ផ្ទុះការវែកញែក ក្រោយពិភពបាតសមុទ្រក្នុងប្រទេសចិនប្រើប្រាស់ត្រីបាឡែនយន្ត ដើម្បីកាត់បន្ថយការចំណាយ

ការប្រើប្រាស់ត្រីបាឡែនដែលធ្វើឡើងដោយគ្រឿងយន្ត ជំនួសដោយសត្វពិតនៅក្នុងពិភពបាតសមុទ្រ Xiaomeisha Sea World ផ្ទុះការវែកញែកក្នុងចំណោមអ្នកទិញសំបុត្រទស្សនា ដោយអ្នកខ្លះយកថាជាការបោប្រាស់ អ្នកខ្លះយល់ថាជាការចូលរូមអភិរក្សាសត្វពិតៗ។

នៅក្នុងការបើកដំណើរការឡើងវិញកាលពីខែតុលាកន្លងទៅ អាងចញ្ចឹមសត្វសមុទ្រដែលមានទីតាំងនៅក្នុងទីក្រុងសិនជិន ខេត្តក្វាងទុង ប្រទេសចិន បានសម្រេចចិត្តប្រើប្រាស់ត្រីបាឡែនយន្តដើម្បីកាត់បន្ថយចំណាយក្នុងការថែទាំត្រីសមុទ្រដែលមានទំហំមហិមាមួយនេះ។

តាមរយៈ South China Morning Post ត្រីសមុទ្រដែលធំបំផុតអាចនឹងត្រូវចំណាយប្រាក់ច្រើនជាង ១០០លានយន់ ឬប្រមាណ ១៤លានដុល្លារអាមេរិកក្នុងការចញ្ចឹម និងមើលថែ ស្របពេលដែលត្រីបាឡែនយន្តអាចនឹងត្រូវចំណាយប្រាក់ខ្ទង់លានយន់ ឬបើគិតជាលុយដុល្លារអាមេរិក អាចនឹងមានចំនួនត្រឹមសែនដុល្លារតែប៉ុណ្ណោះ។

បន្ថែមពីទំហំទឹកប្រាក់ដែលមានគម្លាតពីគ្នាច្រើនគួរសម លោក Li Jianping នៃសាកលវិទ្យាល័យ Ocean of China បានឱ្យដឹងថា ត្បិតត្រីបាឡែនពិតដែលរស់នៅដោយធម្មជាតិមានអាយុចន្លោះ ៨០ ទៅ ១៣០ឆ្នាំក៏ពិតមែន តែសម្រាប់ការចញ្ចឹមក្នុងអាងបែបនេះ ពួកវាមិនអាចមានជីវិតលើសពី ៥ឆ្នាំបានទេ។ ព្រឹទ្ធបុរសរូបនេះបានប្រាប់ពីមូលហេតុថា បើទោះបីជា អ្នកមើលថែអាចរក្សាគុណភាពទឹក និងសីតុណ្ហភាពសមស្របក៏ដោយចុះ តែអាងមានទំហំតូចពេកបើប្រៀបធៀបនឹងតម្រូវការរបស់សត្វប្រភេទនេះ។

ដោយសំបុត្រចូលទស្សនាសត្វសមុទ្រនៅទីតាំងខាងលើមានតម្លៃ ២៣០យន់ ឬប្រហែល ៣២ដុល្លារអារមេរិក អតិថិជនជាច្រើនរូបបានខឹងសម្បារនឹងការសម្រេចចិត្តរបស់ Xiaomeisha Sea World ព្រមទាំងមានអ្នកខ្លះទាមទារចង់បានសំណងត្រឡប់មកវិញទៀតផង។

ភ្ញៀវម្នាក់បានសម្ដែងការហួសចិត្តថា៖ “ខ្ញុំសឹងតែមិនជឿទេថា គេប្រើប្រាស់ត្រីបាឡែនយន្ត។ វាហួសហេតុពេកដែលសំបុត្រមានតម្លៃលើសពី ២០០យន់ (២៨ដុល្លារអាមេរិក)”។

ទន្ទឹមគ្នានេះ ភ្ញៀវម្នាក់ទៀតបានគំរាមថានឹងរាយការណ៍ពីការប្រើត្រីក្លែងក្លាយ ហើយទីតាំងមួយនេះត្រូវតែបិទទ្វារឈប់ដំណើរការជាដាច់ខាត។

ផ្ទុយមកវិញ អ្នកទស្សនាខ្លះទៀត បានរីករាយនឹងការចំណាយរបស់ខ្លួនក្នុងការទស្សនាត្រីបានឡែនយន្ត ដោយគាត់និយាយថា៖ “នេះជាការដោះស្រាយបញ្ហាដ៏អស្ចារ្យក្នុងការបង្ហាញសត្វសមុទ្រដែលមានទំហំធំៗ ដោយមិនចំបាច់ដាក់សត្វក្នុងអាង”។

អ្នកទស្សនាដដែលនេះ បង្ហាញពីគំនិតក្នុងការអភិរក្សសត្វរបស់គាត់ថា៖ “ក្រៅពីមិនគួរព្យាយាមបិទបាំងការពិត ដែលថាត្រីបានឡែននេះជាសត្វយន្ត នេះជាឱកាសរបស់ក្រុមហ៊ុនពិភពបាតសមុទ្រក្នុងការផ្ដល់ចំណេះដឹងដល់សាធារណជនទៅលើ សារៈសំខាន់នៃការការពារសត្វ”។

គួរបញ្ជាក់ផងដែរថា នេះមិនមែនជាលើកទីមួយទេ ដែលអ្នកបើកកន្លែងកម្សាន្តបែបនេះជ្រើសរើសប្រើប្រាស់ត្រីបាឡែនយន្ត ជំនួសដោយត្រីធម្មជាតិ។ តួយ៉ាង National Business Daily ធ្លាប់រាយការណ៍ថា ក្នុងឆ្នាំ ២០២២ ត្រីប្រភេទតែមួយនេះ បានដាក់បង្ហាញនៅក្នុង Shanghai Haichang Ocean Park ឯក្រុងសៀងហៃ។

មានទំហំ ៤.៧ម៉ែត្រ និងទម្ងន់ ៤៣០គីឡូក្រាម ជាធម្មតាអ្នកមើលថែ រក្សាទុកត្រីយន្តដោយឡែក និងបើកដំណើរការឱ្យមានចលនាប្រដូចនឹងបាឡែននៅពេលមានអ្នកចូលទស្សនា។ ដោយឡែក អតិថិជនតែងយល់ឃើញថា បើទោះបីជាការត្រាប់ក៏ពិតមែន តែវាមានសកម្មភាពមិនដូចនឹងត្រីពិតៗនោះទេ។

អ្នកនាំពាក្យរបស់ Shanghai Haichang Ocean Park បានពន្យល់ថា ត្រីបាឡែនជាប្រភេទត្រីដែលរដ្ឋាភិបាលចិនចាត់ទុកជា ជាសត្វស្ថិតនៅក្នុងការអភិរក្សលំដាប់លេខ ២ និងហាមឃាត់ក្នុងការចាប់ពូជត្រីមួយនេះ។ លើសពីនេះទៅទៀត គាត់យល់ថា ត្រីបាឡែនយន្តបានដើរតួនាទីជាអ្នកចូលរួមការពារសត្វសមុទ្រ ទន្ទឹមគ្នានឹងធ្វើការផ្សព្វផ្សាយចំណេះដឹងពីបាតសមុទ្រ។

ជារួម ខណៈពេលដែលអតិថិជនរបស់ Xiaomeisha Sea World មួយចំនួនយល់ថា វាជាទង្វើបោកប្រាស់ និងទាមទារប្រាក់សំណងត្រឡប់មកវិញ អ្នកខ្លះទៀតបានលើកសរសើរ និងយល់ស្របលើការសម្រេចចិត្តនេះ។ ទន្ទឹមគ្នាដែរ ការប្រើប្រាស់សត្វយន្តមិនបានចាត់ទុកជាការបោកប្រាស់ឡើយ ដរាបណាក្រុមហ៊ុនមិនបានប្រាប់អតិថិជនជាមុនពីរឿងនេះ ឬបានផ្សព្វផ្សាយថាពន្លើសថា ពិភពបាតសមុទ្ររបស់ខ្លួនមានដាក់បង្ហាញ ត្រីបាឡែនពិត៕