ឃើញតារាកូរ៉េថតពាណិជ្ជកម្មឱ្យធនាគារព្រោងព្រាត ដឹងអត់ថាពួកគេទទួលបានប្រាក់កម្រៃក្រាស់ក្រែលប៉ុណ្ណា?

ធនាគារធំៗរបស់ប្រទេសកូរ៉េខាងត្បូង កំពុងតែចំណាយទុនយ៉ាងច្រើនសន្ធឹកសន្ធាប់ទៅលើឥទ្ធិពលរបស់តារាល្បីៗ។

ស្របពេលដែលការប្រកួតប្រជែងកាន់តែមានភាពក្ដៅគគុក ធនាគារនានាក៏កំពុងផ្លាស់ប្ដូរពីយុទ្ធសាស្ត្រប្រពៃណីបែប «ប្រើប្រាស់តារាដែលគួរឱ្យទុកចិត្តតែម្នាក់» ហើយបានចាប់ផ្ដើមយក BA ជាតារា​ល្បីច្រើនគ្នាក្នុងពេលតែមួយ ដែលរួមមានទាំងតារាសម្ដែង តារាអាយដល កីឡាករអត្តពលិក និងតារាទូរទស្សន៍ (TV personalities)។ កាលពីឆ្នាំមុន ការចំណាយលើការផ្សាយពាណិជ្ជកម្មរួមគ្នារបស់ធនាគារពាណិជ្ជធំៗទាំងប្រាំ បានកើនឡើងហួសពី ៨០០ ពាន់លានវ៉ុន (ប្រហែល ៥៣២ លានដុល្លារអាមេរិក) ជាលើកដំបូងបង្អស់។

យោងតាមប្រភពពីឧស្សាហកម្មហិរញ្ញវត្ថុកូរ៉េខាងត្បូង បានឱ្យដឹងថា ធនាគារទាំងនោះកំពុងធ្វើការផ្លាស់ប្តូរទម្រង់ម៉ូដែលតំណាងរបស់ខ្លួនឱ្យមានភាពសម្បូរបែប ដើម្បីឈានទៅរកក្រុមមនុស្សផ្សេងៗគ្នានៃជំនាន់នីមួយៗ និងដើម្បីពង្រឹងរូបភាពម៉ាកសញ្ញារបស់ពួកគេឱ្យកាន់តែមានភាពលេចធ្លោ។

ជាក់ស្ដែង ធនាគារ Kookmin Bank (KB) ថ្មីៗនេះបានចុះកិច្ចសន្យាជាមួយអ្នកដឹកនាំរឿង Jang Hang Jun និងអ្នកនិពន្ធ Kim Eun Hee ដែលជាប្ដីប្រពន្ធនឹងគ្នា ដើម្បីជម្រុញរូបភាពបែបស្និទ្ធស្នាលរបស់ខ្លួន ខណៈពេលដែលធនាគារ NongHyup Bank បានទាក់ទាញតារាទូរទស្សន៍លោក Kian84 ធ្វើជាម៉ូដែលតំណាងថ្មីរបស់ខ្លួន។

ទោះជាយ៉ាងណាក៏ដោយ តារាលំដាប់កំពូលៗនៅតែមានតម្រូវការខ្ពស់ដដែល។ តួយ៉ាង ក្រុមហ៊ុន KB Financial Group នៅតែបន្តធ្វើការងារជាមួយនិមិត្តរូបកីឡាជិះស្គីទឹកកក Kim Yuna និងតារាសម្ដែងស្រី Park Eun Bin។ ប្រភពក្នុងរង្វង់សិល្បៈបាននិយាយថា Kim Yuna ទទួលបានប្រាក់ចំណូលច្រើនជាង ១ ពាន់លានវ៉ុន (ប្រហែល ៦៦៧ ២២០ ដុល្លារអាមេរិក) សម្រាប់យុទ្ធនាការនីមួយៗ ខណៈពេលដែល Park Eun Bin ទទួលបានយ៉ាងហោចណាស់ ៧០០ លានវ៉ុន (ប្រហែល ៤៦៧ ០៥៤ ដុល្លារអាមេរិក) ក្នុងមួយឆ្នាំ។ ធនាគារ KB ក៏បានចុះកិច្ចសន្យាជាមួយក្រុមចម្រៀងនារី Hearts2Hearts ផងដែរ ដែលតម្លៃពលកម្មប្រចាំឆ្នាំរបស់ពួកគេត្រូវបានរាយការណ៍ថាមានចំនួនលើសពី ៣៥០ លានវ៉ុន (ប្រហែល ២៣៣ ៥២៧ ដុល្លារអាមេរិក)។

ដោយឡែក ធនាគារ NongHyup Bank ថ្មីៗនេះបានជ្រើសយកតារាសម្ដែង Park Ji Hoon ដែលតម្លៃខ្លួនរបស់លោកបានហក់ឡើងខ្ពស់ បន្ទាប់ពីភាពជោគជ័យនៃរឿង The King’s Warden។ ចំណែកឯតារាសម្ដែង Byeon Woo Seok ដែលជាម៉ូដែលតំណាង​ស្រាប់ម្នាក់ទៀតនោះ ត្រូវបានរាយការណ៍ថា បានតម្លើងតម្លៃខ្លួនរបស់លោកឡើងទ្វេដង បន្ទាប់ពីគម្រោងរឿងភាគដ៏ល្បីៗនាពេលថ្មីៗនេះ ដោយតម្លៃខ្លួនប្រចាំឆ្នាំរបស់លោកត្រូវបានប៉ាន់ប្រមាណថានៅក្នុងរង្វង់ប្រហែល ១ ពាន់លានវ៉ុន (ប្រហែល ៦៦៧ ២២០ ដុល្លារអាមេរិក)។

ធនាគារ Hana Bank បានចំណាយប្រាក់ច្រើនជាងគេទៅលើការផ្សាយពាណិជ្ជកម្មកាលពីឆ្នាំមុន ដោយអស់ទឹកប្រាក់ចំនួន ១៧៧.៦ ពាន់លានវ៉ុន (ប្រហែល ១១៨.៥ លានដុល្លារអាមេរិក)។ បញ្ជីឈ្មោះតារាល្បីៗលំដាប់ផ្កាយរបស់ធនាគារនេះ រួមមាន Son Heung Min, An Yujin របស់ក្រុម IVE, Lim Young Woong, Kang Ho Dong និង G-Dragon។ តម្លៃខ្លួនប្រចាំឆ្នាំរបស់ G-Dragon ត្រូវបានប៉ាន់ប្រមាណថាមានចំនួន ៣ ពាន់លានវ៉ុន (ប្រហែល ២ លានដុល្លារអាមេរិក) ដែលត្រូវបានចាត់ទុកថាជាតម្លៃមួយក្នុងចំណោមតម្លៃខ្ពស់បំផុតនៅក្នុងឧស្សាហកម្មនេះ ខណៈពេលដែល An Yujin ត្រូវបានរាយការណ៍ថាទទួលបានប្រាក់ប្រហែល ៧០០ លានវ៉ុន (ប្រហែល ៤៦៧ ១៥៥ ដុល្លារអាមេរិក) ក្នុងមួយឆ្នាំ។

ធនាគារ Woori Bank ឈរនៅលំដាប់បន្ទាប់ ដោយបានចំណាយថវិកាចំនួន ១៦៧.៣ ពាន់លានវ៉ុន (ប្រហែល ១១១.៧ លានដុល្លារអាមេរិក) លើការផ្សាយពាណិជ្ជកម្ម។ ក្រុមហ៊ុន Woori Financial Group ធ្វើការងារជាមួយ IU ខណៈពេលដែលធនាគារ Woori Bank បានចុះកិច្ចសន្យាជាមួយ Jang Wonyoung របស់ក្រុម IVE។

ធនាគារ Shinhan Bank បានចំណាយអស់ ១៥៧.៦ ពាន់លានវ៉ុន (ប្រហែល ១០៥.២ លានដុល្លារអាមេរិក) កាលពីឆ្នាំមុន ហើយកំពុងធ្វើការងារជាមួយ Park Bo Gum ដែលតម្លៃខ្លួនប្រចាំឆ្នាំរបស់លោកត្រូវបានប៉ាន់ប្រមាណថានៅក្នុងរង្វង់ប្រហែល ១.២ ពាន់លានវ៉ុន (ប្រហែល ៨០០ ៧៧៦ ដុល្លារអាមេរិក)។ ចំណែកឯធនាគារ NongHyup Bank វិញ បានកត់ត្រាការចំណាយលើការផ្សាយពាណិជ្ជកម្មចំនួន ១៤៥.៨ ពាន់លានវ៉ុន (ប្រហែល ៩៧.៣ លានដុល្លារអាមេរិក)។

ការសម្រុកចំណាយប្រាក់យ៉ាងគំហុកនេះ ឆ្លុះបញ្ចាំងពីការផ្លាស់ប្តូរដ៏ធំមួយគឺ ធនាគារនានាមិនត្រឹមតែប្រកួតប្រជែងគ្នាដើម្បីទទួលបានទំនុកចិត្តប៉ុណ្ណោះទេ ប៉ុន្តែពួកគេកំពុងតែដណ្ដើមគ្នាក្នុងការទាក់ទាញអ្នកប្រើប្រាស់កម្មវិធី (App users) ការទទួលស្គាល់ម៉ាកសញ្ញា និងក្រុមអតិថិជនវ័យក្មេង។

ទោះជាយ៉ាងណាក៏ដោយ វាក៏មិនមែន​ជារឿងដែលគ្មានហានិភ័យនោះដែរ ខណៈបញ្ហាចម្រូងចម្រាសផ្ទាល់ខ្លួនរបស់ម៉ូដែលតំណាងម្នាក់ អាចរីករាលដាលនិងប៉ះពាល់ដល់ម៉ាកសញ្ញាទាំងមូលយ៉ាងលឿន។ ឧទាហរណ៍ ក្រុមហ៊ុន Shinhan Financial Group ធ្លាប់បានប្រឈមមុខនឹងភាពឈឺក្បាលជាច្រើន ពាក់ព័ន្ធនឹងរឿងចម្រូងចម្រាសផ្នែកពន្ធដាររបស់ Cha Eun Woo, រឿងចម្រូងចម្រាស​ Kim Soo Hyun និងវិវាទ​ពាក់ព័ន្ធនឹងក្រុម NewJeans ជាដើម ៕