រឿងភាគឆ្លងវេលា ៥ ចំណងជើង Save ទុកមើលបាន ពេលនឹករឿង Bon Appétit, Your Majesty

Bon Appétit, Your Majesty ភាពយន្តមេចុងភៅឆ្លងភព នាំសម្ដែងដោយ Yoona និង​ Lee Chae Min ទើបតែបានបញ្ចប់ទៅ ជាមួយនឹងប្រជាប្រិយភាពពីទស្សនិកជនមិនតិចរូបទេ ពីជុំវិញពិភពលោក។

ប្រសិនបើអ្នក ជាអ្នកដែលចូលចិត្តមើលរឿង Bon Appétit, Your Majesty ភាពយន្តឆ្លងពេលវេលា មានទាំងស្នេហា កំប្លែង និងកលល្បិចក្នុងរាជវាំងនៅពេលតែមួយ អ្នកក៏អាចនឹងចូលចិត្តភាពយន្តទាំង ៥ចំណងជើងខាងក្រោមនេះដែរ៖

១. Mr. Queen

មិនខុសពី Bon Appétit, Your Majesty ទេ រឿង Mr. Queen និយាយពីតួអង្គចុងភៅប្រុស Jang Bong Hwan សម្ដែងដោយ Choi Jin Hyuk ដែលឆ្លងពេលវេលា ចូលទៅសណ្ឋិតក្នុងរាងកាយរបស់ម្ចាស់ក្សត្រីសម័យ Joseon។

ស្ថិតនៅក្នុងរាងកាយរបស់ម្ចាស់ក្សត្រី Kim So Yong សម្តែងដោយ Shin Hae Sun តួអង្គ Jang Bong Hwan ត្រូវទៅរស់នៅក្នុងជីវិតថ្មីក្រោមដំបូលព្រះបរមរាជវាំងដែលពេញទៅដោយកលល្បិចនយោបាយ។ យ៉ាងណាមិញ ចំណុចធ្លោនៅក្នុងរឿងនេះ គឺជាការបង្ហាញជំនាញចុងភៅរបស់មនុស្សក្នុងលោកអនាគតទៅកាន់មនុស្សសម័យបុរាណ បន្ថែមដោយស្នេហាផ្អែមល្ហែមរវាងម្ចាស់ក្សត្រី និងព្រះរាជា Cheol Jong សម្តែងដោយ Kim Jung Hyun។

ដ្បិតជាភាពយន្តបែបកំប្លែងក៏ពិតមែន តែ Mr. Queen បានបញ្ចូលនូវរឿងរ៉ាវនយោបាយ និងប្រពៃណី ដែលទស្សនិកជនអាចទទួលបានចំណេះដឹងទាំងមិនដឹងខ្លួន។ 

២. The First Night With the Duke

ខុសប្លែកពីរឿងខាងលើ ដែលតួអង្គគ្រាន់តែធ្វើដំណើរឆ្លងពេលវេលា តែរឿង The First Night With the Duke គឺជារសជាតិមួយថ្មីប្លែក ដោយសារតែតួឯកស្រីដែលជាសិស្សមហាវិទ្យាល័យធម្មតាម្នាក់បានឆ្លងភព ចូលទៅក្នុងប្រលោមលោកដែលនាងចូលចិត្ត ក្លាយទៅជាតួអង្គអ្នកនាងតូច Cha Sun Chaek សម្ដែងដោយ Seohyun សមាជិកក្រុម Girls’ Generation។

នៅក្នុងប្រលោមលោកឯពិភពដើមកំណើត តួអង្គអ្នកនាងតូច Cha Sun Chaek គឺជាតួអង្គតូចតាចមួយតែប៉ុណ្ណោះ ប៉ុន្តែនៅពេលដែលបុគ្គលធម្មតារូបនេះនាំយករាងកាយអ្នកនាងតូចទៅជួបនឹង​ព្រះអង្គម្ចាស់ Yi Beon សម្តែង​ដោយ Taecyeon ក្រុម 2PM សាច់រឿងក៏ចាប់ផ្ដើមប្រែប្រួល។

ស្នេហានឹកស្មានមិនដល់ និងនយោបាយក្នុងរាជវាំង ផ្តល់ឱកាសឱ្យនាងផ្លាស់ប្តូរជីវិត ក្លាយជាតួឯកថ្មីនៃរឿងប្រលោមលោកចាស់ កែប្រែសាច់រឿងឱ្យស្ថិតនៅចំចំណុចកណ្ដាលនៃភាពកំប្លុកកំប្លែង ល្បងប្រាជ្ញា និងស្នេហាមនោសញ្ចេតនា។

៣. Moon Lovers: Scarlet Heart Ryeo

រឿងភាគដែលនិយាយពីភាពស្រស់ស្អាត និងភាពឈឺចាប់ក្នុងពេលតែមួយ រឿង Moon Lovers: Scarlet Heart Ryeo និយាយពីដំណើរឆ្លងពេលវេលារបស់ Go Ha Jin សម្តែងដោយ IU នៅពេលដែលនាងព្យាយាមចូលទៅជួយកុមារដែលលង់ទឹកម្នាក់ មុននឹងដឹងខ្លួនម្ដងទៀតនៅក្នុងរាងកាយរបស់ Hae Soo នារីអភិជន នាសម័យ Goryeo។

នៅក្នុងរាងកាយថ្មីនេះ Go Ha Jin បានទៅជាប់​ពាក់ព័ន្ធ​នឹង​ព្រះអង្គម្ចាស់​ជា​ច្រើន​នាក់ ​រួម​មាន Wang So ព្រះអង្គម្ចាស់ចិត្តកាច សម្ដែង​ដោយ Lee Joon Gi និង Wang Wook ព្រះអង្គម្ចាស់​ដ៏​ទន់ភ្លន់ សម្ដែង​ដោយ Kang Ha Neul។ Go Ha Jin បាននៅចំចំណុចកណ្ដាលនៃការផ្លាស់ប្ដូរមួយដ៏សំខាន់ នៅពេលដែលមិត្តភាពដ៏ល្អចាប់ផ្ដើមប្រែប្រួល ក្លាយទៅជាការតស៊ូដណ្ដើមអំណាច កលល្បិច និងស្នេហាពេញទៅដោយភាពឈឺចាប់។

Moon Lovers: Scarlet Heart Ryeo ជាភាពយន្តមួយដែលមានប្រជាប្រិយភាពខ្លាំង បើទោះបីជាបានចេញផ្សាយអស់ពេលជិត ១០ឆ្នាំទៅហើយក្ដី តែទស្សនិកជននៅតែទន្ទឹងរង់ចាំ ចង់ទស្សនារដូវកាលថ្មី។

៤. Faith

Faith បានផ្ដើមសាច់រឿងដោយនិយាយពីទំនាក់ទំនងស្នេហាមិនរលូនរវាងសេ្ដច Gong Min សម្តែងដោយ Ryu Deok Hwan និងម្ចាស់ក្សត្រី No Guk សម្តែងដោយ Park Se Young។ ទោះបីជាបែបនេះក្ដី នៅពេលដែលម្ចាស់ក្សត្រីប្រឈួន ស្ដេច Gong Min នៅតែបញ្ជាឱ្យ Choi Young សម្ដែងដោយ Lee Min Ho ស្វែងរកគ្រូពេទ្យមកព្យាបាល។

ទាំងអស់នេះបានក្លាយជាដើមហេតុដែលធ្វើឱ្យ Choi Young បានធ្វើដំណើរឆ្លងពេលវេលាពីសម័យ Goryeo មកជួយនឹង Yoo Eun Soo សម្តែងដោយ Kim Hee Sun រួចនាំយកគ្រូពេទ្យកែសម្ផស្សរូបនេះឆ្លងទៅកាន់សម័យដើមរបស់ខ្លួនវិញ។

ក្រៅពីការដណ្ដើមអំណាច មន្តស្នេហ៍នៃរឿងនេះ គឺជាការប៉ះទង្គិចគ្នារវាងវិទ្យាសាស្រ្តក្នុងលោកទំនើប ជាមួយនឹងជំនឿប្រពៃណីរបស់កូរ៉េ ដែលបង្កើតបានជាទឹកដមនៃភាពផ្អែមល្ហែម ស្នេហាស្រស់បំព្រង និងភាពតានតឹងក្នុងពេលតែមួយ។

៥. Splash Splash Love

ខ្លី តែខ្លឹម! Splash Splash Love ជារឿងភាគដើរតាមដំណើររបស់សិស្សស្រី Dan Bi សម្តែងដោយ Kim Seul Gi ដែលរត់គេចពីសម្ពាធនៃការត្រៀមប្រឡងចូលមហាវិទ្យាល័យ តែរឿងចៃដន្យបែរជាធ្វើឱ្យនាងត្រូវធ្លាក់ចូលទៅក្នុងយុគសម័យ Joseon វិញ។​ នៅទីនោះ Dan Bi បានប្រើប្រាស់ចំណេះដឹងគណិតវិទ្យាពីលោកអនាគត ទៅប្រកួតប្រជែងជាមួយនឹងស្ដេច Lee Do សម្តែង​ដោយ Yoon Doo Joon ដែលជា​អ្នក​ពូកែ​គណិតវិទ្យានាសម័យបុរាណ រហូតយកឈ្នះបេះដូងរបស់លោក។

ដ្បិតមានត្រឹមតែ ២វគ្គក៏ពិតមែន តែ Splash Splash Love ជាសាច់រឿងដែលមានគ្រប់រសជាតិ មិនថាភាពអស្ចារ្យនៃដំណើរឆ្លងពេលវេលា ស្នេហាផ្អែមល្ហែមដែលនឹកស្មានមិនដល់ និងការពិតដែលល្វីងជូរចត់ នៅពេលដែលត្រូវជ្រើសរើសថានឹងត្រូវរស់នៅក្នុងពិភពណាមួយ៕