ទីផ្សារ MC នៅខ្មែររវល់ហើយ ឥឡូវ ជា រ៉េយម៉ន ហោះឆ្លងទ្វីបទៅធ្វើពិធីករដល់អាមេរិក

អាមេរិក គឺ​ជា​ប្រទេស​ទី​ ៥​ ដែល​បុរស​សង្ហា ជា រ៉េយម៉ន បាន​បំពេញ​តួ​នាទី​ជា​ពិធី​ករ​បន្ទាប់​ពី​ប្រទេស​កម្ពុជា ចិន ថៃ និង​ម៉ាឡេស៊ី។ ដោយ​ឡែក ក្រោយ​បញ្ចប់​បេសកកម្ម​លើ​ទឹក​ដី​​អាមេរិក​ពិធី​ករ​ពហុ​ភាសា​រូប​នេះ​កំពុង​ត្រៀម​ចេញ​ទៅ​ប្រទេស​ចំនួន ២ ទៀត​នា​ពេល​ខាង​មុខ។ ​

បុរស​សង្ហា​មុខ​កូន​កាត់​ចិន ជា រ៉េយម៉ន ត្រូវ​បាន​មហាជន​ជា​ច្រើន​ស្គាល់​ថា​ជា​ពិធី​ករ​ដែល​ហូរហៀរ​ទៅ​ដោយ​បទ​ពិសោធន៍​ក្នុង​ការ​សម្របសម្រួល​កម្មវិធី​តូច​ធំ​ និង​ផ្លូវ​ការ​ជា​ច្រើន​ទាំង​ក្នុង​និង​ក្រៅ​ស្រុក។ ពិធី​ករ​ពហុ​ភាសា​រូប​នេះ​មិន​ត្រឹម​មាន​សមត្ថភាព​ខ្ពស់​ថែម​ទាំង​អាច​ប្រើប្រាស់​​ច្រើន​ភាសា​ដូច​ជា ខ្មែរ អង់គ្លេស ចិន​កុក​ងឺ ចិន​កាតាំង ចិនទៀចីវ ជប៉ុនខ្លះៗ។ បច្ចុប្បន្ន លោក​ក៏​កំពុង​សិក្សា​ភាសា​ថ្មី​មួយ​បន្ថែម​ទៀត ត្រៀម​សម្រាប់​ប្រើប្រាស់​នៅ​ក្នុង​កម្មវិធី​មួយ​នា​ចុង​ឆ្នាំ​នេះ។ ក្រឡេក​មក​មើល​ទីផ្សារ​ការងារ​របស់​ពិធី​ករ​ខ្ពស់​ស្រឡះ​រូប​នេះ​បន្តិច​ឃើញ​ថា​មាន​ភាព​មមាញឹក​គួរ​សម​ទាំង​ការងារ​នៅ​ក្នុង​ស្រុក ក៏​ដូច​ជា​ក្រៅ​ស្រុក។

ដោយ​ឡែក ចង់​បញ្ជាក់​បន្តិច​ដែរ​ថា សម្រាប់​កម្មវិធី​ដែល រ៉េយម៉ន បាន​ចូល​រួម​ក្នុង​នាម​ជា​ពិធី​ករ​សម្របសម្រួល​លើ​ទឹក​ដី​​អាមេរិក មាន​ចំនួន២ ទី១. កម្មវិធីអបអរ ទិវាផ្តល់សិទ្ធិសេរីភាពដល់ជនជាតិអាមេរិកស្បែកខ្មៅ ដែលរំដោះពួកគាត់ចេញពីរបបទាសករ។ កម្មវិធី​នេះ​ធ្វើ​ឡើង​ក្នុង emorial Hall ទីក្រុងKansas រដ្ឋ Kansas ជា​រៀង​រាល់​ឆ្នាំ។ រី​ឯ​កម្មវិធី​ទី២ ជាកម្មវិធីប្រគុំតន្ត្រី ពុទ្ឋាភិសេក និងឆ្លងសមិទ្ធិផលផ្សេងៗរបស់វត្តខេមរារាម ក្នុងទីក្រុង Huston រដ្ធTexas។

បើ​និយាយ​ពី​ទី​ផ្សារ​ការងារ​ក្នុង​នាម​ជា​ពិធី​ករ ជា រ៉េយម៉ន ហាក់​ទទួល​បាន​ការ​ចាប់​អារម្មណ៍​ច្រើន​ពី​សំណាក់​កម្មវិធី​ធំៗ​ទាំង​ក្នុង​និង​ក្រៅ​ស្រុក។ គួរ​ឱ្យ​ដឹង​ដែរ​ថា ក្រៅ​ពី​អាជីព​ជា​ពិធី​ករ Raymond ក៏​ជា​បុរស​ឯក​ក្នុង​កម្មវិធី Mister World Cambodia 2025 និង Mister Glam International Humanity 2022 ផង​ដែរ។ ​

បុរសឯករូបនេះជានិស្សិតបញ្ចប់ការសិក្សាបរិញ្ញាបត្រផ្នែកអប់រំ និងជាគ្រូបង្រៀនភាសាអង់គ្លេសនៅ IFL តាំងពីឆ្នាំ ២០១៦ និងបញ្ចប់ថ្នាក់ភាសាចិនកម្រិត Diploma តាំងពីឆ្នាំ ២០១០ ហើយស្ទាត់ជំនាញ​ច្រើន​ភាសា​ទៀត​ផង៕

រូបភាព ៖ Raymond Chear