មក​ស្គាល់​ទី​ក្រុង​ល្អ​បំផុត​ ទាំង៥​ក្នុង​លោក​ដោយ​ទស្សនាវដ្ដី Time Out

ជា​រៀង​រាល់​ឆ្នាំ​ទស្សនាវដ្ដី​យក្ស​ដ៏​ធំ​របស់​ចក្រភព​អង់គ្លេស​តែង​តែ​ធ្វើ​ការ​ដក​ស្រង់​ វាយ​តម្លៃ​ ចាត់​​ចំណាត់​ថ្នាក់​ផ្នែក​ទេសចរណ៍​ និង​ការ​កម្សាន្ត​ រាប់​​ចាប់​តាំង​ពី​អាហារដ្ឋាន​ល្អ​បំផុត​ក្នុង​លោក ភាព​យន្ត​ ទីក្រុង កន្លែង​កម្សាន្ត​ ផ្លូវ​រថភ្លើង និង​តំបន់​ល្អ​បំផុត​ក្នុង​លោក​ជា​ដើម​ដែល​ក្នុង​នោះ​​ភូមិ​វត្ត​បូព៌ កម្ពុជា​ក៏​បាន​ជាប់​ចំណាត់​ថ្នាក់​លេខ ៣​ជា​តំបន់​ល្អ​បំផុត​ក្នុង​លោក​ផង​ដែរ។ ដោយ​ឡែក​ទស្សនាវដ្ដី​ Time Out ក៏​បាន​បញ្ចេញ​ចំណាត់​ថ្នាក់​ទី​ក្រុង​ល្អ​បំផុត​ឆ្នាំ​២០២២ ផង​ដែរ​។ យ៉ាង​ណា​ថ្ងៃ​នេះ​ AMS Infotainment បាន​ដក​ស្រង់​ចំណាត់​ថ្នាក់​កំពូល​ទាំង​ ៥​មក​ចែក​រំលែក​ជូន​អ្នក​ទាំង​អស់​គ្នា។

១ Edinburgh

ជា​រាជធានី​របស់​ប្រទេស​ស្កុតឡែន Edinburgh ជា​​ទីក្រុង​ដ៏​ល្បី​ល្បាញ​ និង​ពេញ​និយម​បំផុត​មួយ​ដែល​ប្រជាជន​នៅ​ខាង​ប៉ែក​អឺរ៉ុប​កម្រ​រំលង​ណាស់​ តែ​សម្រាប់​ប្រជាជន​នៅ​ប៉ែក​អាស៊ី​យើង​អាច​កម្រ​ឭ​ឈ្មោះ​បន្តិច។ នៅ Edinburgh គេ​ល្បី​ពី​ស្ថាបត្យកម្ម​ចំណាស់​​ៗ​ពាសពេញ​ទីក្រុង និង​ភាព​សកម្ម​របស់​ទីក្រុង​មួយ​នេះ​ដែល​ធ្វើ​ឲ្យ​រាជធានី​មួយ​នេះ​ស្រស់​ស្អាត និង​បាន​ជំរុញ​ឲ្យ​ទេសចរ​និយម​រុករក ទស្សនា​ដោយ​ការ​ដើរ​ថ្មើរ​ជើង។ ក្រៅ​ពី​ស្ថាបត្យកម្ម​ អាហារ បា គំនូរ​សិល្បៈ វប្បធម៌ និង​ជីវិត​ ឬ​ការ​កម្សាន្ត​នៅ​ពេល​រាត្រី​ជា​អ្វី​ដែល​ទេសចរ​និយាយ​មិន​ដាច់​ពី​មាត់​នៃ​ទីក្រុង​ Edinburgh ដ៏​ស្រស់​ស្អាត​នេះ។

២ Chicago

ក្រោយ​ការ​បិទ​ខ្ទប់ ឬ​រឹតត្បិត​ប្រមាណ​ ២ឆ្នាំ​ ប្រជាជន​ក្នុង​ក្រុង Chicago ចំនួន​ ៥៥ភាគរយ​បាន​ឲ្យ​ដឹង​ថា​ពួក​គេ​ហាក់​មាន​ទំនោរ​ចេញ​ដើរ​កម្សាន្ត​ច្រើន សកម្ម​ជាង​មុន ឬ​ជួយ​យក​អាសា​គ្នា​ច្រើន​ជាង​មុន​។ ដោយ​ឡែក​ក្នុង​ឆ្នាំ​នេះ​ទីក្រុង​របស់​សហរដ្ឋអាមេរិក​មួយ​នេះ​ក៏​ជាប់​ឈ្មោះ​ជា​ទីក្រុង​រីករាយ​បំផុត​ផង​ដែរ​។ នៅ​ Chicago ទាំង​ទេសចរ និង​ពលរដ្ឋ​នៅ​ទី​នោះ​ហាក់​រីករាយ​ជា​មួយ​នឹង​ការ​ជួប​ជុំ និង​ពិធី​ជប់លៀង​ដែល​គេ​អាច​ជួប​ជុំ​តាំង​ពី​ថ្ងៃ​រហូត​ដល់​ម៉ោង​ ៤​ទៀបភ្លឺ។ ហើយ​អ្វី​ដែល​កាន់​តែ​ពិសេស​ជាង​នេះ​ទៅ​ទៀត​គឺ​ បឹង​ Michiganដ៏​ស្រស់​ស្អាត និង​គំនូរ​សិល្បៈ​ដ៏​កម្រ​ៗ​ជា​ច្រើន​នៅ​ទី​នោះ។

៣ Medellín

Medellín ត្រូវ​បាន​គេ​ស្គាល់​ដោយ​ថា​មាន​រដូវ​ស្លឹក​ឈើ​ជ្រុះ​អស្ចារ្យ​ជាង​ទី​ក្រុង​ណាៗ​ទាំង​អស់​ដោយ​សារ​តែ​បរិយាកាស និង​ metro system របស់​វា។ មិន​សូវ​ខុស​ប្លែក​ពី​ទី​ក្រុង Chicago រាជធានី​របស់​ប្រទេស​កូឡំបុី​ Medellín ក៏​ជាប់​ចំណាត់​មួយ​ផ្សេង​ទៀត​ផង​ដែរ​ដោយ​មាន​ចំណាត់​ថ្នាក់​ជា​ទីក្រុង​ដែល​មាន​ជីវិត​ពេល​រាត្រី​ដ៏​អស្ចារ្យ​បំផុត​ផង​ដែរ។

៤ Glasgow

Glasgrow គឺ​ជា​ទីក្រុង​មួយ​ផ្សែង​ទៀត​របស់​ប្រទេស​ស្កុតឡែន​ដែល​ស្ថិត​ក្នុង​ចំណោម​ទីក្រុង​ល្អ​បំផុត​ក្នុង​លោក​។ Glasgrow ជា​ទីក្រុង​ដែល​ត្រូវ​បាន​គេ​ឲ្យ​ឈ្មោះ​ថា​ជា​ទីក្រុង​ដែល​រួសរាយ និង​ចិត្តល្អ​។ ប្រជាជន​នៅ​ក្នុង​ទីក្រុង​មួយ​នេះ​និយម​ចេញ​ដើរ​កម្សាន្ត​នៅ​ខាង​ក្រៅ ជា​ទីក្រុង​ដែល​មាន​ក្លឹប​អាំង​ថ្ងៃ​ដំបូង​គេ​បង្អស់ និង​សម្បូរ​ទៅ​ដោយ​អាហារដ្ឋាន​ដែល​មាន​គុណភាព​ខ្ពស់​ ពោរពេញ​ទៅ​ដោយ​គំនិត​ច្នៃ​ប្រឌិត។

៥ Amsterdam

មិន​មែន​ជា​រឿង​ចម្លែក​នោះ​ទេ​ដែល​រាជធានី​ដ៏​ធំ​របស់​ប្រទេស​ហូឡង់ ស្ថិត​ក្នុង​ចំណោម​ទី​ក្រុង​ល្អ​បំផុត​។ Amsterdam ជា​ទីក្រុង​បេតិកភណ្ឌ​សិល្បៈ បរិស្ថាន សម្បូរ​ទៅ​ដោយ​ផ្ទះ​ចំណាស់​ពី​សម័យ​មុន​នៅ​តាម​បណ្ដោយ​ប្រឡាយ​ក្នុង​ទីក្រុង ព្រម​ទាំង​មាន​វត្តមាន​របស់​​សារមន្ទីរ​  Van Gogh ដែល​ធ្វើ​ឲ្យ​ទីក្រុង​មួយ​នេះ​បង្កប់​ទៅ​ដោយ​រឿងរ៉ាវ​ជា​ច្រើន​ដែល​ទេសចរ​ចង់​ស្វែង​យល់​ និង​ទស្សនា។ ម្យ៉ាង​ប្រជាជន​ដែល​រស់​នៅ​ក្នុង​ទីក្រុង​ប្រកប​ទៅ​ដោយ​ភាព​រីករាយ​ និង​ការ​គិតគូរ​ពី​បរិស្ថាន​ដោយ​ពួក​គេ​និយម​ប្រើ​ប្រាស់​មធ្យោបាយ​សាធារណៈ ការ​ដើរ និង​ជិះ​កង់។ បន្ថែម​ពី​លើ​នេះ​ Amsterdam សម្បូរ​ទៅ​ដោយ​មហោស្រព​ ឬ​កម្មវិធី​មិន​ចេះ​ដាច់​ក្នុង​មួយ​ឆ្នាំ​ៗ ទាំង​ការ​កម្សាន្ត សិទ្ធិមនុស្ស​ និង​ចំណេះ​ដឹង៕