ធ្លាប់តែសម្បូរគេស្រឡាញ់ តារាចិន ៦ រូបនេះស្ទើរតែបាត់បង់ប្រជាប្រិយភាពដោយសាររឿងទាំងនេះ

មានឃ្លាមួយដែលគេនិយាយថា “ធ្វើខ្លួនឱ្យល្បីមិនមែនជារឿងពិបាកទេ តែអ្វីដែលពិបាកនោះ​​​​​​​ គឺការរក្សាកេរ្តិ៍ឈ្មោះឱ្យគង់វង្ស”។ ប្រយោគនេះពិតជាត្រឹមត្រូវ និងស័ក្ដសមបំផុតសម្រាប់អ្នកប្រកបអាជីពក្នុងវិស័យសិល្បៈ។

ជាក់ស្ដែងតារាចិនដែលបានព្យាយាមកសាងប្រជាប្រិយភាពរបស់ខ្លួនដ៏លំបាកទម្រាំមានអ្នកស្គាល់ដូចសព្វថ្ងៃនេះ ស្រាប់តែទស្សនិកជនអះអាងថាខ្លួននឹងលែងគាំទ្រពួកគេ ក្រោយពីមានរឿងអាស្រូវដែលកើតឡើងមកពីចរិតឫកពា និងបញ្ហផ្ទាល់ខ្លួនផ្សេងៗ។

ខាងក្រោមនេះ ជាតារាសម្ដែងចិនល្បីឈ្មោះចំនួន ៦ដួងដែលស្ទើរតែបាត់ប្រជាប្រិយភាព និងមានអ្នកស្អប់ច្រើនដោយសាររឿងអាស្រូវរបស់ខ្លួន៖

១. Zhao Lusi

ពីតារាស្រីដែលមានសម្រស់លេចធ្លោដែលទស្សនិកជនស្គាល់ថាជាមនុស្សសុភាព បច្ចុប្បន្ន​ Zhao Lusi បានទទួលរហ័សនាមជា តារាកំពូលល្បិច។ តារាស្រីវ័យ២៦ឆ្នាំរូបនេះ តែងតែមានព័ត៌មានអាស្រូវជាមួយនឹងតារារួមអាជីពជាច្រើនដង មិនថាជាមួយនឹង​ Zhao Liying, Liu Yifei, Tieu Chien និង Dilraba Dilmurat ជាដើម។​

បន្ថែមពីនេះទៀតនេះ ទស្សនិកជនតែងតែសង្កេតឃើញថានាង តែងតែឆ្លៀតឱកាសក្នុងការទាញយកប្រជាប្រិយភាពរាល់ពេលដែលមានរឿងចម្រូងចម្រាសណាមួយដែលទាក់ទងនឹងខ្លួន រហូតធ្វើឱ្យអ្នកនិយមទស្សនាភាពយន្តរបស់ចិនចាប់ផ្ដើមធុញទ្រាន់នឹងនាង។

២. Yang Mi

បើមិនលើកយករឿងយើងអាស្រូវដែល Yang Mi ធ្លាប់មានកន្លងមកទេនោះ បច្ចុប្បន្ន​​អ្នកគាំទ្រច្រើនរិះគន់ តារាស្រីរូបនេះទៅលើសមត្ថភាពសម្ដែង និងការប្រកបការងារដែលខ្វះវិជ្ជាជីវៈរ​បស់នាង។ ត្បិតសមត្ថភាពនៅមានកម្រិត តារាស្រីវ័យ ៣៨ឆ្នាំរូបនេះនៅតែមិនចង់កែសម្រួលឱ្យរឿង និងកម្មវិធីរបស់នាងមានគុណភាពល្អប្រសើរជាងមុនទេ​ តែផ្ទុយមកវិញនាងនៅតែបន្តផលិតជារឿយៗដែលនាំឱ្យប៉ះពាល់ដល់គុណភាពនៃការផលិតរបស់គម្រោងទាំងមូលតែម្ដង។​

ទន្ទឹមគ្នានឹងការរិះគន់ដែលកើតឡើងក្នុងរយៈពេលយូរឆ្នាំមកហើយ Yang Mi នៅតែមិនគិតត្រឡប់ទៅពង្រឹងសមត្ថភាពរបស់ខ្លួន ដែលធ្វើឱ្យស្នាដៃរបស់នាងទទួលបានបរាជ័យម្ដងហើយម្ដងទៀត និងកាន់តែគ្រោះថ្នាក់សម្រាប់អាជីពរបស់នាង បើ​ Yang Mi នៅតែបន្តធ្វើបែបនេះ។​

៣. Ruby Lin

រូបភាពជាតារាស្រីទន់ភ្លន់របស់ Ruby Lin បានបាត់បង់តាំងតែពីនាងបានអះអាងថា តារាប្រុស​ Zhou Jie បានចាប់បង្ខំនាងឱ្យថើបខ្លួននៅពេលថតរឿង My Fair Princess មកម្ល៉េះ។ តែក្រោយពីមានជម្លោះពាក្យសម្ដី និងការជជែកវែកញែកនានានៅលើបណ្ដាញអ៊ីនធឺណិតជាបន្តបន្ទាប់ តារាស្រីវ័យ ៤៨ឆ្នាំរូបនេះបានដោះសារថា វាអាចមកពីនាងងាយរងប្រតិកម្មនឹងរឿងនេះពេក។ ទោះជាយ៉ាងណាក៏ដោយ រឿងអាស្រូវនេះបានធ្វើឱ្យ Zhou Jie បាត់បង់អាជីពរបស់ខ្លួន ហើយទស្សនិកជនចាប់ផ្ដើមលែងចូលចិត្ត Ruby Lin ដូចមុនតទៅទៀត។

បន្ថែមពីនេះ តារាសម្ដែង​ និងតារាចម្រៀងរូបនេះក៏ត្រូវបានគេរិះគន់ថាជាអ្នកចិត្តបុណ្យក្លែងក្លាយផងដែរ ដោយសារតែគេតែងឃើញវត្តមានរបស់លោកស្រីនៅក្នុងកម្មវិធីសប្បុរសធម៌ជាញឹកញយ តែបរិច្ចាគទឹកប្រាក់បន្តិចបន្តួចតែប៉ុណ្ណោះ។

៤. Zhou Dongyu

តារាស្រីវ័យ ៣២ឆ្នាំរូបនេះ បានចាប់ផ្ដើមបាត់បង់បានប្រជាប្រិយភាពតាំងតែពីនាងមានរឿងអាស្រូវទាក់ទងនឹងស្នេហាមកម៉្លេះ។ បន្ថែមពីនេះទៀត ក្រោយពី​ Zhou Dongyu បានក្លាយជាតារាស្រីវ័យក្មេងជាងគេដែលបានទទួលពានរង្វាន់ Triple Gold Movie Queen អ្នកគាំទ្របានចោទប្រកាន់ថាពានរង្វាន់ដែលនាងឈ្នះនោះ បានមកពីខ្នងបង្អែកធំ ចាំជួយនាងពីក្រោយ។

លើសពីនេះទៅទៀត Zhou Dongyu ក៏ធ្លាប់លេចឮព័ត៌មានដែលថា នាងតារាស្រីដែលវាយឫកផងដែរ ដោយនាងបានប្រកែកមិនព្រមថតរូបជាមួយនឹងអ្នកគាំទ្រ និងមិនបង្ហាញការគោរពដល់រៀមច្បងក្នុងវិស័យសិល្បៈទៀតផង។​

៥. Cheng Yi

Cheng Yi ចាប់ផ្ដើមធ្លាក់ប្រជាប្រិយភាព ដោយសារតែបញ្ហារវាងអ្នកគាំទ្ររបស់ខ្លួន​ និងតារាប្រុសរួមអាជីពម្នាក់ឈ្មោះ Huang JunJie ។ បញ្ហាមួយនេះបានចាប់ផ្ដើមនៅពេលដែលអ្នកគាំទ្របានចេញមុខតវ៉ាមិនចង់ឱ្យតារាក្នុងដួងចិត្តរបស់ខ្លួនរួមការងារជាមួយនឹង Huang JunJie ដោយសារតែបញ្ហារឿងអាស្រូវទាក់ទងនឹងស្នេហាកាលពីប៉ុន្មានឆ្នាំមុន។​

អ្នកគាំទ្រទាំងនោះ បានព្យាយាមចេញមុខតវ៉ាឱ្យក្រុមការងារដក Huang JunJie ចេញពីរឿងមួយនេះ។ ដោយឡែក ស្របពេលដែលមិត្តបាត់បង់ការងារ​ Cheng Yi មិនបានចេញមុខនិយាយអ្វីបន្តិចសោះឡើយ។

៦. Liu Yuning

Liu Yu Ning បានក្លាយជាតារាមួយរូបដែលទស្សនិកជនគិតថាលោកទទួលបានឱកាសលើសពីសមត្ថភាព។ ជាញឹកញយតារា​ប្រុសរូបនេះតែងតែលេចមុខនៅក្នុងភាពយន្តភាគខ្នាតធំជាច្រើន  ស្របពេលដែលទស្សនិកជនយល់ឃើញថាបច្ចេកទេសក្នុងការសម្ដែងរបស់លោកនៅមានកម្រិតនៅឡើយ។​

លើសពីនេះទៅទៀត លោកតែងតែព្យាយាមទាញចំណាប់អារម្មណ៍អ្នកទស្សនាមកកាន់ខ្លួន តាមការផ្លាស់ប្ដូរបារ៉ូលជាប្រចាំ ដែលវាបានប៉ះពាល់ដល់ក្រុមការងារ និងអ្នកដែលលោកសម្ដែងជាមួយ​ រហូតដល់តារាស្រីជាច្រើនរូបមិនចង់រួមការងារជាមួយលោក។​​ ជាក់ស្ដែង មួយរយៈមុននេះ អ្នកគាំទ្ររបស់តារាសម្ដែងស្រី Yang Zi បានចេញមុខមិនគាំទ្រតារាប្រុសរូបនេះ ក្រោយមានព័ត៌មានលេចឮថា​ពួកគ្នានឹងរួមសម្ដែងជាមួយគ្នាក្នុងរឿងភាគថ្មី៕