អាប់ដេតច្រើនលើកនេះ! មកដឹងលក្ខណៈពិសេសនិងតម្លៃ iPhone 17 គ្រប់ស៊េរី ព្រមទាំងផលិតផលថ្មីផ្សេងទៀតរបស់ Apple

ក្រុមហ៊ុន Apple បានទាក់ទាញការចាប់អារម្មណ៍គ្រប់គ្នាជាថ្មីជាមួយនឹងការបង្ហាញផលិតផលចុងក្រោយរបស់ខ្លួន ដឹកនាំដោយការអាប់ដេតទ្រង់ទ្រាយធំសម្រាប់ iPhone 17 Series ដែលមានម៉ូដែល Air ស្តើងបំផុត ក៏ដូចជា Apple Watch និង AirPods Pro 3 ដែលមានការកែប្រែទាំងស្រុងនៅក្នុងព្រឹត្តិការណ៍ Apple Event នៅថ្ងៃទី 9 ខែកញ្ញា ឆ្នាំ 2025 (ត្រូវនឹងថ្ងៃទី 10 ខែកញ្ញា ឆ្នាំ 2025 ម៉ោង 12:00 រំលងអាធ្រាត ម៉ោងនៅកម្ពុជា)។

របាយការណ៍ទាំងពី Bloomberg និង The Wall Street Journal បានបង្ហាញថាក្រុមហ៊ុនបច្ចេកវិទ្យាយក្សមួយនេះកំពុងសម្លឹងរកមើលការរក្សាអតិថិជនរបស់ខ្លួននៅលើស្មាតហ្វូនដែលជាអ្នកសាងចំណូលធំបំផុតរបស់ខ្លួន បន្ទាប់ពីមានសញ្ញានៃការថយចុះតម្រូវការក្នុងប៉ុន្មានឆ្នាំថ្មីៗនេះ ដោយ Apple កំពុងប្រឈមមុខនឹងភាពឆ្អែតឆ្អន់នៃទីផ្សារស្មាតហ្វូន និងការប្រកួតប្រជែងកាន់តែខ្លាំងនៅក្នុងបណ្តាប្រទេសដូចជាប្រទេសចិន ដូច្នេះហើយពួកគេសង្ឃឹមថានឹងធ្វើឱ្យអតិថិជនរំភើបជាមួយនឹងទូរស័ព្ទ iPhone ស៊េរីថ្មីដំបូងរបស់ខ្លួនក្នុងរយៈពេលប៉ុន្មានឆ្នាំមកនេះ រួមទាំងការប៉ះប៉ូវមុខងារ AI ដែលមិនសូវមានប្រសិទ្ធភាពកន្លងមក បើទោះបីជាមានការព្យាយាមបើកដំណើរការមុខងារជាច្រើនក៏ដោយ។

លោក Tim Cook នាយកប្រតិបត្តិ Apple បាននិយាយក្នុងអំឡុងពេលព្រឹត្តិការណ៍ផ្សព្វផ្សាយនេះថា “iPhone Air គឺជាអ្នកផ្លាស់ប្តូរហ្គេម” ។

ចំណុចសំខាន់ៗ៖ iPhone 17 Series

ក្រុមហ៊ុន Apple បានធ្វើការផ្លាស់ប្តូរទ្រង់ទ្រាយធំសម្រាប់ត្រកូល iPhone ដោយបង្ហាញម៉ូដែលថ្មីចំនួន 4 រួមមាន៖

* iPhone 17 និង iPhone 17 Air៖ ការផ្លាស់ប្តូរជាប្រវត្តិសាស្ត្រគឺការនាំមកនូវអេក្រង់ 120Hz ProMotion ជាគំរូស្តង់ដារលើកដំបូង និងការបង្ហាញ iPhone Air ស្តើងបំផុត 5.6mm ជំនួសម៉ូដែល Plus បំពាក់ដោយបន្ទះឈីប A19 និងមានប្រព័ន្ធកាមេរ៉ាភ្លោះទំហំ 48MP Dual Fusion ។

* iPhone 17 Pro និង iPhone 17 Pro Max៖ បំពាក់នូវបន្ទះឈីប A19 Pro ព្រមជាមួយប្រព័ន្ធបន្ថយកម្ដៅ Vapor Chamber ដែលអាចទ្រទ្រង់មុខងារ Apple Intelligence បានពេញលេញ ជាមួយ RAM 12GB និងប្រព័ន្ធកាមេរ៉ាក្រោយបីគ្រាប់ទំហំ 48MP ទាំងអស់ជាលើកដំបូង ដែលអាច Zoom Optical រហូតដល់ 8 ដង និងការថតវីដេអូកម្រិត 8K ។

ក្រុមឧបករណ៍ពាក់ (Wearables)

* Apple Watch Series 11៖ មានភាពទាក់ទាញជាងមុនដោយមុខងារសុខភាព ជាមួយសមត្ថភាពវាស់សម្ពាធឈាម (High Blood Pressure Detection) ជាលើកដំបូង ព្រមជាមួយមុខងារ Sleep Score, 5G និងអេក្រង់ធន់នឹងការឆ្កូតខ្លាំងជាងមុន 2 ដង។

* Apple Watch Ultra 3៖ ជានាឡិកាឆ្លាតវៃចុងក្រោយបំផុតដែលមានអេក្រង់ធំបំផុតមិនធ្លាប់មាន ជាមួយថាមពលថ្មអាចដំណើរការបានរហូតដល់ 42 ម៉ោង និងការតភ្ជាប់ផ្កាយរណប (Satellite Connectivity)។

* AirPods Pro 3៖ មានការរចនាថ្មីទាំងអស់ជាមួយនឹងបន្ទះឈីប H3 ដែលជួយលុបសំឡេងរំខានបានប្រសើរជាងមុន 2 ដង និងឧបករណ៍ចាប់សញ្ញាចង្វាក់បេះដូងដំបូងគេ។ លើសពីនេះ AirPods ក៏មានមុខងារបកប្រែផ្ទាល់មាត់ផងដែរ ដែលមានជាភាសាអង់គ្លេស បារាំង អាល្លឺម៉ង់ ព័រទុយហ្គាល់ និងអេស្ប៉ាញ។ ភាសាចំនួនបួនទៀតនឹងត្រូវបានបន្ថែមនៅចុងឆ្នាំនេះរួមមានភាសា អ៊ីតាលី ជប៉ុន កូរ៉េ និងចិន។

ក្រៅពីនេះ Apple ក៏​បាន​ប្រកាស​ត្រៀម​បញ្ចេញ​ការ​អាប់ដេត Software Full Version ​​ទាំង iOS 26 និង watchOS 26 សម្រាប់អ្នកប្រើប្រាស់ទូទៅអាចអាប់ដេតបាននៅ​​សប្តាហ៍​ក្រោយ។

តម្លៃ iPhone 17 Series (តម្លៃពីអាមេរិក)

* iPhone 17 ចាប់ផ្តើមពី 799 ដុល្លារ

* iPhone Air ចាប់ផ្តើមពី 999 ដុល្លារ

* iPhone 17 Pro ចាប់ផ្តើមពី 1099 ដុល្លារ

* iPhone 17 Pro Max ចាប់ផ្តើមពី 1199 ដុល្លារ

** គ្រប់ម៉ូដែល iPhone 17 ចាប់ផ្តើមពីទំហំផ្ទុក 256 GB **

ការបញ្ជាទិញទុកមុននឹងចាប់ផ្ដើមបើកនៅថ្ងៃទី 12 ខែកញ្ញា វេលាម៉ោង 7:00 យប់ ម៉ោងប្រទេសកម្ពុជា ហើយនឹងចាប់ផ្តើមដឹកជញ្ជូននៅថ្ងៃទី 19 ខែកញ្ញា។

តម្លៃ Apple Watch

* Apple Watch Series 11 ចាប់ផ្តើមពី 399 ដុល្លារ

* Apple Watch SE 3 ចាប់ផ្តើមពី 249 ដុល្លារ

* Apple Watch Ultra ចាប់ផ្តើមពី 799 ដុល្លារ

តម្លៃ AirPods Pro 3

* 249 ដុល្លារ ៕