ចង់ទទួលអារម្មណ៍ដូចតួអង្គក្នុង K-drama ទេ? ទាំងនេះជាទីតាំងថតរឿងកូរ៉េដ៏ពេញនិយមទាំង ៧ ដែលអ្នកគាំទ្រមិនគួររំលង!

នៅពេលទស្សនារឿងភាគកូរ៉េខាងត្បូងម្ដងៗ ទស្សនិកជនប្រាកដជាធ្លាប់បានឃើញទីតាំងស្អាតៗជាច្រើន និងមានបំណងចង់ទៅលេងកន្លែងទាំងនោះតាមអ្វីដែលតួអង្គបានធ្វើជាក់ជាមិនខាន។ ដូច្នេះហើយ ប្រើជ្រុលជាបានទៅលេងកូរ៉េទៅហើយ នេះជាឱកាសមាសឱកាសប្រាក់សម្រាប់អ្នកក្នុងការទទួលបានបទពិសោធន៍ដូចគ្នានឹងតួអង្គទាំងនោះ។ អ៊ីចឹង! ថ្ងែនេះ AMS សូមណែនាំ ៧ កន្លែងដែលអ្នកគាំទ្ររឿងភាគ K-drama មិនគួររំលង។ 

១. Deoksugung Stonewall Walkway

តើមានអ្នកគាំទ្ររឿងភាគកូរ៉េខាងត្បូងណាខ្លះដែលនៅចំណាំផ្លូវនេះបាន? ទីតាំងនេះមានឈ្មោះថា Deoksugung Stonewall Walkway ជាទីកន្លែងដែលបានលេខមុខក្នុងរឿងភាគជាច្រើនរឿង ដូចជា Do Do Sol Sol La La Sol, The Beauty Inside, Do You Like Brahms និង Goblin។ ក្រៅពីសម្រស់ដ៏ស្រស់ស្អាត ផ្លូវដើរដែលមានប្រវែង ១១០០ម៉ែត្រក៏ជាទីតាំងប្រវត្តិសាស្ត្រដ៏សំខាន់មួយដែរ ដោយទីនេះជាផ្លូវដើរក្នុងរាជវាំង Deoksugung ដែលជារាជវាំងដ៏ធំមួយក្នុងចំណោមរាជវាំងទាំងប្រាំក្នុងទីក្រុងសេអ៊ូល របស់រាជវង្សក្នុងសម័យចូសុន។ 

២. Gwanghwamun Square

អ្នកគាំទ្រ របស់ Lee Min-ho នឹងធ្លាប់បានឃើញទីតាំងនេះពីមុនប្រាកដណាស់ ព្រោះទីនេះបានលេចមុខនៅក្នុងរឿង The King: Eternal Monarch ជារឿងដំបូងដែល Lee Min-ho ទទួលថតក្រោយពីបញ្ចប់កាតព្វកិច្ចជានាយទាហាន។ មិនត្រឹមតែប៉ុណ្ណោះ Gwanghwamun Square ក៏កន្លែងដែលរដ្ឋាភិបាលទីក្រុងសេអ៊ូល និងក្រុមប្រឹក្សាភាពយន្តទីក្រុងសេអ៊ូលបានចាត់ទុកជា ១ក្នុងចំណោម១០០ទីតាំងសម្រាប់ភាពយន្ត និងរឿងភាគផងដែរ។ អ្វីដែលធ្វើឱ្យ Gwanghwamun Square ក្លាយជាទីតាំងពិសេសជាងទីតាំងដទៃទៀត នោះក៏ដោយសារតែទីនេះជាធ្លាកណ្ដាលមួយដែលផ្សារភ្ជាប់អាគារទំនើប និងទីតាំងប្រវត្តិសាស្រ្តនៃរាជវាំង Gyeongbokgung បានយ៉ាងល្អឥតខ្ចោះ។ ក្រៅពីរឿង The King: Eternal Monarch ទីនេះក៏ធ្លាប់មានវត្តមាននៅក្នុងរឿង The Devil Judge, Memories of the Alhambra និង The Last Empress ផងដែរ។ 

៣. អគារណាំសាន

មាននៅចាំកន្លែងដែលតួអង្គឯកទាំងពីនៅក្នុងរឿង F4 (Boys Over Flowers) ណាត់ជួបគ្នាជាលើកដំបូងទេ? យើងអាចរៀបចំឆាកនេះសាជាថ្មីនៅឯ Namsan Tower ដើម្បីទទួលបានបទពិសោធន៍តែមួយជាមួយតួអង្គ Gu Jun-pyo (Lee Min-ho) និង Jan-di (Goo Hye-sun) នៅក្នុងកន្រ្តកខ្សែកាប។ 

ប៉មណាំសាន មានកម្ពស់ ២៣៧ម៉ែត្រស្ថិតនៅពីលើភ្នំណាំសាន។ ជាទីកន្លែងដែលពេញនិយមក្នុងរង្វង់អ្នកទេសចរ ដោយសារតែភាពស្រស់ស្អាតនៃទេសភាពនៃទីក្រុងសេអ៊ូល និងទីក្រុងជុំវិញនោះ។ កន្លែងទេសចរណ៍មួយនេះកាន់តែពេញនិយមបន្ថែមទៀត ក្រោយពីមានវត្តមាននៅក្នុងរឿង True Beauty, Hotel Del Luna និង The Legend of the Blue Sea។ 

៤. Dongdaemun Design Plaza

Dongdaemun Design Plaza (DDP) ជាទីតាំងដ៏លេចធ្លោមួយ ជាមួយស្ថាបត្យកម្មដ៏ប្លែកភ្នែក។ ហេតុដូចនេះហើយបានជាទីនេះជាកន្លែងដែលល្អបំផុតសម្រាប់ឆាកបិទដ៏រ៉ូមែនទិកនៅក្នុងរឿង Vincenzo ដែលសម្ដែងដោយ Song Joong-ki និង Jeon Yeo-bin។ ក្រៅពី ជាទីតាំងសម្រាប់ថតរឿងល្បីៗដូចជា Record of Youth, Love Alarm និង She was Pretty  ទីនេះក៏ជាកន្លែងសម្រាប់រៀបចំកម្មវិធីជាច្រើន ដូចជាការដាក់បង្ហាញម៉ូដ និងពិព័រណ៍ស្នាដៃសិល្បៈជាដើម។  

៥. The Hyundai Seoul

Hyundai Seoul ជាផ្សារទំនើបដ៏ពេញនិយមសម្រាប់ប្រជាជនកូរ៉េ ប៉ុន្តែក្រោយពីក្លាយជាទីតាំងសម្រាប់ថតនៅក្នុងរឿង K-drama ផ្សារទំនើបដ៏ធំមួយនេះបានផ្សព្វផ្សាយប្រជាប្រិយភាពរបស់ខ្លួនទៅកាន់លំដាប់ពិភពលោកតែម្ដង។ តួយ៉ាង ផ្សារទំនើបមួយនេះបានលេខមុចក្នុងភាពយន្តភាគរឿង Queen of Tears ក្នុងឈ្មោះជា Queens Department Store ដែល​គ្រប់គ្រង​ដោយ​តួឯក Hong Hae-in សម្ដែងដោយ Kim Ji-won។ បច្ចុប្បន្នទីនេះក្លាយទៅជាទីតាំងដែល Fan រឿង K-drama ជុំវិញពិភពលោកមិនអាចរំលងបាន ព្រោះក្រៅពីទីនេះជាទីប្រជុំទៅដោយហាងទំនិញប្រណិត និងទំនិញស្ទីលកូរ៉េទេ ទីនេះក៏ជាកន្លែងថតរឿងកូរ៉េល្បីៗផងដែរ។ 

៦. Yonsei University

នៅក្នុងប្រទេសកូរ៉េខាងត្បូងមានសាកលវិទ្យាល័យស្អាតៗមិនតិចទេ តែមិនមែនគ្រប់សាកលវិទ្យាល័យសុទ្ធតែអាចទាញយកបេះដូងរបស់អ្នកគាំទ្ររឿងភាគកូរ៉េបានឡើយ។ សាកលវិទ្យា Yonsei ដែលមានការច្នៃម៉ូដតាមបែប Gothic-style នេះ បានក្លាយជាទីតាំងថតរឿងដ៏ពេញនិយម។ តួយ៉ាង សាកលវិទ្យាYonsei ក៏ជាទីតាំងដ៏សំខាន់មួយនៅក្នុងរឿងភាគ Snowdrop ជារឿងដំបូងដែល Jisoo មានឱកាសបានក្លាយជាតួឯក ដោយក្នុងរឿងសាកលវិទ្យាល័យមួយនេះមានឈ្មោះថា Hosu Women’s University។ បន្ថែមពីរឿង Snowdrop ទីកន្លែងមួយនេះក៏ជាទីតាំងដែលអ្នកទស្សនារឿង Extraordinary You, True Beauty, Reply 1992 និង My Sassy Girl ចង់ទៅលេងផងដែរ។

៧. Mishmash

ជឿជាក់ថា អ្នកដែលធ្លាប់ទស្សនារឿង Marry My Husband ប្រាកដជាអាចចំណាំភោជនីយដ្ឋានមួយនេះបានជាមិនខាន ព្រោះទីនេះជាកន្លែងដែលតួអង្គឯក Kang Ji-won (Park Min-young) និង Yoo Ji-hyuk (Na In-woo) បានញ៉ាំអាហាររួមគ្នាជាលើកដំបូង។ សម្រាប់អ្នកចូលចិត្តមើលរឿងកូរ៉េ ហើយតែងស្រក់ទឹកមាត់តាមមុខម្ហូបដែលតួអង្គញ៉ាំនោះ អ្នកប្រាកដជាមិនអាចរំលងភោជនីយដ្ឋាន Mishmash បានទេ។ ដោយមានម្ចាស់ជាមេចុងភៅ Minzi Kim Wind ដែលបានបញ្ចប់ការសិក្សាជំនាញនេះពីប្រទេសបារំាង និងធ្លាប់ធ្វើការនៅហាងអាហារលំដាប់ Michelin ផង អ្នកប្រាកដជាអាចទទួលបានបទពិសោធន៍ញ៉ាំ ម្ហូបបែបកូរ៉េរសជាតិអន្តរជាតិជាក់ជាមិនខាន។ ជាពិសេសទីនេះនៅជាប់នឹងរាជវាំង Changdeokgung ទៀតផង។ ដូចនេះ នៅពេលដែលអ្នកទៅលេងរាជវាំង Changdeokgung អ្នកពុំគួររំលងភោជនីយដ្ឋាន Mishmash ឡើយ ៕