មិនសរសើរមិនបាន! តារា​ស្រីកូរ៉េល្បី ៦ រូបតស៊ូប្រឹងធ្វើការដើម្បីសងបំណុលជំនួសឳពុកម្ដាយ

ជាការពិតមិនមែនជីវិតជាតារាសុទ្ធតែមានភាពស្រណុកសុខស្រួលឡើយ អ្នកខ្លះខំប្រឹងប្រែងធ្វើការទាំងហត់នឿយរកបានប្រាក់ក៏ត្រូវអស់ទៅវិញដោយសារតែដោះស្រាយបញ្ហានានា។ ក្រឡេកមើលតារាស្រីកូរ៉េទាំង ៦ រូបខាងក្រោមសុទ្ធតែត្រូវជាប់ជំពាក់ជាមួយបំណុលឳពុកម្ដាយ ប៉ុន្ដែពួកគេនៅតែទ្រាំតស៊ូ និងរកប្រាក់ដើម្បីដោះបំណុលទាំងនោះ។  

១.Han SoHee

តារាស្រី Han So Hee ដែល​ត្រូវ​បាន​ចិញ្ចឹមបីបាច់ឱ្យធំធាត់ដោយលោកយាយ​បង្កើត​របស់​នាង។ ម្ដាយរបស់នាងបានយកឈ្មោះរបស់នាងទៅខ្ចីប្រាក់ជាច្រើនពីខាងធនាគារ និងអ្នកចងការផងដែរ។  ​នាងត្រូវជាប់ជំពាក់បំណុលជាច្រើនតាំងតែពីនៅវ័យក្មេង និងខិតខំប្រឹងធ្វើការដើម្បីសងបំណុលជួសម្ដាយនាង។ តែម្ដាយរបស់នាងនៅតែបន្ដដើរឆបោកប្រាស់ប្រាក់របស់អ្នកដទៃដោយប្រើប្រាស់ឈ្មោះរបស់នាង។ ទន្ទឹមនេះដែរ ដោយសារបំណុលបន្ដមានជាបន្ដបន្ទាប់ ជាលទ្ធផល តារាស្រី  Han So Hee ក៏បានប្រកាសថានាងមិនជួយសងប្រាក់ជំនួសម្ដាយនាង ដូច្នេះរូបនាងសុំមិនទទួលខុសត្រូវចំពោះទង្វើរបស់ម្ដាយនាងទៀតឡើយ។

២.Sandara Park

មុនពេលមានឈ្មោះល្បីល្បាញដូចសព្វថ្ងៃជីវិតរបស់តារាស្រី Sandara Park ពិតជាមិនស្រួលឡើយ នាងត្រូវចេញរកប្រាក់តាំងពីនៅវ័យក្មេង។ នៅក្នុងបទសម្ភាសន៍ជាមួយខាង The Philippine Star តារាស្រីរូបនេះបានចែករំលែកថា ឪពុករបស់នាងជាជនជាតិកូរ៉េតែបានចាកចេញពីគ្រួសារ។ តែឳពុករបស់នាងបានបន្សល់ទុកនូវបំណុលជាច្រើនដល់នាង ដោយលោកបានបន្លំឱ្យនាងចុះហត្ថលេខាលើឯកសារខ្ចីប្រាក់មួយចំនួនធំដែលកាលនោះនាងមិនដែលស្រមៃថាអាចសងបំណុលទាំងអស់នេះបានឡើយ។

៣.Kim HyeSoo

តួស្រីក្នុងរឿង “Juvenile Justice” តារាស្រី Kim Hye Soo បានធ្លាក់ខ្លួនវេទនាយ៉ាងខ្លាំង ដោយសារតែបំណុលរបស់ម្ដាយរបស់នាង។ នាងត្រូវចេញរកប្រាក់ដើម្បីដោះស្រាយបំណុលទាំងនោះ ប៉ុន្ដែបំណុលទាំងការ ទាំងដើមកាន់តែច្រើនឡើងធ្វើឱ្យនាងមិនអាចមានលទ្ធភាពក្នុងការសង។ ក្នុងឆ្នាំ ២០១២ តារាស្រី Hye Soo បានប្រកាសកាត់ផ្តាច់ទំនាក់ទំនងជាមួយម្តាយរបស់នាង ប៉ុន្តែនាងបានបន្តដោះស្រាយសងបំណុលមួយចំនួនដែលមិនទាន់សងអស់។ នៅឆ្នាំ ២០១៩ នាងបានជាប់ពាក់ព័ន្ធក្នុងរឿងអាស្រូវមួយទៀតទាក់ទងនឹងបំណុលម្តាយរបស់នាងដែលមានចំនួនរហូតដល់ជិត ១ លានដុល្លារអាមេរិក។ តែយ៉ាងណាមិញ តុលាការកំពូលបានសម្រេចថា តារាស្រី Kim Hye Soo មិនទទួលខុសត្រូវចំពោះបំណុលរបស់ម្ដាយនាងទេ។

៤.Tiffany សមាជិកក្រុម Girls Generation

ឆ្នាំ ២០១៨ គឺជាឆ្នាំដ៏លំបាកសម្រាប់តារា K-pop ស្រី Tiffany Young បន្ទាប់ពីឪពុករបស់នាងត្រូវបានចោទប្រកាន់ពីបទក្លែងបន្លំ ខណៈនាងត្រូវបានមនុស្សជាច្រើនវាយប្រហារដោយសារតែរឿងមួយនេះ។ បើតាមរបាយការណ៍​បាន​បញ្ជាក់​ថា ជនរងគ្រោះ​បាន​ជួប​ប៉ា​របស់​នាង​នៅ​ទីក្រុង​ម៉ានីល​កាលពី​ឆ្នាំ ២០០៧ ជា​កន្លែង​ដែល​គាត់​បាន​ឲ្យ​គាត់​ខ្ចី​ប្រាក់​ចំនួនជាង ២ ម៉ឺនដុល្លារអាមេរិក។ ជារឿយៗ នាងតែងតែត្រូវបានមនុស្សតេមកគំរាមរឿងបំណុលទាំងនេះ។ នាងក៏បានដោះស្រាយបញ្ហានេះ ដោយបានសងបំណុលជួសឳពុករបស់នាង ហើយនាងក៏បានសម្រេចចិត្តផ្តាច់ទំនាក់ទំនងជាមួយឳពុករបស់ខ្លួនតែម្ដង។

៥.Wheein សមាជិកក្រុមចម្រៀង MAMAMOO

Wheein សមាជិក​ក្រុម MAMAMOO ក៏​ជួប​ការ​លំបាក​ក្នុង​ឆ្នាំ ២០១៨ ដោយសារ​តែ​ឪពុក​នាង​ជំពាក់​បំណុល​គេដូចគ្នា។ បកត្រឡប់ទៅឆ្នាំ ២០១២ ឪពុកម្តាយរបស់នាងបានលែងលះគ្នា ហើយនាងក៏មិនបានទាក់ទងអ្វីច្រើនជាមួយឳពុករបស់ខ្លួនដែរ។ តែក្រោយពេលដែលនាងចាប់ផ្ដើមមានឈ្មោះល្បីល្បាញ ឳពុករបស់នាងក៏បានទៅខ្ចីបំណុលគេប្រមាណជិត ២ ម៉ឺនដុល្លារអាមេរិក និងបញ្ជាក់ប្រាប់ថាកូនស្រីរបស់ខ្លួនជាតារាល្បីមានលទ្ធភាពក្នុងការសងប្រាក់។ Wheein បានសុំទោសចំពោះអ្វីដែលបានកើតឡើង ហើយបាននិយាយថា នាងបានព្យាយាមដោះស្រាយរឿងគ្រប់យ៉ាងឱ្យល្អប្រសើរហើយ។

៦. Jo Yeo Jeong

Jo Yeo Jeong តួឯកស្រីក្នុងភាពយន្ដកុនល្បី Parasite បានជាប់ពាក់ព័ន្ធជាមួយបំណុលរបស់ឳពុករបស់នាង។ ឳពុករបស់នាងបានខ្ចីប្រាក់គេចំនួនជិត ២០ ម៉ឺនដុល្លារអាមេរិក  ដោយកុហកថាយកទៅមើលថែទាំជួសជុលផ្ទះ ប៉ុន្ដែនៅពេលដែលត្រូវបង់ប្រាក់ក៏បែរជាទាក់ទងលែងបាន។ ជាលទ្ធផលមិនអាចធ្វើអ្វីបាន នាងត្រូវសងបំណុលជំនួសឳពុករបស់នាង៕