ធ្លាប់ល្បីខ្លាំង តែក្រុមចម្រៀងខេប៉ុប ៧ នេះមានវាសនាអភ័ព្វត្រូវក្រុមហ៊ុនមិនអើពើ ចុងក្រោយបានត្រឹមចែកផ្លូវគ្នាដើរ

ធ្លាប់ជាក្រុមចម្រៀងខេប៉ុបមានភាពល្បីល្បាញ និងទទួលការគាំទ្រយ៉ាងខ្លាំងពីអ្នកគាំទ្រ តែបែរជាត្រូវរំសាយក្រុមដោយសារត្រូវក្រុមហ៊ុនរបស់ខ្លួនមិនអើពើ គ្រប់គ្រងមិនបានល្អ។ ក្រុមចម្រៀងខេប៉ុប ៧ ក្រុមមានវាសនាអភ័ព្វកំពុងពេញល្បីតែបែរជាត្រូវបាត់មុខពីសិល្បៈ៖

១.AfterSchool

Pledis Entertainment ជាផលិតកម្មមួយដែលអ្នកគាំទ្រជាច្រើនលើកឡើងថា ខ្វះភាពគ្រប់គ្រងចំពោះតារាចម្រៀងរបស់ខ្លួន ខណៈក្រុមចម្រៀង After School គឺជាឧទាហរណ៍ដ៏ល្អឥតខ្ចោះមួយ។ ក្រុមចម្រៀងនារីមួយនេះបានបញ្ចេញបទចម្រៀងចុងក្រោយគឺ “First Love”  ក្នុងឆ្នាំ ២០១៣។ បន្ទាប់ពីបង្ហាញសកម្មភាពចុងក្រោយក្នុងប្រទេស ជប៉ុន សមាជិករបស់ After School ចាប់ផ្ដើមប្រកាសដើរចេញពីផលិតកម្មម្ដងម្នាក់។ បើទោះជាមិនទាន់ប្រកាសរំសាយក្រុមជាផ្លូវការ តែសមាជិកដែលនៅសេសសល់គឺមានតែ Nana ម្នាក់គត់។ ក្រុមចម្រៀងមួយនេះគឺមានភាពល្បីល្បាញកំឡុងឆ្នាំ ២០១០ តែការមិនយកចិត្ដទុកដាក់របស់ផលិតកម្មធ្វើឲ្យសមាជិកក្រុមជ្រើសដើរចេញតែម្ដង។

២.B.A.P

មក​ដល់​បច្ចុប្បន្ន អ្នក​គាំទ្រជាច្រើននៅតែមានការខឹងសម្បារជាមួយផលិតកម្ម TS Entertainment ដែលមិន​បាន​មើល​ថែទាំក្រុមចម្រៀងបុរស B.A.P ឲ្យបានល្អនៅពេលពួកគេបង្ហាញខ្លួនលើកដំបូង។ កំឡុងពេលចេញជាផ្លូវការដំបូង  B.A.P ត្រូវបានគេចាត់ទុកជាក្រុមចម្រៀងបុរសថ្មីមួយដែលមានឥទ្ធិពល និងត្រូវគេរំពឹងថាអាចមានភាពល្បីល្បាញប្រហែលក្រុមចម្រៀង BTS និង EXO។ ទោះជាយ៉ាងណាក៏ដោយសារតែការគ្រប់គ្រង និងបែងចែកប្រាក់កម្រៃមិនបានត្រឹមត្រូវធ្វើឲ្យក្រុម B.A.P ធ្លាក់ខ្លួនជាប់ពាក់ព័ន្ធពាក្យបណ្ដឹងប្ដឹងផ្ដល់ជាច្រើនជាមួយផលិតកម្ម។ ជាលទ្ធផល ប្រជាប្រិយភាព B.A.P ធ្លាក់ចុះ ហើយសមាជិកម្នាក់ៗ ក៏សម្រេចដើរចេញពីផលិតកម្ម។

៣.MBLAQ

ក្រុមចម្រៀងបុរស MBLAQ ត្រូវបានបង្កើតឡើងដោយលោក Rain ហើយនៅពេលដែលបង្ហាញខ្លួនដំបូង ក្រុមចម្រៀងមួយនេះពិតជាធ្វើបានល្អ សម្រាប់បទចម្រៀងក៏ហក់ឡើងដល់កំពូលតារាងចម្រៀង។ MBLAQ ជាក្រុមចម្រៀងបុរសដែលមានប្រជាប្រិយភាពមួយផងដែរកំឡុងឆ្នាំ ២០១០ ប៉ុន្ដែដោយសារខ្វះការផ្សព្វផ្សាយ និងការយកចិត្ដទុកដាក់ ធ្វើឲ្យប្រជាប្រិយរបស់ក្រុមចម្រៀងនេះធ្លាក់ចុះម្ដងបន្ដិច។ ការបញ្ចេញចម្រៀងចុងក្រោយរបស់ MBLAQ គឺនៅឆ្នាំ ២០១៥ ហើយក្រុមនេះបានផ្អាកសកម្មភាពតាំងពីពេលនោះមក។

៤.4Minute

Cube Entertainment ក៏ត្រូវបានមហាជន និងអ្នកគាំទ្រជាច្រើនលើកឡើងថា ជាផលិតកម្មគ្មានទំនួលខុសត្រូវ ព្រមទាំងមិនផ្សព្វផ្សាយតារារបស់ខ្លួនឲ្យបានត្រឹមត្រូវ។ សមាជិកទាំងអស់របស់ 4Minute ត្រូវបានរាយការណ៍ថា សុទ្ធតែចង់បន្ដកុងត្រាជាក្រុម តែផលិតកម្មមិនព្រមបន្ដកុងត្រា និងព្យាយាមរកគ្រប់ហេតុផលដើម្បីរំសាយក្រុមមួយនេះចោល។ 4Minute ក៏ជាក្រុមចម្រៀងមួយដែលមិនបានដឹងពីការរំសាយក្រុមពីផលិតកម្មផងដែរ បើតាមសម្ដីសមាជិកពួកគេបានដឹងតាមរយៈរបាយការណ៍ផលិតកម្ម។

៥.2NE1

ការប្រកាសរំសាយក្រុមរបស់ចម្រៀង 2NE1 បានបង្កការភ្ញាក់ផ្អើលដល់ក្រុមអ្នកគាំទ្រខេប៉ុបជាច្រើន។  2NE1 គឺជាក្រុមចម្រៀងមួយក្នុងចំណោមក្រុមដែលលេចធ្លោខ្លាំងបំផុតក្នុងប្រវត្ដិសាស្ដ្រ ខេប៉ុប។ រហូតមកដល់សព្វថ្ងៃនេះ ទោះរំសាយក្រុមក៏ 2NE1 នៅតែមានភាពល្បីល្បាញ ខណៈអ្នកគាំទ្រជាច្រើននៅតែទន្ទឹងរង់ចាំការត្រឡប់មកវិញជាក្រុម។ ការរំសាយក្រុមរបស់ 2NE1 គឺត្រូវបានគេជឿថា មានបញ្ហាផ្ទៃក្នុងដោយ YG មិនផ្ដល់ឱកាស ឬការផ្សព្វផ្សាយឲ្យបានល្អត្រឹមត្រូវដល់ Minzy។ YG មិនអើពើនៅពេល CL បញ្ចេញចម្រៀង និងផ្សព្វផ្សាយនៅ សហរដ្ឋអាមេរិក។ រឿងអាស្រូវរបស់ Park Bom ក៏ត្រូវបានក្រុមហ៊ុនមិនអើពើ ជួយជាបង្អែក។ កំឡុងឆ្នាំ ២០១៥ YG ត្រូវបានក្រុមអ្នកគាំទ្រចោទប្រកាន់យ៉ាងធ្ងន់ធ្ងរថា កំពុងលួចសម្ងំបង្កើតក្រុមចម្រៀងថ្មីដែលមានសម្រស់ស្អាតជាង 2NE1។ ក្នុងឆ្នាំ ២០១៦ YG ក៏ប្រកាសរំសាយក្រុម  2NE1 ទាំងសមាជិកក្នុងក្រុមមិនបានដឹង។ CL ធ្លាប់បានលើកឡើងថា ខ្លួនដឹងពីព័ត៌មានរំសាយក្រុម តាមរយៈបណ្ដាញសង្គម និងមិនបានដឹងជាមុនឡើយ។

៦.Crayon Pop                   

Crayon Pop ត្រូវ​បាន​គេ​ស្គាល់​ថា​ជា​តារា​ចម្រៀងនារីខេប៉ុបមួយដែលទទួលបានការគាំទ្រយ៉ាងខ្លាំងនឹកស្មានមិនដល់ក្នុងឆ្នាំ ២០១៣ ដោយសារបទចម្រៀង “Bar Bar Bar”។ កំពុងទទួលបានភាពល្បីល្បាញខ្លាំង តែក្រុមហ៊ុន Chrome Entertainment បែរជាមិនអើពើ ឬផ្សព្វផ្សាយក្រុមចម្រៀងមួយនេះឲ្យបានល្អជាងនេះ ធ្វើឲ្យប្រជាប្រិយភាពរបស់ Crayon Pop ធ្លាក់ទៅវិញយ៉ាងឆាប់រហ័ស។ ចុងក្រោយ បានត្រឹមផ្អាកសកម្មភាពលែងបង្ហាញខ្លួនក្នុងវិស័យចម្រៀងខេប៉ុប។  

៧.Miss A

Miss A ជាក្រុមចម្រៀងខេប៉ុបនារីដែលមានភាពល្បីល្បាញខ្លាំងផងដែរ។ ដើមហេតុដំបូងនាំឲ្យមានការផ្អាកសកម្មភាពក្រុមគឺក្រោយសមាជិកមិនបន្ដកុងត្រា។ រហូតដល់ឆ្នាំ ២០២០ Fei ដែលជាសមាជិកម្នាក់របស់ Miss A ក៏បានទម្លាយពីរឿងរ៉ាវពីក្រោយ គឺឱកាសការងារមិនស្មើភាពគ្នា។ នាងបានលើកឡើងថា នៅពេលបញ្ចេញមុខដំបូង រូបនាងមិនសូវមានភាពប៉ិនប្រសប់ក្នុងប្រើប្រាស់ភាសា ទើបធ្វើឲ្យនាងខកខានការឡើងកម្មវិធីផ្សេងៗ ខណៈសមាជិកនីមួយទទួលបានការងារតាមរយៈសមត្ថភាពដែលខ្លួនមាន។ បើយោងតាមប្រភពផ្ទៃក្នុង ភាពល្បីល្បាញរបស់ Suzy លេចធ្លោពេក ធ្វើឲ្យផលិតកម្ម JYP ជ្រើសផ្សព្វផ្សាយសកម្មភាពទោលរបស់ Suzy ច្រើនជាងក្រុម។ ភាពល្បីល្បាញរបស់សមាជិក ឡើងខ្ពស់ដាច់គ្នាពេកធ្វើឲ្យមហាជនជឿថា វាជាផ្នែកមួយដែលធ្វើឲ្យក្រុមមួយនេះលែងមានសកម្មភាព។

ចុះប្រិយមិត្ដយល់យ៉ាងណាដែរ?