មិនធម្មតា! ៨ ហេតុការណ៍ដែល Jungkook បង្កភាពចលាចលនៅលើអ៊ីនធឺណិត

បើទោះបីជាសមាជិកក្រុម BTS “Jungkook” ឥឡូវនេះកំពុងបម្រើការក្នុងជួរកងទ័ពក្ដី តែលោកមិនដែលទុកអ្នកគាំទ្រខ្លួនឱ្យនៅឯកោឡើយ ។ 

ដើម្បីអបអរដល់ថ្ងៃកំណើតគម្រប់អាយុ ២៧ឆ្នាំរបស់លោកដែលទើបតែរំលងផុតទៅកាលពីថ្ងៃទី១ ខែកញ្ញា AMS សូមរំឭកនូវ ៨ហេតុការណ៍ ដែល Jungkook ធ្វើឱ្យ Army នៅលើអ៊ីនធឺណែតរំជួលចិត្ត។ 

១. កម្មវិធីដើរលេង និងភាពយន្តឯកសាររបស់ Jungkook 

ចាប់តាំងពី ២-៣វគ្គដំបូងរបស់កម្មវិធីដើរលេង “Are You Sure?!” របស់ Jungkook និង Jimin បានចេញផ្សាយកាលពីថ្ងៃទី៨ ខែកក្កដា ប្រជាប្រិយភាពរបស់កម្មវិធីក៏ចាប់ផ្ដើមរីករាលដាលពេញបណ្ដាញទំនាក់ទំនងសង្គម។ ពីទូករបស់ Jungkook ក្រឡាប់ ដល់សមាជិកក្រុម BTS ទាំងពីរវាយគ្នាជុំវិញអាងទឹក បានទាញអារម្មណ៍ឱ្យអ្នកគាំទ្រអត់ទ្រាំនឹងរីករាយជាមួយនឹងកម្មវិធីនេះមិនបាន។ 

ទន្ទឹមនឹងនោះ ភាពយន្តឯកសារថ្មីរបស់ Jungkook ក៏ធ្វើឱ្យប្រព័ន្ធអ៊ីនធឺណិតរង្គោះរង្គើមិនតិចដែរ។ I Am Still ជាភាពយន្តឯកសារពីដំណើរជីវិតរបស់លោក ៨ខែដែលផលិតអាល់ប៊ុម Golden (2023)។ គ្រាន់តែវីដេអូប្រកាសពី ភាពយន្តឯកសារមួយនេះបង្ហោះភា្លម ក៏ទទួលបានការទស្សនាជាង១.២លានដងរួចទៅហើយ ស្របពេលដែលវីដេអូ trailer ទទួលបានកាទស្សនាជាង ៨សែនដងនៅលើ YouTube។ 

២. ការចេញអាល់ប៊ុមទោលលើកដំបូង 

ការចេញអាល់ប៊ុមទោល “Golden” របស់ Jungkook អ្នកគាំទ្រក៏មិនធ្វើឱ្យ Idol របស់ខ្លួនខកបំណងនោះទេ។ បើយោងតាម Music Report of 2023 របស់ International Federation of the Phonographic Industry អាល់ប៊ុម Golden ទទួលបានប្រជាប្រិយភាពយ៉ាងខ្លាំងក្លារហូតក្លាយជាអាល់ប៊ុមលក់ដាច់បំផុតលំដាប់ទី ៧ប្រចាំឆ្នាំ។ ត្បិតអី អាល់ប៊ុមទោលដំបូងរបស់ Jungkook បានចេញលក់ចុងខែវិច្ឆិកាក៏ពិតមែន តែមិនដល់២ខែផង Golden បានលក់ចេញសរុប ២.៧លានបន្ទះរួចទៅហើយ។ 

គួរបញ្ជាក់ផងដែរថា អាល់ប៊ុម Golden មានបទចម្រៀងចម្រុះបែបដូចជា pop និង R&B សរុប ១១បទ។ បន្ថែមពីនេះ Jungkok ក៏បានរួមការងារជាមួយសិល្បករល្បីៗជាច្រើនរូប ដូចជា Jack Harlow, Major Lazer, Latto និង DJ Snake ផងដែរ។ 

៣.គណនី Instagram ឆ្កែរបស់Jungkook

ថ្វីបើ Jungkook ធ្វើការលុប-បង្កើតៗគណនី Instagram របស់ខ្លួនជាច្រើនដងក៏ពិតមែន តែដោយក្ដីស្រឡាញ់ចំពោះ Bam ដែលជាឆ្កែរបស់ខ្លួន Jungkook ក៏សម្រេចចិត្តបង្កើតគណនី Instagram មួយសម្រាប់ Bam។ គណនីរបស់ Bam ដែលមានឈ្មោះ username ថា @bowwow_bam បានបង្កើតឡើងកាលពីខែមេសានេះ ស្រាប់តែទទួលបានចំនួនអ្នកតាមដានរហូតដល់ទៅ ៣លាននាក់ត្រឹមរយៈពេល ២៤ម៉ោង។ 

៤. ការប្រកាសខ្លួនជា ambassador របស់ម៉ាកយីហោ Calvin Klein 

កាលពីខែមីនា ឆ្នាំ២០២៣ សមាជិកក្រុម BTS រូបនេះបានបង្ហាញខ្លួនក្នុងនាមជាទូតផ្សព្វផ្សាយរបស់ Calvin Klein។ ត្រឹមរូបភាពមិនប៉ុន្មានសន្លឹកដែលបានបង្ហោះនៅលើគណនី Instagram លោកបានធ្វើឯងអ្នកប្រើប្រាស់អ៊ីនធឺណិតមានភាពវឹកវរមិនតិចទេ។ បន្ថែមពីនេះទៀត វីដេអូ Calvin Klein X Jungkook ដែលបានបង្ហោះនៅលើ YouTube បានទាញយកអ្នកទស្សនាជាង ២០លានដងក្នុងរយៈពេលត្រឹម ២៤ម៉ោង។ 

៥. ការសម្ដែងនៅក្នុងកម្មវិធីបើករបស់ FIFA World Cup 

ថ្វីបើជាសមាជិកដែលមានអាយុតិចជាងគេក៏ពិតមែន តែ Jungkook បានបង្កើតប្រវត្តិសាស្រ្តមួយកាលពីថ្ងៃទី២0 ខែកក្កដា ឆ្នាំ២០២២ ដោយលោកបានក្លាយទៅជាតារាកូរ៉េដំបូងគេដែលឡើងសម្ដែងនៅក្នុងកម្មវិធីបើករបស់ FIFA WORLD CUP នាប្រទេសកាតា។ 

លោកបានច្រៀងបទេ Dreamers ផលិតដោយ RedOne ជាមួយនឹងតារាប្រចាំប្រទេសកាតា លោក Fahad Al Kubaisi។ មិនអាចប្រកែកបាន វីដេអូការសម្ដែងនោះបានក្លាយទៅជា មួយក្នុងចំណោមវីដេអូទាំង ១០ដែលមានអ្នកទស្សនាច្រើនបំផុតនៅលើ Channel Youtube របស់ FIFA ដោយមានអ្នកទស្សនារហូតដល់ទៅ ៥១លានដង។ 

៦. ស្នាមសាក់របស់ Jungkook

ក្នុងខែកញ្ញា ឆ្នាំ២០១៩ អ្នកគាំទ្រ BTS “ARMY” បានសង្កេតឃើញស្នាមសាក់តូចៗជាច្រើននៅលើដៃរបស់Jungkook រួមជាមួយស្នាមសាក់មួយដែលសរសេរថា “ARMY” នៅលើកែងដៃរបស់គាត់។ ខណៈពេលដែលតារាចម្រៀងរូបនេះខំលាក់ស្នាមសាក់អស់រយៈពេលពីរបីខែទៅហើយដោយពាក់អាវដៃវែង និងបង់រុំ ទីបំផុត Jungkook បានបង្ហាញពីស្នាមសាក់របស់ខ្លួនក្នុងពេលប្រគំតន្ត្រីក្នុងខួប៨ឆ្នាំរបស់ក្រុម BTS កាលពីឆ្នាំ ២០២១។ 

យោងតាម Vice Asia អ្នកគាំទ្រជាច្រើនរូបបានប្រើប្រាស់អ៊ីនធឺណិតដើម្បីបង្ហាញពីការគាំទ្ររបស់ខ្លួន ដោយពាក្យថា “Jungkook Tattoo” ត្រូវបានស្វែងរកនៅលើ Google ច្រើនជាង ១ម៉ឺនដង។

៧.ការបរិច្ចាគរបស់ Jungkook

កាលពីដើមឆ្នាំ ក្នុងខែមេសា តារាចម្រៀងរូបនេះបានបរិច្ចាគប្រាក់ចំនួន ១ពាន់លានវ៉ុន (ប្រហែល ៧សែន ៥ម៉ឺនដុល្លារអាមេរិក) ឱ្យទៅមន្ទីរពេទ្យកុមារនៃសាកលវិទ្យាល័យជាតិសេអ៊ូល ដើម្បីផ្គត់ផ្គង់ថ្លៃព្យាបាលដល់កុមារដែលកើតក្នុងគ្រួសារដែលមានចំណូលទាប។

តារា​ចម្រៀង​រូប​នេះ​បាន​និយាយ​ក្នុង​សេចក្តីថ្លែងការណ៍​មួយ​ថា៖ «ខ្ញុំ​សង្ឃឹម​ថា​ការ​បរិច្ចាគ​របស់​ខ្ញុំ​អាច​ជា​ការ​ជួយ​ដល់​កុមារ​ដែល​មាន​គ្រោះ​ថ្នាក់ ហើយ​ខ្ញុំ​សង្ឃឹម​ថា​កុមារ​អាច​ញញឹម​ដោយ​រីករាយ»។ ក្រោយពីព័ត៌មាននេះបានផ្សព្វផ្សាយ អ្នកគាំទ្ររាប់ពាន់នាក់បានចូលទៅក្នុង Twitter ដើម្បីសរសើរដល់អាយដលរបស់ពួកគេ។

៨. បំបែកកំណត់ត្រាលើចំនួនទស្សនាការ live និងចំនួន Tweet ច្រើនជាងគេ

នៅខែមីនាឆ្នាំ ២០២១ តារាចម្រៀងរូបនេះបានបំបែកកំណត់ត្រាម្ដងរួចទៅហើយ សម្រាប់ចំនួនអ្នកមើលដំណាលគ្នាច្រើនបំផុតនៅលើកម្មវិធី V Live ដោយការ live របស់ Jungkook មានមនុស្សប្រហែល ២២លាននាក់បានមើល។ នៅឆ្នាំដដែលនោះលោកក៏បានក្លាយជាមនុស្សដំបូងគេនៅលើ X (Twitter) ដែលមានចំនួន Tweet ដែលជាមុខងារចែករំលែកបន្ត ច្រើនជាងគេ ជាមួយនឹងការ retweet ជាង ១លានដង ៕