អនាគត aespa ស្ថិត​នៅ​មាត់ជ្រោះ​ក្រោយ​ជម្លោះ​ផ្ទៃ​ក្នុងក្នុង​ក្រុមហ៊ុន

សារព័ត៌មាន Naver រាយការណ៍ថាក្រុមចម្រៀងស្រីថ្មីបំផុតរបស់ SM គឺ aespa កំពុងស្ថិតក្នុងស្ថានភាពលំបាក ដោយ​ក្រៅ​ពីការចេញបទថ្មីរបស់ពួក​គេ​កំពុងមានបញ្ហា បើ​ធៀប​នឹង​ក្រុម​ចម្រៀង​ស្រី​ផ្សេង​ទៀតដែល​ចេញច្រៀង​ក្នុង​ពេល​ដូច​គ្នា វិថី​អាជីពក្នុងអនាគត​របស់ aespa ក៏​ពិបាកប្រកួតប្រជែងជាមួយគេដែរ​។

ផលប៉ះពាល់នៃជម្លោះផ្ទៃក្នុង

Aespa បានបង្ហាញខ្លួនជាលើកដំបូងក្នុងឆ្នាំ ២០២០ ហើយបច្ចុប្បន្នកំពុងស្ថិតក្នុងឆ្នាំទី ៤ នៃអាជីពរបស់ពួក​គេ។ ក្នុងនាមជាអ្នកតំណាងក្រុម​ខេប៉ុបជំនាន់ទី ៤ របស់ SM, Aespa ត្រូវបានបង្កើតឡើងដោយស្ថាបនិកក្រុមហ៊ុន Lee Soo Man។ ប៉ុន្តែនៅពេលដែលក្រុមអ្នកដឹកនាំបច្ចុប្បន្នរបស់ SM ដែលដឹកនាំដោយ CEO Lee Sung Soo មានជម្លោះជាមួយអតីត CEO Lee Soo Man សកម្មភាពរបស់សិល្បករ SM ក៏ត្រូវជាប់គាំង ហើយឈ្មោះ aespa ត្រូវបានគេលើកឡើងថាជាសិល្បករដែលរងទុក្ខច្រើនបំផុត។

នាយកប្រតិបត្តិបច្ចុប្បន្នរបស់ SM បានបញ្ជាក់ថា Lee Soo Man កំពុងប្រើប្រាស់ aespa ជាមធ្យោបាយដើម្បីធ្វើអាជីវកម្មខុសច្បាប់។ តាម​រយៈ​វីដេអូ Lee Sung Soo បាន​ចោទ​ប្រកាន់ Lee Soo Man ដោយ​ផ្ទាល់​ពី​បទ​ឧក្រិដ្ឋ​ជា​ច្រើនចាប់​ពី​ការ​បន្លំ​ពន្ធ​រហូត​ដល់​ពន្យារ​ការ​ត្រលប់​មក​វិញ​របស់ aespa។

ជាពិសេស លោក Lee បាននិយាយថា “ការចេញអាល់ប៊ុមថ្មីរបស់ aespa គ្រោងនឹងចេញនៅកំឡុងថ្ងៃទី ២០ ខែកុម្ភៈ ហើយការប្រគំតន្ត្រីលើកដំបូងរបស់ក្រុមនេះក៏នឹងធ្វើឡើងក្នុងពេលឆាប់ៗនេះផងដែរ បន្ទាប់ពីប្រហែលមួយសប្តាហ៍ក្រោយ។ ទោះជាយ៉ាងណា មូលហេតុពិតប្រាកដដែលការត្រលប់មកវិញរបស់ aespa ត្រូវបានពន្យារពេលគឺដោយសារតែបទចម្រៀងដែលស្នើសុំដោយ Lee Soo Man មិនស័ក្តិសមសម្រាប់ក្រុម”។

យោងតាម ​​CEO Lee Sung Soo, aespa មិនមែនជាជនរងគ្រោះតែម្នាក់នោះទេ។ Lee Soo Man បានស្នើសុំបញ្ចូលសារទាក់ទងនឹង បរិស្ថាន សង្គម និងអភិបាលកិច្ច ព្រមទាំងពាក្យមួយអំពីការគ្រប់គ្រងអាជីវកម្មក្នុងបទចម្រៀងរបស់សិល្បករ SM មួយចំនួនដូចជា NCT 127 និង GOT the beat ។

នាយកប្រតិបត្តិ SM បានចែករំលែកថានៅពីក្រោយសារនៃការដាំដើមឈើ ក៏ដូចជាការអំពាវនាវឱ្យអភិវឌ្ឍទីផ្សារថ្មី និងការផ្លាស់ប្តូរវប្បធម៌ គឺ Lee Soo Man មានបំណងចង់ជំរុញអាជីវកម្មកាស៊ីណូ និងអាជីវកម្មអចលនទ្រព្យដែលមិនត្រឹមត្រូវ។

ដោយមើលឃើញពីទិសដៅមិនសមហេតុផលរបស់ Lee Soo Man បុគ្គលិក និងសហ CEO ទាំងអស់បានសម្រេចចិត្តថាការចេញផ្សាយបទចម្រៀងបែបនេះគួរតែត្រូវបានលុបចោលសម្រាប់ជាប្រយោជន៍ដល់ aespa ។ នោះ​ក៏​ជា​ហេតុផល​ដែល​ធ្វើ​ឱ្យ​ការ​វិល​វិញ​របស់​ក្រុម​មិន​អាច​ទៅ​តាម​ការ​គ្រោង​ទុក។

ការ​ប្រកួត​ប្រជែង​យ៉ាង​ខ្លាំង​របស់​ក្រុម​ចម្រៀង​ស្រី Gen 4

មិនអាចប្រកែកបានទេចំពោះការពិតថា aespa ធ្លាប់ជាក្រុមចម្រៀងស្រីដែលបង្ហាញវត្តមានយ៉ាងរឹងមាំនៅក្នុងឧស្សាហកម្មតន្ត្រី Kpop ភ្លាមៗបន្ទាប់ពីការបង្ហាញខ្លួនរបស់ពួកគេ។ ទោះយ៉ាងណា ក្នុងរយៈពេល ៦ ខែកន្លងមក ក្រុមនេះមិនបានចេញអាល់ប៊ុមណាមួយនោះទេ។ ទោះបីជាសមាជិក Karina និង Winter បានចេញមុខជាមួយក្រុម GOT the Beat ក៏ដោយ ប៉ុន្តែ​សម្រាប់ក្រុម aespa ទាំងមូល​គឺមិនទាន់បាន Comeback នៅឡើយទេ ចាប់តាំងពីអាល់ប៊ុម Girls ត្រូវបានចេញផ្សាយកាលពីខែកក្កដាឆ្នាំមុន។

ខណៈដែលពេលវេលា Comeback របស់ពួកគេត្រូវបានពន្យារពេល អ្នកគាំទ្រជាច្រើនជឿថា ភាពទាក់ទាញរបស់ aespa នឹងត្រូវបាត់បង់ ជាពិសេសនៅពេលដែលក្រុមនេះស្ថិតនៅក្រោមសម្ពាធជាច្រើន មិនត្រឹមតែជម្លោះផ្ទៃក្នុង ប៉ុន្តែថែមទាំងប្រឈមការប្រកួតប្រជែងដ៏ក្ដៅគគុកជាមួយក្រុម​ចម្រៀង​ស្រី Gen 4 នៅ​ក្នុងផលិតកម្មដទៃផងដែរ។

Naver និយាយ​ថា aespa បាន​ចូល​ប្រឡូក​ក្នុង​វិស័យ​នេះ​អស់​រយៈពេល​៤​ឆ្នាំ​មក​ហើយ ប៉ុន្តែ​សមាជិក​ក្រុម​មិន​អាច​បញ្ចេញ​ស្ទីល​​ដោយ​ខ្លួនឯងបាន​ទេ។ ស្របពេលជាមួយគ្នានេះ ដៃគូប្រកួតប្រជែងរបស់ពួកគេដូចជា NewJeans និង IVE កំពុងក្លាយ​ជា​ក្រុម Trending និងទទួលបានការទទួលស្គាល់ទាំងជាតិ និងអន្តរជាតិ ហើយ​ក៏​កំពុង​បង្កើន​ឥទ្ធិពលឥត​ឈប់ឈរ​លើ​គ្រប់​រូបភាព​ដូច​ជា​ការ​បង្ហាញ​ម៉ូដ ការ​ផ្សាយ​ពាណិជ្ជកម្ម និងការលេចមុខក្នុងកម្មវិធីផ្សេងៗ។ ចំពោះ​ក្រុម aespa មធ្យោបាយ​តែ​មួយ​គត់​សម្រាប់​ពួក​គេ​ក្នុង​ការ​ពង្រឹង​មុខ​តំណែង​ឈាន​មុខ​គេ​ក្នុង​វិស័យ K-pop គឺ​ការ​ចេញ​បទ​ចម្រៀង​ថ្មី​ឱ្យ​បាន​ឆាប់តាម​ដែល​អាច​ធ្វើ​បាន។

ទោះបីជាមានស្ថានភាពលំបាកយ៉ាងណាក៏ដោយ អ្នកគាំទ្រនៅតែមានការរំពឹងទុកខ្ពស់ចំពោះការបង្កើតថ្មី និងសក្តានុពលរបស់សមាជិកទាំង ៤ ជាពិសេសនៅពេលដែលក្រុមនេះមានការគាំទ្រច្រើនពីសហគមន៍អ្នកគាំទ្រដ៏ស្មោះត្រង់ជុំវិញពិភពលោក ៕