មកស្គាល់តារា K-pop ដើមកំណើតជាជនជាតិចិនទាំង ៩រូប ល្បីល្បាញលំដាប់ពិភពលោក

មិនអាចប្រកែកបានថា វិស័យចម្រៀងប៉ុបរបស់ប្រទេសកូរ៉េខាងត្បូង មិនមែនគ្រាន់តែទទួលបានភាពជោគជ័យនៅក្នុងប្រទេសរបស់ខ្លួនប៉ុណ្ណោះទេ តែតន្ត្រីប្រភេទនេះបានទទួលការពេញនិយមពីសំណាក់អ្នកស្ដាប់មកពីជុំវិញពិភពលោក។ ក្រោមមូលហេតុនេះហើយ យុវវ័យមកពីបណ្ដាប្រទេសផ្សេងៗក៏មានគោលបំណងចង់ក្លាយជាតារា K-pop មួយរូបផងដែរ។ ជាក់ស្ដែង ជនជាតិចិនទាំង ៩រូបនេះ បានឆ្លងដែនទៅទទួលភាពជោគជ័យមិនធម្មតា ក្នុងនាមជា តារា K-pop។​

១. The8 សមាជិក SEVENTEEN

The8 ឬមានឈ្មោះពេញថា Xu Minghao ជាសមាជិកមួយរូបរបស់ក្រុមចម្រៀងបុរស SEVENTEEN។ ក្រៅពីអាជីពជាអ្នកចម្រៀង តារាប្រុសវ័យ ២៦ ឆ្នាំរូបនេះក៏ជាតារាបង្ហាញម៉ូដ និងសិល្បករក្បាច់គុនដ៏ល្បីល្បាញមួយរូបផងដែរ។

កើត និងធំធាត់នៅក្នុងប្រទេសចិន Xu Minghao បានលេចមុខជាលើកដំបូងនៅក្នុងកម្មវិធីទូរទស្សន៍របស់ចិនជាច្រើនដង ដូចជាកម្មវិធី Day Day Up ជាដើម។ ក្រោយមក លោកក៏ចូលរួមប្រកួតនៅក្នុងកម្មវិធី Shanghai World Dance Competition លើកទី៦ និងទទួលបានចំណាត់ថ្នាក់លេខ ៨ ដែលជាចំណុចចាប់ផ្ដើមនៃឈ្មោះ The8។​ នៅក្នុងឆ្នាំ ២០១៥ សិល្បកររូបនេះបានចូលរួមជាមួយនឹងក្រុមចម្រៀង SEVENTEEN និងទទួលបានភាពជោគជ័យនៅក្នុងវិស័យខេប៉ុប ជាមួយនឹងបទល្បីៗជាច្រើនដូចជា Super, God of Music និង Very Nice ជាដើម។

២. Jun សមាជិក SEVENTEEN

Jun ជាសមាជិករបស់ក្រុម SEVENTEEN ម្នាក់ទៀតដែលមានដើមកំណើតនៅក្នុងប្រទេសចិនដីគោក។ មុននឹងប្រឡូកក្នុងវិស័យសិល្បៈក្នុងប្រទេសកូរ៉េខាងត្បូង តារាប្រុសរូបនេះបានចាប់ផ្ដើមអាជីពសម្ដែងរបស់ខ្លួនតាំងតែវ័យ ២ខួបមកម៉្លេះ តាមរយៈពាណិជ្ជកម្មមួយ។ បន្ទាប់ពីនេះ Jun ក៏ចូលរួមសម្ដែងនៅក្នុងភាពយន្តផ្សេងៗរបស់ប្រទេសចិន ដូចជារឿង The Pye Dog ដែលបាននាំយកពានរង្វាន់ពីកម្មវិធី Hong Kong Film Directors’ Guild មកជូនលោក។

តារាពហុជំនាញរូបនេះ បានបង្ហាញខ្លួនជាសមាជិករបស់ SEVENTEEN ជាលើកដំបូង កាលពីឆ្នាំ ២០១៥ តែបច្ចុប្បន្នលោកបានផ្អាកសកម្មភាពរបស់ខ្លួនក្នុងការងារជាក្រុមមួយរយៈ ដោយបែរមកពង្រឹងការងារជាសិល្បករទោលនៅក្នុងប្រទេសកំណើតរបស់ខ្លួន។

៣. NingNing សមាជិក aespa

ក្នុងនាមជាអ្នកចម្រៀងគោលរបស់ក្រុម NingNing តែងទទួលបានការកោតសរសើរពីបច្ចេកទេសសំឡេងនៅពេលច្រៀងផ្ទាល់ និងការប្រើប្រាស់តុងសំឡេងខ្ពស់។ ទាំងនេះប្រហែលមិនមែនជារឿងចម្លែកទេ ព្រោះសមាជិកក្រុម aespa រូបនេះបានឡើងច្រៀងក្នុងកម្មវិធីទូរទស្សន៍ល្បីៗនៅក្នុងប្រទេសកំណើតរបស់ខ្លួនតាំងតែអាយុ ៥ឆ្នាំមកម៉្លេះ រហូតអាចទាក់ទាញបុគ្គលិក S.M. Entertainment ហៅឱ្យចូលផលិតកម្មរបស់ខ្លួន។

ក្រោយចំណាយពេលហ្វឹកហាត់ប្រមាណ ៥ឆ្នាំ តារាស្រីវ័យ ២២ឆ្នាំរូបនេះបានចូលជាសមាជិកទី ៣របស់ក្រុម aespa នៅក្នុងឆ្នាំ ២០២០។ មិនត្រឹមតែជោគជ័យនៅក្នុងការងារជាក្រុមប៉ុណ្ណោះទេ​ NingNing ក៏មានឱកាសបកស្រាយនូវចម្រៀងសម្រាប់ភាពយន្តភាគផងដែរ ដូចជាបទនៅក្នុងរឿង Our Blues និង The Midnight Studio ជាដើម។​

៤. Yuqi សមាជិក (G)I-DLE

Yuqi ដែលមានដើមកំណើតនៅក្នុងទីក្រុង ប៉េកាំង​ មានឱកាសក្លាយខ្លួនជាតារាខេប៉ុបតាមរយៈកម្មវិធី​ Cube Star World Audition Beijing Station កាលពីឆ្នាំ ២០១៥។ រំលងទៅអស់រយៈពេល៣ឆ្នាំ ទើបតារាស្រីវ័យ ២៥ឆ្នាំរូបនេះបានបង្ហាញខ្លួនក្នុងនាមជាសមាជិករបស់ក្រុមចម្រៀងស្រី (G)I-DLE របស់ផលិតកម្ម Cube​ Entertainment។​

ក្នុងនាមជាតារាចម្រៀង តារារ៉េប និងអ្នកនិពន្ធ Yuqi មិនមែនគ្រាន់តែជោគជ័យនៅក្នុងសកម្មភាពជាក្រុមនោះទេ តែនាងក៏ទទួលបានប្រជាប្រិយភាពតាមរយៈអាល់ប៊ុមទោលរបស់ខ្លួនផងដែរ​ ដូចជាអាល់ប៊ុម A Page ដែលបានចេញផ្សាយកាលពីឆ្នាំ ២០២១ ជាដើម។

៥. Renjun សមាជិក NCT

កើតនៅក្នុងឆ្នាំ ២០០០ ឯចិនដីគោក Renjun បានឈានចូលវិថីខេប៉ុបតាមរយៈ Shenyang SM Global Audition កាលពីឆ្នាំ ២០១៥។ ក្រោយពីហ្វឹកហាត់អស់រយៈពេល​ ១ឆ្នាំ Renjun បង្ហាញខ្លួនជាលើកដំបូងក្នុងនាមជាសមាជិក NCT Dream ជាមួយនឹងបទ​ Chewing Gum។

ថ្វីបើទស្សនិកជនស្គាល់ Renjun ថាជាតារាម្នាក់ដែលមានការសម្ដែងពេញដោយកម្លាំងក៏ពិតមែន តែបច្ចុប្បន្នលោកបានផ្អាកសកម្មភាពក្នុងវិស័យសិល្បៈមួយរយៈ ដើម្បីផ្តោតលើការព្យាបាលបញ្ហាថប់បារម្ភ (anxiety) ដែលលោកកំពុងតែជួបប្រទះ។

៦. Chenle សមាជិក NCT

ដោយមានប្រជាប្រិយភាពក្នុងនាមជាតារាចម្រៀងតាំងតែពីវ័យក្មេង នៅក្នុងទឹកដីកំណើតរបស់ខ្លួន នៅក្នុងអាយុត្រឹម ១៤ឆ្នាំ Chenle បានចុះកុងត្រាជាមួយនឹង S.M. Entertainment ដែលជាពន្លកដំបូងក្នុងវិស័យខេប៉ុបរបស់លោក។

នៅក្នុងឆ្នាំ ២០១៦ តារាចម្រៀងវ័យ ២២ឆ្នាំម្នាក់នេះបានផ្លាស់ទៅរស់នៅក្នុងប្រទេសកូរ៉េ​ខាងត្បូង និងធ្វើការហ្វឹកហាត់ប្រមាណ ២ទៅ ៣ខែ មុននឹងចូលជាសមាជិក NCT ក្នុងឆ្នាំតែមួយ។ ក្រៅពីសមត្ថភាពក្នុងការច្រៀង និងរាំ តារាប្រុសដែលមានឈ្មោះពេញថា Zhong Chenle ក៏អាចលេងព្យ៉ាណូបានផងដែរ។

៧. Lay សមាជិក EXO

មុននឹងចាប់ផ្ដើមក្នុងវិស័យខេប៉ុបជាលើកដំបូង​កាលពីឆ្នាំ ២០១២ ក្នុងនាមជាកូនក្រុម EXO តារាប្រុសវ័យ ៣៣ឆ្នាំរូបនេះក៏ធ្លាប់លេចមុខនៅក្នុងរឿង​ និងកម្មវិធីទូរទស្សន៍របស់ប្រទេសចិនផងដែរ។

ក្រៅពីការងារជាអ្នកចម្រៀង Lay ក៏ជាអ្នកនិពន្ធ ផលិតករ និងតារាសម្ដែងដ៏ល្បីម្នាក់ ដោយលោកបាន សម្ដែងជាតួឯកនៅក្នុងភាពយន្តខ្នាតធំរបស់ចិនជាច្រើន ដូចជា​ A Legend និង The Island ជាដើម។​

៨. Victoria សមាជិក f(x)

ប្រទះជាលើកដំបូងដោយបុគ្គលិករបស់ S.M. Entertainment នៅក្នុងកម្មវិធីប្រកួតប្រជែងរាំមួយ Victoria ត្រូវបានតែងតាំងជាមេក្រុមរបស់ f(x) នៅក្នុងឆ្នាំ ២០០៩។

ក្រោយទទួលបានជោគជ័យនៅក្នុងប្រទេសកូរ៉េខាងត្បូង កាលពីឆ្នាំ ២០១២ តារាស្រីវ័យ ៣៨ឆ្នាំរូបនេះបានចូលរួមសម្ដែងនៅក្នុងរឿងភាគ When Love Walked In ដែលជាការសហការផលិតរវាងប្រទេសចិន និងតែវ៉ាន់។ ជាមួយនឹងស្នាដៃនេះ​ Victoria បានទទួលពាន​រង្វាន់​តារា​សម្ដែង​ថ្មី​ល្អ​បំផុត​នៅក្នុង​កម្មវិធី China TV Drama Awards។ តាំងតែពីឆ្នាំ ២០១៨ នាងបានបន្តអាជីពជាសិល្បករទោលជាមួយនឹងបទ Roof of Fire។

៩. XiaoTing សមាជិក Kep1er

ក្នុងនាមជាបេក្ខជនដែលបានជាប់ចំណាត់ថា្នក់លេខ ៩នៅក្នុងកម្មវិធី Girls Palnet 999 កាលពីឆ្នាំ ២០២១XiaoTing បានក្លាយជាសមាជិកមួយរូបរបស់ក្រុមច្រៀងខេប៉ុប Kep1er និងបានចេញអាល់ប៊ុមខ្នាតតូច First Impact ជាលើកដំបូងកាលពីឆ្នាំ ២០២២។​

បន្ថែមពីនេះទៀត XiaoTing អាចនិយាយបានរហូតដល់ទៅ ៤ភាសា ដូចជា ចិន កូរ៉េ ជប៉ុន និងអង់គ្លេស៕