៅទីនេះគឺមានន័យលើសពីការលម្អ ប៉ុន្តែ​ជា​ការ​រំលឹក​ពីសម្រស់ដែលស្ថិតស្ថិរអមតៈ”។

៦. Mile Phak Phum

ចំណែកតារាសម្ដែងប្រុសថៃ Mile Phak Phum បានរៀបរាប់លើគណនី IG របស់ខ្លួនថា៖ “នេះគឺជាកន្លែងដ៏ល្អបំផុត គួរឱ្យចាប់អារម្មណ៍បំផុត និងជារាត្រីពិសេសដ៏អស្ចារ្យមួយ។ ខ្ញុំលង់ស្នេហ៍កម្ពុជាដល់ហើយ”។

៧. Mai Davika

ដោយឡែកតារាសម្ដែងស្រីថៃ Mai Davika ក៏បានបង្ហោះរូបភាពនិងវីដេអូជាច្រើនលើបណ្ដាញសង្គមរបស់ខ្លួន និងបានផ្ដល់បទសម្ភាសជាមួយទស្សនាវដ្ដី BAZAAR ថា៖ “គ្រប់យ៉ាងនៅទីនេះគឺប្រៀបដូចជាក្នុងសុបិន ស្រស់ស្អាត ហើយទីកន្លែងរៀបចំកម្មវិធីនៅប្រទេសកម្ពុជាគឺពិតជាពិសេសខ្លាំង” ៕